ប្រធានាធិបតីសហរដ្ឋអាមេរិកលោក Joe Biden និងលោកស្រីអនុប្រធានាធិបតី Kamala Harris បានធ្វើដំណើរទៅកាន់រដ្ឋ Georgia ភាគខាងត្បូងកាលពីថ្ងៃអង្គារដើម្បីផ្សព្វផ្សាយសេចក្តីព្រាងច្បាប់នៃសិទ្ធិបោះឆ្នោតដែលនឹងពង្រីកយ៉ាងខ្លាំងនូវឥទ្ធិពលរបស់រដ្ឋាភិបាលសហព័ន្ធក្នុងការបោះឆ្នោត។
សេចក្តីព្រាងច្បាប់២ ជាអាទិភាពកំពូលសម្រាប់ពួកគណបក្សប្រជាធិបតេយ្យជាច្រើន ក៏ប៉ុន្តែ បានជាប់គាំងនៅក្នុងព្រឹទ្ធសភាដោយសារការជំទាស់របស់គណបក្សសាធារណរដ្ឋ។
លោក Biden បានថ្លែងថា «ថ្ងៃនេះ យើងមកទីក្រុង Atlanta ដែលជាទីកំណើតនៃសិទ្ធិពលរដ្ឋដើម្បីបញ្ជាក់អំពីអ្វីដែលចាំបាច់ត្រូវកើតមានឡើង បន្ទាប់ពីថ្ងៃដ៏ភ័យខ្លាចនៅពេលដែលកាំបិទត្រូវបានភ្ជុងលើបំពង់កនៃលទ្ធិប្រជាធិបតេយ្យអាមេរិកាំង»។ លោក Biden លើកឡើងអំពីថ្ងៃទី៦ ខែមករា ឆ្នាំ២០២១ នៅពេលដែលពួកអ្នកគាំទ្រលោកអតីតប្រធានាធិបតី Donald Trump វាយលុកចូលវិមានសភាសហរដ្ឋអាមេរិក ដើម្បីប៉ុនប៉ងប្រែក្រឡាស់ជ័យជម្នះរបស់លោក Biden នៅក្នុងការបោះឆ្នោតឆ្នាំ២០២០។
ដោយមានសំឡេងឆ្នោតតែ៥០សំឡេងនៅក្នុងព្រឹទ្ធសភាដែលមានអសនៈចំនួន១០០ហើយមិនមានសំឡេងគាំទ្រខាងគណបក្សសាធារណរដ្ឋនោះ លោក Biden បានផ្តល់ការគាំទ្រចំពោះអ្វីដែលហៅថា ការលើកលែងលើនីតិវិធីពន្យារការបោះឆ្នោត ឬ Filibuster៖ ដែលជាការកែប្រែតែមួយដងនៅក្នុងនីតិវិធីពន្យារការបោះឆ្នោតនេះ ដើម្បីអនុម័តសេចក្តីព្រាងច្បាប់សិទ្ធិបោះឆ្នោតទាំង២។
នីតិវិធីពន្យារការបោះឆ្នោត ឬ Filibuster ជាប្រពៃណីរបស់ព្រឹទ្ធសភាដែលអនុញ្ញាតឲ្យគណបក្សដែលមានសំឡេងតិច ពន្យារពេលការជជែកដេញដោល ឬរារាំងការបោះឆ្នោត។ ការលើកលែងនីតិវិធីពន្យារការបោះឆ្នោត ឬ Filibuster នេះ នឹងអនុញ្ញាតឲ្យពួកសមាជិកព្រឹទ្ធសភាខាងគណបក្សប្រជាធិបតេយ្យ អនុម័តសេចក្តីព្រាងច្បាប់ដោយសំឡេងភាគច្រើន ៥០+១ ដោយមានលោកស្រីអនុប្រធានាធិបតី Kamala Harris ជាអ្នកបំបែកភាពស្មើគ្នា។
លោកសមាជិកព្រឹទ្ធសភា Mitch McConnell មេដឹកនាំកំពូលខាងគណបក្សសាធារណរដ្ឋនៅក្នុងព្រឹទ្ធសភា បានរិះគន់យ៉ាងខ្លាំងចំពោះចំណាត់ការនេះ។ លោកបានសរសេរក្នុងសេចក្តីថ្លែងការណ៍មួយថា «មេដឹកនាំខាងគណបក្សប្រជាធិបតេយ្យក្នុងព្រឹទ្ធសភា កំពុងព្យាយាមបង្ខំសមាជិកនៃគណបក្សរបស់ខ្លួន ឲ្យក្បត់ពាក្យសម្តីរបស់ខ្លួន ហើយបំបិទសំឡេងរបស់ពលរដ្ឋអាមេរិកាំងរាប់លាននាក់ ដើម្បីឲ្យគណបក្សនយោបាយមួយ ចាត់ចែងការបោះឆ្នោតរបស់ប្រទេសជាតិយើងពីថ្នាក់លើដល់ថ្នាក់ក្រោម»៕