រដ្ឋមន្រ្តីក្រសួងហិរញ្ញវត្ថុមកពីប្រទេសចំនួន១៩ ដែលប្រើប្រាក់អឺរ៉ូ កាលពីថ្ងៃព្រហស្បតិ៍ បានព្រមព្រៀងគ្នាលើកម្មវិធីដែលមានទឹកប្រាក់ជាងកន្លះលានលានអឺរ៉ូដើម្បីជួយក្រុមហ៊ុននានា កម្មករនិងប្រព័ន្ធសុខាភិបាលបន្ធូរបន្ថយផលវិបាកសេដ្ឋកិច្ចដោយសារការផ្ទុះឡើងនូវមេរោគកូរ៉ូណា។
លោក Mario Centeno ប្រធានរបស់តំបន់ប្រើប្រាក់អឺរ៉ូ បានហៅវិធានការនៃកម្មវិធីនេះថា ជាការណ៍មិនដែលធ្លាប់មានកាលពីពេលមុន។ លោកនិយាយថា «កម្មវិធីនេះត្រូវបានអនុម័តនៅថ្ងៃនេះ មានទំហំជិត៤ភាគរយនៃផលិតផលសរុបក្នុងស្រុកឬ GDP របស់អឺរ៉ុប។ ការធ្វើឲ្យមានស្ថិរភាពជាស្វ័យប្រវត្តិ ជាកម្លាំងដ៏ខ្លាំងមួយដើម្បីការពារសេដ្ឋកិច្ចអឺរ៉ុបក្នុងករណីមានវិបត្តិ។ការណ៍នេះមិនដែលមានកាលពីពេលមុនទេ។ យើង មិនដែលមានប្រតិកម្មដ៏ឆាប់រហ័សដល់វិបត្តិដូចនៅពេលនេះទេ»។
កម្មវិធីប្រាក់ជំនួយនេះ ផ្តល់ឲ្យប្រទេសអ៊ីតាលី និងអេស្ប៉ាញដែលរងផលប៉ះពាល់យ៉ាងខ្លាំងដោយមេរោគកូរ៉ូណាទទួលបានថវិកាជំនួយរបស់តំបន់ប្រើប្រាក់អឺរ៉ូរហូតដល់២៤០ពាន់លានអឺរ៉ូ និងប្រាក់ដែលត្រូវប្រើសម្រាប់តម្រូវការប្រព័ន្ធថែទាំសុខភាពរបស់ប្រទេសទាំង២។
កម្មវិធីរបស់ក្រុមប្រទេសប្រើប្រាក់អឺរ៉ូនោះ ក៏រួមបញ្ចូលទាំងប្រាក់រហូតដល់២០០ពាន់លានដុល្លារក្នុងការធានាឥណទានតាមរយៈធនាគារវិនិយោគអឺរ៉ុបដើម្បីជួយ ក្រុមហ៊ុននានាឲ្យចេញផុតពីវិបត្តិនេះ និងប្រាក់១០០ពាន់លានអឺរ៉ូដើម្បីទូទាត់ការបាត់បង់ប្រាក់ឈ្នួលរបស់ពួកកម្មករដែលត្រូវបង្ខាំងនៅផ្ទះហើយនឹងមនុស្សផ្សេងទៀតដែលត្រូវកាត់បន្ថយការងារ៕