អ្នកតំណាងរាស្ត្រមួយក្រុមបានស្នើសុំឱ្យរាជរដ្ឋាភិបាលកម្ពុជាបញ្ឈប់សកម្មភាពក្រុមហ៊ុនដ៏មានឥទ្ធិពលចំនួនពីរដែលពួកគេចោទប្រកាន់ថា បានធ្វើសកម្មភាពកាប់បំផ្លាញព្រៃឈើនៅក្នុងភូមិសាស្ត្រឧទ្យានជាតិវីរៈជ័យ តំបន់កន្ទុយនាគក្នុងខេត្តរតនគិរី។
នៅក្នុងលិខិតមួយផ្ញើជូនទៅលោកនាយករដ្ឋមន្ត្រី ហ៊ុន សែន ហើយត្រូវបានចែកផ្សាយនៅថ្ងៃពុធនេះក្រុមអ្នកតំណាងរាស្ត្រជាង២០រូបនៃគណបក្សសង្គ្រោះជាតិបានចោទប្រកាន់ថាក្រុមហ៊ុនទ្រីភាពនិងក្រុមហ៊ុន អានម៉ារ៉ាឌី «កំពុងតែធ្វើអាជីវកម្មកាប់បំផ្លាញនិងដឹកជញ្ជូនឈើយ៉ាងអនាធិបតេយ្យ»។
លិខិតដែលមានការចុះហត្ថលេខានិងបោះត្រាយល់ព្រមរបស់លោកហេង សំរិនប្រធានរដ្ឋសភាបានបន្ថែមថា៖ «បច្ចុប្បន្ននេះព្រៃឈើនៅក្នុងឧទ្យានជាតិវិរៈជ័យ តំបន់កន្ទុយនាគកំពុងតែប្រឈមយ៉ាងខ្លាំងពីការបំផ្លាញនិងឈានទៅរកវិនាសកម្មព្រៃឈើដោយសារតែ ក្រុមហ៊ុនទាំងពីរ។ ប្រសិនបើគ្មានការទប់ស្កាត់ទាន់ពេលវេលានោះទេព្រៃឈើនៅក្នុងតំបន់នោះនឹងត្រូវបាត់បង់ទាំងស្រុងនាពេលដ៏ខ្លីខាងមុខ»។
លោក ម៉ៅ មុន្នីវណ្ណ អ្នកតំណាងរាស្ត្រនៃគណបក្សសង្គ្រោះជាតិនិងជាអ្នកដែលបានចុះហត្ថលេខាលើលិខិតនោះព្រមទាំងបានធ្វើដំណើរចុះទៅពិនិត្យនៅឧទ្យានជាតិដោយផ្ទាល់កាលពីខែមិថុនាបានប្រាប់វីអូអេថា លោកបានឃើញសកម្មភាពនោះ ដោយផ្ទាល់និងបានជួបឧបសគ្គជាច្រើនដែលបុគ្គលិកក្រុមហ៊ុនបានបង្កឡើងដើម្បីរារាំងសកម្មភាពរបស់ក្រុមអ្នកតំណាងរាស្ត្រ។
មន្ត្រីរដ្ឋាភិបាលកម្ពុជានិងតំណាងក្រុមហ៊ុនទាំងពីរដែលទទួលរងការចោទប្រកាន់នេះមិនទាន់មានប្រតិកម្មណាមួយនៅឡើយទេ៕