លោកនាយករដ្ឋមន្រ្តី ហ៊ុន សែន កាលពីថ្ងៃអាទិត្យ បានប្រកាសឲ្យចាក់វ៉ាក់សាំងបង្ការជំងឺកូវីដ១៩ដូសទី៣ដល់ប្រជាពលរដ្ឋ ដើម្បីជំរុញការការពារជំងឺកូវីដ១៩ ជាពិសេសទប់ទល់នឹងវីរុសបំប្លែងថ្មីដែលតា (Delta) ដែលក្រសួងសុខាភិបាលបានប្រកាសថាឆ្លងចូលដល់ទីក្រុងភ្នំពេញ។
លោក ហ៊ុន សែន បានប្រកាសបែបនេះនៅក្នុងពិធីបើកយុទ្ធនាការចាក់វ៉ាក់សាំងបង្ការជំងឺកូវីដ១៩ដល់មនុស្ស អាយុពី១២ឆ្នាំទៅ១៧ឆ្នាំ។
លោក ហ៊ុន សែន បានថ្លែងថាអ្នកចាក់វ៉ាក់សាំងរបស់ចិនឈ្មោះស៊ីណូហ្វាម (Sinopharm) និងស៊ីណូវ៉ាក់ (Sinovac) អាចចាក់វ៉ាក់សាំងប្រភេទអាស្រ្តាហ្សេនីកា (AstraZeneca) ដែលកម្ពុជាទទួលបានពីការផ្តល់របស់រដ្ឋាភិបាលជប៉ុនដែលត្រូវបានបញ្ជូនមកដល់កម្ពុជាមួយចំនួនហើយ និងការចូលរួមផ្តល់ដោយរដ្ឋាភិបាលចក្រភពអង់គ្លេស ដែលនឹងមកដល់នៅថ្ងៃទី៤ ខែសីហានេះ។
លោក ហ៊ុន សែន បានថ្លែងថា៖ «ម្សិលមិញខ្ញុំបានយកការសម្រេចហើយ អនុញ្ញាតឲ្យចាក់។ ហើយប្រើប្រាស់អាស្រ្តាហ្សេនីកា(AstraZeneca) ធ្វើជាដូសជំរុញ។ អ្នកដែលបានចាក់ស៊ីណូហ្វាម ស៊ីណូវ៉ាក់ ត្រូវយកអាស្រ្តាហ្សេនីកាធ្វើជាដូសជំរុញ»។
លោកបន្តថាខណៈកម្ពុជាមិនទាន់មានវ៉ាក់សាំងប្រភេទអាស្រ្តាហ្សេនីកាច្រើនគ្រប់គ្រាន់ ដូច្នេះវ៉ាក់សាំងដែលមានក្នុងស្តុក នឹងត្រូវបញ្ជូនជាបន្ទាន់ទៅចាក់ដល់អ្នកខ្សែត្រៀមជួរមុខ ជាពិសេសនៅតាមបណ្តាខេត្តជាប់ព្រំដែនថៃ ដែលមានករណីឆ្លងច្រើនប្រភេទវីរុសដែលតា។
បើតាមលោក ហ៊ុន សែន ក្រុមជួរមុខដែលនឹងត្រូវចាក់មុន អាចមានទៅដល់១លាននាក់។ លោកឲ្យដឹងទៀតថារដ្ឋាភិបាលរបស់លោកនឹងបញ្ជាទិញវ៉ាក់សាំងអាស្រ្តាហ្សេនីកាបន្ថែមទៀត ដើម្បីយកមកចាក់ជាដូសទី៣សម្រាប់ប្រជាជនដែលចាក់វ៉ាក់សាំងស៊ីណូហ្វាមនិងស៊ីណូវ៉ាក់។ លោកក៏បានបញ្ជាឲ្យសិក្សារកប្រភេទវ៉ាក់សាំងណាដែលអាចចាក់បានសម្រាប់ប្រជាពលរដ្ឋដែលបានចាក់វ៉ាក់សាំងអាស្រ្តាហ្សេនីកាដូចរូបលោកផ្ទាល់។
អាជ្ញាធរសុខាភិបាលកម្ពុជាបានឲ្យដឹងថាវីរុសប្រភេទបំប្លែងថ្មីនេះបានឆ្លងចូលទីក្រុងភ្នំពេញក្រោយពីរាលដាលនៅតាមខេត្តមួយចំនួនជាប់នឹងព្រំដែនថៃ។
រូបឯកសារ៖ ក្រុមមន្ត្រីសុខាភិបាលស្ថិតក្នុងឯកសណ្ឋានការពារពីការឆ្លងជំងឺកូវីដ១៩ បញ្ជូនអ្នកជំងឺកូវីដ១៩ មកទទួលការព្យាបាលនៅមណ្ឌលព្យាបាល នៅកោះពេជ្រ រាជធានីភ្នំពេញ ថ្ងៃទី១៥ ខែមេសា ឆ្នាំ២០២១។ (ហ៊ាន សុជាតា/វីអូអេ)
ក្រសួងសុខាភិបាលនៅថ្ងៃចន្ទនេះបានចេញផ្សាយសេចក្តីប្រកាសព័ត៌មានមួយ ដោយបញ្ជាក់ថាអាជ្ញាធរបានរកឃើញករណីវីរុសកូវីដថ្មី ដែលតា (Delta) ជាលើកដំបូងក្នុងរាជធានីភ្នំពេញ ដែលនៅថ្ងៃទី៣១ ខែកក្កដារកឃើញ១ករណីលើពលករមកពីថៃនៅមណ្ឌលព្យាបាលសែនសុខរាជធានីភ្នំពេញ និងថ្ងៃទី១ ខែសីហា រកឃើញ៤ករណីនៅមន្ទីរពេទ្យកាល់ម៉ែត្រ និងមន្ទីរពេទ្យមិត្តភាពខ្មែរ-សូវៀត ដែលកើតលើបុគ្គលិកអនាម័យមន្ទីរពេទ្យម្នាក់ និងអ្នកជំងឺមកសម្រាកព្យាបាល។
ក្រសួងសុខាភិបាលបានឲ្យដឹងថាគ្រាន់តែរយៈពេល២ថ្ងៃចុងក្រោយនេះ អាជ្ញាធររកឃើញករណីឆ្លងវីរុសបំប្លែងថ្មីចំនួន១០៩នាក់នៅទូទាំងប្រទេស។
លោក ហែន កន ចៅសង្កាត់បឹកកក់ទី២នៃសង្កាត់បឹងសាឡាង ក្នុងខណ្ឌទួលគោក បានប្រាប់វីអូអេនៅថ្ងៃចន្ទនេះថាភូមិទី៥ក្នុងសង្កាត់បឹងសាឡាងត្រូវបានបិទខ្ទប់ជាបណ្តោះអាសន្ននៅថ្ងៃចន្ទនេះ ដោយរកឃើញអ្នកវិជ្ជមានកូវីដ១៩វីរុសបំប្លែងថ្មីដែលតាចំនួន៥នាក់ ក្នុងចំណោមអ្នកប៉ះពាល់ប្រយោលជាង៣០០នាក់ដែលត្រូវបានយកសំណាក។ លោកបន្ថែមថាអ្នកឆ្លងថ្មីទាំងនេះមានពាក់ព័ន្ធជាមួយចុងភៅដាំបាយនៅមន្ទីរពេទ្យមិត្តភាពខ្មែរ-សូវៀតដែលត្រូវបានពិនិត្យឃើញវិជ្ជមានដែលតាកាលពីថ្ងៃអាទិត្យ។
អ្នកស្រី ឱ វណ្ណឌីន រដ្ឋលេខាធិការនិងជាអ្នកនាំពាក្យរបស់ក្រសួងសុខាភិបាល បានថ្លែងប្រាប់សារព័ត៌មានFresh Newsកាលពីព្រឹកថ្ងៃចន្ទថាការឆ្លងវីរុសថ្មីដែលតានេះ បានចាប់ផ្តើមចូលក្នុងសហគមន៍ជាដុំៗ ដែលវាជាការព្រួយបារម្ភ ប្រសិនបើមានការឆ្លងរីកសាយទ្រង់ទ្រាយធំក្នុងសហគមន៍ដែលនឹងអាចមានការបិទខ្ទប់រាជធានីភ្នំពេញសាជាថ្មី។
អ្នកស្រីថ្លែងថា៖ «នៅក្នុងដំណាក់កាលនេះ យើងត្រូវតែប្រុងប្រយ័ត្នទាំងអស់គ្នា កុំឲ្យគិតថាមិនអីទេៗ។ ធម្មតាទេ ដែលវាមិនមានហេតុការអីទេ។ នេះជាការយល់ឃើញមួយដែលនាំយើងទាំងអស់គ្នាឆ្ពោះទៅរកជ្រោះមរណៈនៃមហន្តរាយសុខភាពសាធារណៈក៏ដូចជាមហន្តរាយនៃសេដ្ឋកិច្ចគ្រួសារក៏ដូចសេដ្ឋកិច្ចសង្គមជាតិរបស់យើងហើយ»។
កាលពីសប្តាហ៍មុន រដ្ឋបាលរាជធានីភ្នំពេញ បានផ្អាកជាបណ្តោះអាសន្ននូវសកម្មភាពការងារមុខរបរឬអាជីវកម្មដែលមានហានិភ័យខ្ពស់នៃការឆ្លង ផ្អាកការជួបជុំឬការប្រមូលផ្តុំមនុស្សជាលក្ខណៈឯកជនដែលមានមនុស្សលើសពី១០នាក់រយៈពេល២សប្តាហ៍ គឺរហូតដល់ថ្ងៃទី១២ ខែសីហា។
រដ្ឋបាលរាជធានីភ្នំពេញក៏បានដាក់បម្រាមគោចរដោយផ្អាកជាបណ្តោះអាសន្ននូវរាល់ការធ្វើចរាចរណ៍ និងរាល់សកម្មភាពការងារមុខរបរឬអាជីវកម្ម នៅចន្លោះម៉ោង៩យប់ដល់ម៉ោង៣ទៀបភ្លឺ។
វីអូអេមិនទាន់អាចសុំការអត្ថាធិប្បាយពីអ្នកនាំពាក្យសាលារាជធានីភ្នំពេញ លោក ម៉េត មាសភក្តី បានទេនាថ្ងៃចន្ទនេះ។
លោកយង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍនិងសន្តិភាពប្រាប់វីអូអេនៅថ្ងៃចន្ទនេះថាលោកមានការព្រួយបារម្ភអំពីការរីករាលដាលជំងឺកូវីដ១៩ខ្លាំងក្លាបន្តទៀតនៅកម្ពុជា ខណៈវីរុសបំប្លែងថ្មីកំពុងរាលដាលក្នុងទីក្រុង។ លោកជំរុញឲ្យអាជ្ញាធរត្រូវតែអនុវត្តវិធានការឲ្យបានតឹងរ៉ឹង ដើម្បីកុំឲ្យមានហានិភ័យណាមួយកើតឡើង។
លោកថ្លែងថា៖ «យើងឃើញថាមកដល់ពេលនេះកម្ពុជាក៏ចាប់ផ្តើមមានវីរុសដែលតាហ្នឹងនៅតាមបណ្តាខេត្តផ្សេងៗ រួមទាំងរាជធានីភ្នំពេញផង ហើយក៏វាជាក្តីព្រួយបារម្ភខ្លាំង។ នេះជាចំនួនដែលយើងរកឃើញ ហើយចុះចំនួនមិនអាចរកឃើញតើវានឹងមានការចម្លងកន្លែងណាខ្លះទៀត? អាហ្នឹងជារឿងសំខាន់ ពីព្រោះយើងអត់ដឹងថាមានអ្នកដែលចេញចូល អ្នកដែលមានវីរុសដែលតាហ្នឹង ដែលគាត់មានការឆ្លងហ្នឹងគាត់បានទៅពេទ្យ ឬគាត់បានទៅពេទ្យពិនិត្យបានត្រឹមត្រូវ»។
លោកបន្តថាប្រសិនបើមានការបិទខ្ទប់សាជាថ្មីនៅតំបន់ដែលមានការឆ្លងរីករាលដាលនៃវីរុសដែលតានេះ ជាការល្អ ប៉ុន្តែអាជ្ញាធរត្រូវតែផ្គត់ផ្គង់ និងជួយទំនុកបម្រុងតម្រូវការរបស់ប្រជាពលរដ្ឋដែលជួបផលលំបាកដោយសារជំងឺនេះ។ លោកក៏ជំរុញឲ្យអាជ្ញាធរផ្សព្វផ្សាយដល់ប្រជាពលរដ្ឋក្នុងការត្រៀមខ្លួនជាមុនយ៉ាងហោចណាស់២ឬ៣ថ្ងៃ ដើម្បីអាចឲ្យប្រជាពលរដ្ឋដែលមានលទ្ធភាពក្នុងការទិញសម្ភារៈប្រើប្រាស់ ឬស្បៀងបម្រុងទុក មុននឹងបិទខ្ទប់ទីក្រុង។
លោកថ្លែងថា៖ «រដ្ឋត្រូវតែត្រៀមលក្ខណៈដែរដើម្បីឲ្យមានការបិទខ្ទប់។ ប្រសិនបើយើងហ៊ានលះបង់បញ្ហាសេដ្ឋកិច្ចក្នុងរយៈពេលខ្លី អាហ្នឹងយើងអាចសង្គ្រោះស្ថានភាពនេះបាន។ ត្រូវតៀមលក្ខណៈបែបម៉េច? គឺត្រូវតៀមលក្ខណៈក្នុងការដោះស្រាយជីវភាពរបស់ប្រជាពលរដ្ឋនៅក្នុងខណៈការបិទខ្ទប់បាទ។ សំខាន់បំផុតមនុស្ស គ្មានអីក្រៅពីការហូបចុកនោះទេ។ បើសិនជាគាត់អាចមានស្បៀងមានអ្វីសម្រាប់ទុកបម្រុងសម្រាប់ការហូបចុកហើយ គឺមិនជាបញ្ហាទេ។ ហើយឬរដ្ឋបានផ្គត់ផ្គង់ស្បៀងអាហារសម្រាប់ក្រុមដែលងាយរងគ្រោះ ដែលគាត់ប្រឈម»។
គួរបញ្ជាក់ថាអ្នកជំនាញបានលើកឡើងកាលពីកន្លងទៅថាវ៉ាក់សាំងមួយចំនួន រួមមានស៊ីណូវ៉ាក់ ស៊ីណូហ្វាម និងអាស្រ្តាហ្សេនីកា ដែលកម្ពុជាបានប្រើប្រាស់សម្រាប់ចាក់ដល់ប្រជាពលរដ្ឋ មិនមានប្រសិទ្ធភាពគ្រប់គ្រាន់នៅឡើយទេ ដើម្បីទប់ទល់នឹងវីរុសបំប្លែងថ្មីដែលតា។ ការចាក់វ៉ាក់សាំងដូសទី៣បន្ថែមទៀត ត្រូវបានស្នើដោយក្រុមអ្នកជំនាញដែលសិក្សាលើប្រសិទ្ធភាពវ៉ាក់សាំង៕