រដ្ឋាភិបាលកម្ពុជា បានកំណត់ឲ្យជនបរទេសនិងពលរដ្ឋខ្មែរដែលចូលមកប្រទេសកម្ពុជា ហើយបានចាក់វ៉ាក់សាំងការពារជំងឺកូវីដ១៩រួចរាល់ ត្រូវធ្វើចត្តាឡីស័កនៅកន្លែងរៀបចំដោយអាជ្ញាធរ យ៉ាងយូរត្រឹមតែ៧ថ្ងៃតែប៉ុណ្ណោះ។ ប៉ុន្តែអ្នកដំណើរតម្រូវឲ្យបង្ហាញឯកសារពាក់ព័ន្ធនិងតម្រូវឲ្យកក់សណ្ឋាគារ និងត្រៀមប្រាក់ប្រមាណ១ពាន់ដុល្លារសម្រាប់ធ្វើចត្តាឡីស័កនេះ។ នេះបើតាមសេចក្តីសម្រេចថ្មីមួយរបស់ក្រសួងសុខាភិបាលកម្ពុជា ដែលចេញផ្សាយកាលពីចុងសប្តាហ៍។
ការសម្រេចកាត់បន្ថយការធ្វើចត្តាឡីស័កមកត្រឹមយ៉ាងយូរតែ៧ថ្ងៃនេះ ក្រសួងសុខាភិបាលបានឲ្យដឹងថា កម្ពុជាកំពុងសម្រេចបាននូវអាត្រានៃការចាក់វ៉ាក់សាំងលើគោលដៅដែលបានគ្រោងទុក ដែលអាចបង្កើតនូវភាពស៊ាំសហគមន៍នៅទូទាំងកម្ពុជា ក្នុងការទប់ទល់ការឆ្លងរាលដាលនៃជំងឺកូវីដ១៩។
សេចក្តីជូនដំណឹងរបស់ក្រសួងសុខាភិបាលឲ្យដឹងថា៖ «ដោយមើលឃើញពីការវិវត្តកាន់តែប្រសើរឡើងនៃស្ថានភាពជាក់ស្តែង រាជរដ្ឋាភិបាលកម្ពុជា សម្រេចបើកប្រទេសកម្ពុជាឡើងវិញជាបណ្តើរៗ និងតាមដំណាក់កាលជាមួយនឹងភាពប្រយ័ត្នប្រយែង និងការទទួលខុសត្រូវខ្ពស់ តាមគន្លងប្រក្រតីភាពថ្មី ដោយមានការសម្រួលរបបនៃការធ្វើចត្តាឡីស័កសម្រាប់អ្នកដំណើរមកកម្ពុជា តាមគ្រប់ច្រកចូល ដែលទទួលបានការចាក់វ៉ាក់សាំងដូសមូលដ្ឋានបានពេញលេញ»។
ក្រសួងសុខាភិបាលបានកំណត់ការធ្វើចត្តាឡីស័ក សម្រាប់អ្នកដំណើរដែលបានចាក់វ៉ាក់សាំងពេញលេញ នូវលក្ខខណ្ឌមួយចំនួនដូចជាចំពោះ មន្ត្រីការទូតបរទេស (Visa A) និងមន្ត្រីអនុវត្តគម្រោងសហប្រតិបត្តិការផ្លូវការ (Visa B) និងក្រុមគ្រួសារ ត្រូវអនុវត្តវិធានការចត្តាឡីស័កចំនួន៣ថ្ងៃ។ ចំពោះអ្នកដំណើរបរទេសចូលមកកម្ពុជាទាំងអស់ត្រូវមានការធានា ឬការអញ្ជើញពីដៃគូក្នុងស្រុកដែលជានីតិបុគ្គលស្របច្បាប់ ដែលមានការចុះបញ្ជី និងបង់ពន្ធត្រឹមត្រូវនៅកម្ពុជា ហើយត្រូវធ្វើចត្តាឡីស័កចំនួន ៣ថ្ងៃដូចគ្នា។
ចំណែកឯអ្នកដំណើរជាជនជាតិខ្មែរ និងជនបរទេសទូទៅ ដូចជាអ្នកវិយោគគិន បុគ្គលិកជំនាញបច្ចេកទេស និងក្រុមគ្រួសារ ត្រូវធ្វើចត្តាឡីស័ករយៈពេល៧ថ្ងៃ ក្នុងករណីអវិជ្ជមានកូវីដ១៩ ដោយប្រើឧបករណ៍ Rapid test ក្នុងដំណាកកាលដំបូង។
ក្រសួងសុខាភិបាលក៏តម្រូវឲ្យអ្នកដំណើរជនជាតិខ្មែរ និងជនជាតិបទេសកក់សណ្ឋាគារសម្រាប់ធ្វើចត្តាឡីស័ក។ ប៉ុន្តែក្នុងករណីអ្នកដំណើរចូលមកកម្ពុជាមិនបានកក់សណ្ឋាគារ តម្រូវឲ្យត្រៀមសាច់ប្រាក់ចំនួន៦០០ដុល្លារ ទៅ១ពាន់ដុល្លារអាមេរិក ដើម្បីតម្កល់នៅច្រកចូលកម្ពុជា សម្រាប់ធានាការចំណាយទាំងអស់ពាក់ព័ន្ធនឹងការធ្វើចត្តាឡីស័កក្នុងពេលមកដល់កម្ពុជា។ អ្នកដំណើរចូលមកទាំងអស់ត្រូវបង្ហាញឯកសារពាក់ព័ន្ធ ដូចជាវិញ្ញាបនបត្របញ្ជាក់ថាគ្មានជំងឺកូវីដ១៩ បណ្ណចាក់វ៉ាក់សាំង ឯកសារកក់សណ្ឋាគារសម្រាប់ធ្វើចត្តាឡីស័ក និងបណ្ណធានារ៉ាប់រងសុខភាពសម្រាប់ព្យាបាលជំងឺកូវីដ១៩ពីក្រុមហ៊ុនធានារ៉ាប់រងហ្វតតេជាដើម។
ប៉ុន្តែក្នុងករណីអ្នកដំណើរគ្មានលទ្ធភាពបង់ថ្លៃសេវាចត្តាឡីស័កនៅសណ្ឋាគារ អ្នកដំណើរត្រូវធ្វើចត្តាឡីស័កនៅតាមទីតាំងដែលកំណត់ដោយរដ្ឋាភិបាល ដែលរាល់ការចំណាយជាបន្ទុករបស់រដ្ឋ។
ម្យ៉ាងទៀត ពលរដ្ឋខ្មែរ អាចស្នើសុំធ្វើចត្តាឡីស័កនៅផ្ទះរបស់ខ្លួនបាន ដោយប្រាប់ខាងអនុគណៈកម្មការគ្រប់គ្រងច្រកទ្វារចេញចូលប្រទេស និងការធ្វើចត្តាឡីស័ក ឲ្យបានយ៉ាងតិច៣ថ្ងៃមុនមកដល់កម្ពុជា ហើយអាជ្ញាធរនឹងត្រួតពិនិត្យ ដើម្បីសម្រេចថាអនុញ្ញាតឬបដិសេធការស្នើសុំ។
សណ្ឋាគារដែលក្រសួងសុខាភិបាលដាក់សម្រាប់កក់ធ្វើចត្តាឡីស័ក រួមមានសណ្ឋាគារសុខាភ្នំពេញ សណ្ឋាគារ Courtyard by Marriott សណ្ឋាគារ Raffles Hotel Le Royal សណ្ឋាគារ Sofitel និងសណ្ឋាគារ Himawari ជាដើម។
បើតាមគេហទំព័ររបស់សណ្ឋាគារ សម្រាប់ធ្វើចត្តាឡីស័ក១៤ថ្ងៃ នៅសណ្ឋាគារ Raffles Hotel Le Royal មានតម្លៃចាប់ពី ២.៤២៦ ដុល្លារសហរដ្ឋអាមេរិក។ ចំណែកសណ្ឋាគារ Sofitel Phnom Penh តម្លៃចាប់ពី ២.៩៨០ ដុល្លារអាមេរិកឡើងទៅ។ ប៉ុន្តែតម្លៃថ្មីនៃការធ្វើចត្តាឡីស័ករយៈពេលខ្លី ដូចជា៧ថ្ងៃក្តី មិនទាន់មានការកំណត់នៅឡើយទេ។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ប្រាប់វីអូអេនៅថ្ងៃចន្ទថា ការសម្រេចរបស់ក្រសួងសុខាភិបាលតម្រូវឲ្យអ្នកធ្វើដំណើរចូលមកកម្ពុជាធ្វើចត្តាឡីស័ករយៈពេលខ្លីជាងមុន ត្រឹមតែរយៈពេល៧ថ្ងៃបែបនេះ គឺជាការល្អ ដែលអាចធ្វើឲ្យភ្ញៀវទេសចរអាចនឹងពិចារណាក្នុងការមកដើរកម្សាន្ត ជាពិសេសអាចជួយដល់ក្រុមហ៊ុនអាកាសចរណ៍មានដំណើរការឡើងវិញខ្លះ។ ប៉ុន្តែអ្នកស្រីថា ការដាក់តែសណ្ឋាគារធំៗក្នុងបញ្ជីសម្រាប់ចត្តាឡីស័ក អាចធ្វើឲ្យអ្នកដំណើរ ឬភ្ញៀវទេសចររារែកចិត្ត។
អ្នកស្រីថ្លែងថា៖ «ប្រសិនបើក្រសួងសុខាភិបាល អាចពិចារណានៅក្នុងជ្រើសរើស ៣ [ឬ] ៤សណ្ឋាគារទៀត សម្រាប់ថ្នាក់រៀងទាបជាងហ្នឹងទៅ ដើម្បីឲ្យភ្ញៀវគេ អាចកក់មុនបាន។ អ៊ីចឹងកុំឲ្យគ្នាក្រឡេកមើលទៅឃើញតែសណ្ឋាគារផ្កាយធំៗពេក ឲ្យវាមានជម្រើស អ៊ីចឹងក៏ម៉្យាងដែរ។ ជួនកាលភ្ញៀវអត់យល់ទេ កាលណាអត់ឃើញជម្រើសនៅក្នុងការកក់អ៊ីចឹង គាត់ក៏អត់យល់ដែរ គាត់គិតថា ទៅ[ប្រទេសកម្ពុជា] ត្រូវតែចំណាយប៉ុណ្ណឹង»។
អ្នកស្រីរំពឹងថា ភ្ញៀវទេសចរ នឹងអាចកើនឡើងផងដែរ ប្រសិនកម្ពុជាកាត់បន្ថយចំនួនថ្ងៃធ្វើចត្តាឡីស័ក និងមិនមានការឹតត្បិតខ្លាំងដូចមុន។
វីអូអេមិនទាន់អាចសុំការអត្ថាធិប្បាយពីអ្នកស្រី ឱ វណ្ណឌីន និងអ្នកស្រី យក់ សម្បត្តិ អ្នកនាំពាក្យក្រសួងសុខាភិបាលបាននៅឡើយទេ។
លោក យង់ គិមអេង ប្រធានមជ្ឈមណ្ឌលដើម្បីអភិវឌ្ឍន៍និងសន្តិភាព បានប្រាប់វីអូអេថា ការកំណត់ឲ្យអ្នកដំណើរធ្វើចត្តាឡីស័កក្នុងរយៈពេលខ្លី ជារឿងល្អ ប៉ុន្តែយន្តការនេះក៏នៅមិនទាន់អាចទាក់ទាញភ្ញៀវទេសចរមកលេងកម្ពុជាបានច្រើនដែរ ដោយសារតែតម្លៃក្នុងធ្វើចត្តាឡីស័ក នៅមានកម្រិតខ្ពស់ ដែលក្រសួងសុខាភិបាលគួរតែផ្តល់ជម្រើសបន្ថែមទៀតដល់អ្នកទេសចរ។
លោកថ្លែងថា៖ «ហើយអាចឲ្យជម្រើសគេទៅ។ អ្នកឯង[អ្នកទេសចរ] ទៅស្នាក់នៅកន្លែងនេះ មានតម្លៃ៥ដុល្លារ ១០ដុល្លារ ឬក៏២០ដុល្លារ ៣០ដុល្លារ ៤០ដុល្លារ ដល់១០០ជាង[ហើយ] អ្នកណាគេចង់ទៅ[ស្នាក់នៅកន្លែងចត្តាឡីស័ក]១០០ជាងឲ្យគេទៅ[ស្នាក់នៅកន្លែង]១០០ជាងហ្នឹងទៅ អ្នកចង់ចង់មកកន្លែងតម្លៃធូរថ្លៃ អ៊ីចឹងមកតម្លៃធូរថ្លៃអ៊ីចឹងទៅ។ អ៊ីចឹងយើងត្រូវតែរៀបចំ Hotel ផ្ទះសំណាក់ទាំងអស់ហ្នឹង ដើម្បីធ្វើយ៉ាងណាឲ្យគោរពទៅតាមស្តង់ដាសុខាភិបាល ហើយក៏មានការចូលរួមអនុវត្តវិធានការសុខាភិបាល»។
គួរបញ្ជាក់ថា ក្រសួងសុខាភិបាលបានរកឃើញករណីឆ្លងកូវីដ១៩ថ្មីសម្រាប់ថ្ងៃទី១៧ ខែតុលា ចំនួន១៩៥នាក់ ដែលក្នុងនោះមាន២២នាក់ជាករណីនាំចូលពីក្រៅប្រទេស៕