កាលពីថ្ងៃច័ន្ទ ពួកប៉ូលីសបាននិយាយថា ការបំផ្ទុះគ្រាប់បែកពីរបានបណ្តាលឲ្យមនុស្សយ៉ាងតិចណាស់១៥នាក់ស្លាប់នៅខាងក្នុងនិងនៅជិតរដ្ឋធានីនៃប្រទេសអ៊ីរ៉ាក់ (Iraq) ដោយមានរួមបញ្ចូលទាំងការបំផ្ទុះគ្រាប់បែកអត្តឃាតមួយនៅក្នុងសង្កាត់មួយនៃក្រុងបាកដាដ (Baghdad) ដែលមានអ្នកស្រុកភាគច្រើនជាពួកអ្នកកាន់សាសនាឥស្លាមនិកាយស៊ីអ៊ីត (Shia)។
ការវាយប្រហារអត្តឃាតកាលពីព្រឹកថ្ងៃច័ន្ទនៅក្នុងសង្កាត់ Kadhamiya នៃក្រុងបាកដាដ បានបណ្តាលឲ្យមនុស្សយ៉ាងហោចណាស់១៣នាក់ស្លាប់និងបានធ្វើឲ្យមនុស្សយ៉ាងតិចណាស់៤២នាក់ទៀតរងរបួស។ សង្កាត់នោះជាកន្លែងមានទីការៈបូជាដ៏ពិសិដ្ឋមួយនៃសាសនាសាសនាឥស្លាមនិកាយស៊ីអ៊ីត។
លោក Salam Abid ដែលជាអ្នកឃើញហេតុការណ៍ដោយផ្ទាល់បាននិយាយថា៖«នៅព្រឹកមិញនេះ នៅម៉ោង៧កន្លះ អ្នកដាក់គ្រាប់បែកអត្តឃាតដែលជាក្មេងប្រុសវ័យក្មេងម្នាក់បានបំផ្ទុះអាវកាក់មានដាក់ពេញដោយគ្រឿងផ្ទុះនៅទីលាននេះដែលមានចរាចរមមាញឹក មានអ្នកធ្វើដំណើរនិងកុមារជាច្រើននាក់ គឺនៅពេលអ្នកស្រុកប្រញាប់ប្រញាល់ទៅធ្វើការ»។
គ្មានការអះអាងទាមទារការទទួលខុសត្រូវចំពោះការវាយប្រហារនេះទេ ក៏ប៉ុន្តែការបំផ្ទុះគ្រាប់បែកបែបនេះជាញឹកញយត្រូវបានយល់ឃើញថា ជាការវាយប្រហារដោយពួកជនសកម្មប្រយុទ្ធ Sunni ដែលយកពួកស៊ីអ៊ីត (Shi'ites) ជាទីដៅនៃការវាយប្រហារ។
គ្រាប់បែកទីពីរក៏បានផ្ទុះនៅក្នុងសង្កាត់ Husseiniyah ក្នុងប៉ែកខាងជើងនៃក្រុងបាកដាដ ដែលបណ្តាលឲ្យមនុស្សយ៉ាងតិចណាស់២នាក់បាត់បង់ជីវិត៕