រដ្ឋាភិបាលកំពុងយកការធ្វើដំណើរកម្សាន្តរបស់មហាជនទូទាំងប្រទេសអំឡុងពេលឈប់សម្រាកបុណ្យភ្ជុំបិណ្ឌក្នុងសប្ដាហ៍នេះ ដើម្បីពិសោធស្ថានភាពឆ្លងកូវីដ១៩ឈានទៅបើកប្រទេសឡើងវិញ។ នេះបើយោងតាមលោកនាយករដ្ឋមន្ត្រី ហ៊ុន សែន។
ការពិសោធសុវត្ថិភាពសុខភាពសាធារណៈនេះកើតមានឡើងមួយសប្ដាហ៍បន្ទាប់ពីនាយករដ្ឋមន្ត្រីវ័យ៦៩ឆ្នាំរូបនេះបានបញ្ជាស្ងាត់ៗដល់មន្ត្រីថ្នាក់ក្រោមឱ្យផ្លាស់ប្ដូរយុទ្ធសាស្ត្រនៃការធ្វើតេស្ដរហ័ស ដែលនាំឱ្យរបាយការណ៍ឆ្លងកូវីដ១៩បានធ្លាក់ចុះយ៉ាងគំហុកជាប់ៗគ្នានារយៈពេល៧ថ្ងៃចុងក្រោយ។
លោក ហ៊ុន សែន លើកឡើងថាបើសិនជាស្ថានភាពឆ្លងរាលដាលជំងឺកូវីដ១៩មានសភាពធ្ងន់ធ្ងរក្រោយភ្ជុំបិណ្ឌនោះក៏រដ្ឋាភិបាលបានត្រៀមទប់ទល់ដោះស្រាយផលប៉ះពាល់នានា។ ប៉ុន្តែបើស្ថានភាពមិនអាក្រក់ធ្ងន់ធ្ងរនោះឱកាសនឹងមានច្រើនដើម្បីបើកប្រទេសឲ្យបានលឿននិងស្តារសកម្មភាពសង្គមសេដ្ឋកិច្ចទាំងមូលឡើងវិញ។
ក្នុងសារសំឡេងមួយផ្ញើជូនប្រជាជាតិកាលពីថ្ងៃទី០៦ខែតុលាលោក ហ៊ុន សែន ថ្លែងដូច្នេះថា៖ «យើងនឹងតាមដានពិនិត្យអំពីបញ្ហានេះដែលចេញពីការសាកល្បងរបស់យើងដែលមិនមែនជាការសាកល្បងដោយប្រថុយប្រថានទេក៏ប៉ុន្តែក៏មិនមែនជាការច្បាស់លាស់១០០%ថាវាគ្មានបញ្ហានោះដែរ»។
លោកបានបន្ថែមថា៖ «ការសាកល្បងលើកនេះ គឺជាការសាកល្បងដ៏ធំ រវាងមហន្តរាយ និងសុវត្ថិភាព»។
នាយករដ្ឋមន្ត្រីដែលកាន់អំណាចយូររូបនេះ បានហៅការពិសោធនេះថាជា«ការសាកល្បងធំណាស់»សម្រាប់កម្ពុជា តែអាចធ្វើបានដោយអាស្រ័យលើអត្រាចាក់វ៉ាក់សាំងខ្ពស់នៅក្នុងប្រទេសដែលមានមហាជនប្រមាណ៨៤%បានទទួលថ្នាំបង្ការជំងឺកូវីដ១៩។
លោកបន្តថា៖ «ការសាកល្បងមិនមែនយកជីវិតប្រជាជនទៅធ្វើការប្រថុយប្រថាននឹងគ្រោះថ្នាក់ទេ ក៏ប៉ុន្តែ ដោយសារតែជឿទុកចិត្ត ទៅលើការចូលរួមរបស់ប្រជាជនហើយបូករួមនឹងការណ៍ដែលយើងបានចាក់វ៉ាក់សាំង យើងក៏អនុញ្ញាតឱ្យប្រជាពលរដ្ឋរបស់យើង បានធ្វើដំណើរកម្សាន្ត»។
លោក ហ៊ុន សែន ក៏បានបញ្ជាក់ផងដែរថា លទ្ធផលមិនធ្ងន់ធ្ងរក្រោយភ្ជុំបិណ្ឌនឹងអនុញ្ញាតឱ្យមានលទ្ធភាពនៃដំណើរទេសចរណ៍ក្នុងស្រុក នាពេលបុណ្យអុំទូកនៅខែក្រោយនិងការទទួលយកភ្ញៀវទេសចរពីបរទេសដែលបានចាក់ថ្នាំបង្ការរួចរាល់ផងដែរ តែលោកមិនបញ្ជាក់ពេលទេ។
កម្ពុជាបានផ្អាកផ្ដល់ទិដ្ឋាការដល់ទេសចរបរទេសតាំងតែពីដើមឆ្នាំ២០២០ ដែលនាំឱ្យវិស័យទេសចរណ៍បានដាំក្បាលចុះ។
យ៉ាងណាក៏ដោយរដ្ឋាភិបាលមិនមានគម្រោងរៀបចំពិធីបុណ្យអុំទូកនៅភ្នំពេញ នៅខែវិច្ឆិកាខាងមុខនោះទេ។ នេះបើតាមលោក ហ៊ុន សែន។
កាលពីថ្ងៃទី២៥ខែកញ្ញាលោក ហ៊ុន សែនទទួលស្គាល់ថាលោកមានការ«ធ្វេសប្រហែស»ក្នុងការគ្រប់គ្រងជំងឺឆ្លងកូវីដ១៩ដែលបណ្ដាលឱ្យមានការឆ្លងវីរុសនេះតាមវត្តអារាមក្នុងរាជធានីភ្នំពេញនារយៈពេលពីរទៅបីថ្ងៃដំបូងនៃពិធីបុណ្យកាន់បិណ្ឌ។
តែបន្ទាប់មកទៀត ពោលគឺក្នុងសប្ដាហ៍មុន លោកបានណែនាំមន្ត្រីក្រោមឱវាទឱ្យបញ្ឈប់ការដាក់ពង្រាយក្រុមគ្រូពេទ្យដើរធ្វើតេស្ដរហ័សរុករកអ្នកកើតជំងឺកូវីដ១៩។
ក្នុងសារសំឡេងថ្ងៃទី២៩ខែកញ្ញាផ្ញើជូនតែមន្ត្រីរដ្ឋដែលមានតួនាទីប្រយុទ្ធនឹងកូវីដ១៩នោះ និងដែលវីអូអេទទួលបានលោក ហ៊ុន សែន បានលើកឡើងថា៖ «បើយើងរុករកបន្តទៀត យើងរៀនរស់ជាមួយកូវីដ១៩មិនបានទេ។ អាផ្ដាសាយក៏វាសង្ស័យទៅហ្នឹងក្នុងពេលដែលប្រជាជនអត់មានឈឺអ្វីទាំងអស់ អត់មានដឹងថាខ្លួនឈឺទាំងអស់ ដល់តែធ្វើ Rapid Test (តេស្ដរហ័ស) ចេញមកសុទ្ធតែវិជ្ជមាន»។
លោកហ៊ុន សែន បានបន្តឱ្យដឹងក្នុងសារសំឡេងថ្ងៃទី២៩ខែកញ្ញាដដែលនោះចំនួនអ្នកស្លាប់ដោយកូវីដ១៩ ជាង២ភាគ៣ ជាអ្នកមិនទាន់បានចាក់វ៉ាក់សាំង។
បន្ទាប់ពីការបញ្ជារបស់លោកហ៊ុន សែន មកទិន្នន័យប្រចាំថ្ងៃរបស់ក្រសួងសុខាភិបាលអំពីចំនួនអ្នកឆ្លងកូវីដ១៩បានបញ្ជាក់ដកស្រង់តែលទ្ធផលតេស្ដបញ្ជាក់ដោយមន្ទីរពិសោធន៍។
អត្រាឆ្លងដែលក្រសួងសុខាភិបាលបានប្រកាសចន្លោះពីថ្ងៃទី២៤ខែកញ្ញា ដល់ថ្ងៃទី៣០ខែកញ្ញាមានសរុប ៦.០៣២ករណី ដែលជាមធ្យមក្នុងមួយថ្ងៃមាន៨៦១ករណី។ តែនៅចន្លោះពីថ្ងៃទី០១ខែតុលាដល់ថ្ងៃទី០៧ខែតុលាអត្រាឆ្លងសរុបមាន១.៤៩៧ករណីដែលជាមធ្យមក្នុងមួយថ្ងៃមាន២១៣នាក់។
គិតត្រឹមថ្ងៃទី០៧ខែតុលាឆ្នាំ២០២១នេះ កម្ពុជាមានចំនួនអ្នកស្លាប់ដោយកូវីដ១៩ឡើងដល់២.៤៤១នាក់និងមានករណីឆ្លងសរុបឡើងដល់១១៤.១៤៨នាក់។
ទាក់ទិននឹងទេសចរណ៍ក្នុងស្រុកអំឡុងបុណ្យភ្ជុំបិណ្ឌនេះក្រសួងទេសចរណ៍បានបញ្ជាក់ថាមានមនុស្សប្រមាណជិតកន្លះលាននាក់ បានចេញធ្វើដំណើរកម្សាន្តកាលពីថ្ងៃអង្គារទី០៥និងថ្ងៃទី០៦ខែតុលា ឆ្នាំ២០២១នេះ។
ភាពណែនកុះករដោយភ្ញៀវទេសចរក្នុងស្រុកដែលរហូតដល់ក្រសួងសុខាភិបាលចេញមុខព្រមាន នៅឯរមណីយដ្ឋានអន្លង់ជ្រៃ ក្នុងខេត្តត្បូងឃ្មុំបាននាំឱ្យអាជ្ញាធរខេត្តសម្រេចបិទទីតាំងនោះដោយបណ្ដោះអាសន្នកាលពីថ្ងៃទី០៦ខែតុលាកន្លងទៅ។
អ្នកស្រីវេជ្ជបណ្ឌិត Li Ailan តំណាងប្រចាំកម្ពុជាឱ្យអង្គការសុខភាពពិភពលោកបានប្រាប់វីអូអេថា ភ្ជុំបិណ្ឌជាកាលវេលាដ៏សក្តិសមសម្រាប់ការសាកល្បងជីវភាពរស់នៅជាមួយកូវីដ១៩ តែបានព្រមានថាបើការបើកឡើងវិញប្រញាប់ប្រញាល់ទាំងមហាជនមិនចូលរួមអនុវត្តវិធានការអនាម័យនោះនោះការផ្ទុះឆ្លងនឹងវិលត្រឡប់ហើយមន្ទីរពេទ្យនឹងជន់ជោរដោយអ្នកជំងឺសាជាថ្មី។
អ្នកជំនាញរូបនេះបន្តថា អង្គការសុខភាពពិភពលោក ក៏បាននឹងកំពុងគាំទ្រវិធានការរបស់កម្ពុជា ក្នុងការផ្លាស់ប្ដូរយុទ្ធសាស្ត្រនៃការធ្វើតេស្ដពីការតេស្ដដោយមិនរើសមុខ មកជាការធ្វើតេស្ដតែទៅលើគោលដៅសង្ស័យច្បាស់លាស់និងក្រុមប្រឈមខ្ពស់វិញ៕
