ផ្នែកផ្សាយជាភាសាកូរ៉េនៃវីអូអេបានរាយការណ៍ថា ពួកអ្នកជំនាញការរបស់ស.រ.អា.បានអំពាវនាវឱ្យមានការប្រាប់អំពីកន្លែងបរមាណូទាំងអស់របស់ប្រទេសកូរ៉េខាងជើង។
ការអំពាវនាវនេះមានឡើងនៅក្រោយមានរបាយការណ៍ថា ក្រសួងការបរទេសស.រ.អា.បានរាយការណ៍ទៅកាន់សភាស.រ.អា.ថាប្រទេសកូរ៉ខាងជើងប្រហែលមានរោងចក្របរមាណូសម្ងាត់បន្ថែមលើរោងចក្របរមាណូបច្ចុប្បន្ននៅ Yongbyon។
លោក Robert Einhorn បាននិយាយនៅក្នុង email មួយផ្ញើទៅឱ្យវីអូអេថា «កិច្ចចរចាណាមួយអំពីកម្មវិធីបរមាណូនៃប្រទេសកូរ៉េខាងជើងត្រូវតែចាប់ផ្តើម ដោយរដ្ឋាភិបាលក្រុង Pyongyang ត្រូវតែទទួលស្គាល់ទំហំទាំងស្រុងនៃរោងចក្របរមាណូទាំងអស់របស់ខ្លួន»។ លោក Larry Niksch បានថ្លែងថា កិច្ចចរចាថ្មីណាមួយ«ត្រូវផ្តល់អាទិភាពលើការផ្ទៀងផ្ទាត់និងត្រួតពិនិត្យ»។
លោក Stephen Haggard បាននិយាយថា កិច្ចចរចាបរមាណូក្នុងពេលអនាគតជាមួយប្រទេសកូរ៉េខាងជើង«មិនអាចត្រូវដាក់កម្រិតត្រឹមតែលើរោងចក្រ Yongbyon តែមួយទេ ក៏ប៉ុន្តែត្រូវតែតម្រូវឱ្យមានការប្រកាសពេញលេញអំពីរោងចក្របរមាណូទាំងអស់របស់កូរ៉េខាងជើង»៕