កាលពីថ្ងៃចន្ទ ប្រទេសកូរ៉េខាងត្បូងនិងសហភាពអឺរ៉ុបបានរួមគ្នាថ្កោលទោសការផ្គត់ផ្គង់សព្វាវុធរបស់កូរ៉េខាងជើងឱ្យប្រទេសរុស្ស៊ី និងទាមទារឱ្យកូរ៉េខាងជើងដកកងទ័ពរបស់ខ្លួនដែលបានបញ្ជូនទៅកាន់ប្រទេសរុស្ស៊ី នៅពេលដែលរុស្ស៊ីកំពុងធ្វើសង្គ្រាមក្នុងប្រទេសអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។
សហភាពអឺរ៉ុបនិងប្រទេសកូរ៉េខាងត្បូងបានរៀបចំជំនួប «កិច្ចសន្ទនាយុទ្ធសាស្ត្រ» លើកដំបូងបង្អស់របស់ខ្លួននៅក្នុងទីក្រុងសេអ៊ូលនៃប្រទេសកូរ៉េខាងត្បូង ក្នុងពេលមិនយូរប៉ុន្មានបន្ទាប់ពីសហរដ្ឋអាមេរិកនិងកូរ៉េខាងត្បូងបានបង្ហាញក្ដីបារម្ភបន្ទាន់អំពីការបញ្ជូនកងទ័ពរបស់កូរ៉េខាងជើងទៅជួយរុស្ស៊ី។
នៅក្នុងសេចក្ដីថ្លែងការណ៍រួម ប្រធានគោលនយោបាយការបរទេសសហភាពអឺរ៉ុបលោក Josep Borrell និងរដ្ឋមន្ត្រីការបរទេសកូរ៉េខាងត្បូងលោក Cho Tae-yul បានថ្កោលទោស «ការបញ្ជូនសព្វាវុធខុសច្បាប់» របស់កូរ៉េខាងជើង «ទៅកាន់ប្រទេសរុស្ស៊ីដើម្បីឱ្យរុស្ស៊ីប្រើប្រាស់នៅក្នុងការវាយប្រហារលើអ៊ុយក្រែន»។
ពួកគេបានទាមទារឱ្យមានការបញ្ចប់នូវ «កិច្ចសហប្រតិបត្តិការយោធាខុសច្បាប់» នេះ និងឱ្យមានការដកចេញនូវកងទ័ពកូរ៉េខាងជើង។
ប្រទេសទាំងពីរក៏បានចុះហត្ថលេខាផងដែរលើភាពជាដៃគូផ្នែកសន្តិសុខនិងការការពារដែលផ្ដោតលើផ្នែកចំនួន ១៥ ដូចជាសន្តិសុខតាមប្រព័ន្ធអ៊ីនធឺណិតនិងការរំសាយអាវុធជាដើម៕