បម្រាមគោចររយៈពេលមួយទសវត្សរ៍នៅក្រុងបាកដាដ(Baghdad) បានបញ្ចប់តែប៉ុន្មានម៉ោងក្រោយពីមានការផ្ទុះគ្រាប់បែកមួយចំនួនដែលបានបណ្តាលឲ្យមនុស្សយ៉ាងតិចណាស់៣៧នាក់ស្លាប់ និងបានធ្វើឲ្យមនុស្សជាច្រើននាក់ទៀតរងរបួស។
បម្រាមគោចរនេះបានបញ្ចប់នៅពេលពាក់កណ្តាលអធ្រាត្រ ដោយអនុញ្ញាតឲ្យមនុស្សចេញតាមផ្លូវនៅម៉ោងទៀបភ្លឺនាថ្ងៃអាទិត្យនេះ។អាជ្ញាធរបានដាក់ឲ្យមានបម្រាមគោចរនេះនៅរដ្ឋធានីនៃប្រទេសអ៊ីរ៉ាក់ ក្នុងការប៉ុនប៉ងមួយដើម្បីកាត់បន្ថយអំពើហិង្សា និងការចាប់ពង្រត់មនុស្ស។
នៅក្នុងការវាយប្រហារមួយក្នុងចំណោមបណ្តាការវាយប្រហារមួយចំនួនទៀតកាលពីថ្ងៃសៅរ៍ ជនគ្រាប់បែកអត្តឃាតម្នាក់បានបំផ្ទុះគ្រឿងផ្ទុះនៅតាមផ្លួវមួយនៅជិតភោជនីយដ្ឋានមួយកន្លែង ដែលបណ្តាលឲ្យមនុស្សយ៉ាងហោចណាស់២២នាក់បាត់បង់ជីវិត ហើយបាននាំឲ្យមនុស្សច្រើននាក់ទៀតរងរបួស។
នៅក្នុងព្រឹត្តិការណ៍មួយផ្សេងទៀតកាលពីថ្ងៃសៅរ៍ លោកនាយករដ្ឋមន្ត្រីអ៊ីរ៉ាក់Haider al-Abadi បានជួបជាមួយលោកអនុប្រធានាធិបតីស.រ.អា Joe Biden និងលោករដ្ឋមន្ត្រីការបរទេសស.រ.អា John Kerry នៅក្នុងក្រុង Munich។ នៅក្នុងព្រឹត្តិការណ៍នោះក្រុមមន្ត្រីស.រ.អា.និយាយថា ពួកលោកបានពិភាក្សាគ្នាអំពីកិច្ចប្រឹងប្រែងប្រយុទ្ធប្រឆាំងនឹងក្រុមរដ្ឋឥស្លាម ហើយបាននិយាយគ្នាអំពី
សារៈសំខាន់នៃរបៀបដោះស្រាយ «របស់រដ្ឋាភិបាលទាំងមូល» ដើម្បីធ្វើឲ្យមានអភិបាលកិច្ចល្អក្នុងមូលដ្ឋាន ការកសាងជាថ្មីនិងឱកាសសេដ្ឋកិច្ចនៅក្នុងតំបន់ដែលបានត្រូវរំដោះពីក្រុមរដ្ឋអ៊ីស្លាម៕
