ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Biden អំពាវនាវ​ដល់​សហរដ្ឋ​អាមេរិក​និង​ពិភពលោក​នៅថ្ងៃ​ខួប​នៃ​ការវាយ​ប្រហារ​លើ​វិមាន​សភា​សហរដ្ឋ​​អាមេរិក


លោកប្រធានាធិបតី Joe Biden ថ្លែងពី Statuary Hall នៅវិមានសភាសហរដ្ឋអាមេរិក ដើម្បីប្រារព្ធខួបមួយឆ្នាំនៃកុបកម្មថ្ងៃទី៦ ខែមករា កាលពីថ្ងៃព្រហស្បតិ៍ ទី៦ ខែមករា ឆ្នាំ២០២២ នៅទីក្រុងវ៉ាស៊ីនតោន។ (AP)
លោកប្រធានាធិបតី Joe Biden ថ្លែងពី Statuary Hall នៅវិមានសភាសហរដ្ឋអាមេរិក ដើម្បីប្រារព្ធខួបមួយឆ្នាំនៃកុបកម្មថ្ងៃទី៦ ខែមករា កាលពីថ្ងៃព្រហស្បតិ៍ ទី៦ ខែមករា ឆ្នាំ២០២២ នៅទីក្រុងវ៉ាស៊ីនតោន។ (AP)

ប្រធានាធិបតី​សហរដ្ឋ​អាមេរិក​លោក Biden បាន​អំពាវនាវ​ប្រកប​ដោយ​ការរំជួលចិត្ត​ដល់​ប្រជាពលរដ្ឋ​អាមេរិកាំង​នៅ​ថ្ងៃខួប​ទី១​នៃ​ការប៉ុនប៉ង​ធ្វើ​កុបកម្ម​ដ៏​គួរ​ឲ្យ​ភ្ញាក់ផ្អើល​ដែល​លោក​ប្រធានាធិបតី Biden បាន​មាន​ប្រសាសន៍​ថា ជា​ការស្ទង់​អត្តសញ្ញាណ​របស់​ជាតិ។

លោក​ប្រធានាធិបតី Biden បាន​សួរ​កាលពី​ព្រឹក​ថ្ងៃ​ព្រហស្បតិ៍​នៅ​វិមាន​សភា​សហរដ្ឋ​អាមេរិក​ជាទីកន្លែង​ដែល​ពួក​បាតុករ​ហិង្សា បាន​ចូល​លុកលុយ​កាល​ពី១​ឆ្នាំ​មុន បាន​បំផ្លិច​បំផ្លាញ លួច​របស់​របរ​និង​ស្វះស្វែងរក​មេដឹកនាំ​សភា​ជាន់​ខ្ពស់​ថា «តើ​យើង នឹង​ក្លាយ​ជា​ប្រទេស​មួយ​ដែល​សុខចិត្ត​ទទួល​យក​អំពើ​ហិង្សា​នយោបាយជា​រឿងធម្មតា​មួយ​ដែរ​ឬ​ទេ?។ តើ​យើង នឹង​ក្លាយ​ជា​ប្រទេស​ជាតិ​មួយ​ដែល​អនុញ្ញាត​ឲ្យ​ក្រុម​មន្ត្រី​គណបក្ស​មួយ​ប្រែក្រឡាស់​ឆន្ទៈ​នៃ​ការសម្តែង​មតិ​ស្រប​ច្បាប់​របស់​ប្រជាពលរដ្ឋ​ដែរ​ឬទេ?។

ក្នុង​អំឡុង​ពេល​នៃ​កុបកម្ម​ហិង្សា​នៅ​វិមាន​សភា​កាលពី​ថ្ងៃ​ទី៦ ខែ​មករា ឆ្នាំ២០២១ ពួក​អ្នក​គាំ ទ្រ​អតីត​ប្រធានាធិបតី Donald Trump បាន​រុញច្រាន​ប៉ូលិស សម្រុក​ចូល​វិមាន​សភា​ហើយ​បាន​ប៉ុនប៉ង​បញ្ឈប់​សមាជិក​សភា​មិនឲ្យ​ទទួល​ស្គាល់​ជ័យ​ជម្នះ​របស់​លោក Biden នៅ​ក្នុង​ការបោះឆ្នោត​ប្រធានាធិបតី​ឆ្នាំ២០២០។ លោក Biden បាន​ជំរុញ​ប្រជាពលរដ្ឋ​អាមេរិកាំង​ឲ្យ​ជ្រើសរើស​អត្តសញ្ញាណ​របស់​ខ្លួន។

លោក​ប្រធានាធិបតី Biden បាន​សួរ​ថា « តើ​យើង​នឹង​ក្លាយ​ជា​ប្រទេស​ជាតិ​មួយ​ដែល​មិនមែន​រស់នៅ​ក្រោម​ពន្លឺ​នៃ​ការពិត ក៏​ប៉ុន្តែ​នៅ​ក្នុង​ស្រមោល​នៃ​ការភូត​កុហក​ឬ?។ យើង​មិន​អាច​អនុញ្ញាត​ឲ្យ​ខ្លួន​យើង​ក្លាយ​ជា​ប្រទេស​បែប​នេះ​ទេ។ មធ្យោបាយ​ឆ្ពោះ​ទៅ​មុខ​គឺ​ត្រូវ​ទទួល​ស្គាល់​ការពិត​និង​គោរព​ការពិត»។

ហើយ​លោក​ប្រធានាធិបតី​បាន​មាន​ប្រសាសន៍​ទៀត​ថា ព្រិត្តិការណ៍​នៅ​ថ្ងៃ​នោះ​ធ្វើ​ឲ្យ​ប៉ះពាល់​ដល់ប្រទេស​ផ្សេងៗទៀត។

លោក​ប្រធានាធិបតីBiden មិនបាន​និយាយ​ឈ្មោះ​លោក Trump ចំៗទេ ថ្វីបើ​លោក បាន​និយាយ​ម្តង​ហើយ​ម្តង​ទៀត​ថា ការស្វះស្វែង​រក​មិន​បាន​ជោគជ័យ​របស់​លោក Trump ដើម្បី​ប្រែក្រឡាស់​ការចាញ់ឆ្នោត​របស់​លោក កំពុង​ធ្វើ​ឲ្យ​ប៉ះពាល់​ដល់​លទ្ធិ​ប្រជាធិបតេយ្យ​របស់​អាមេរិក។

មិនយូរ​ប៉ុន្មាន​ក្រោយមក លោក Trumpបាន​ចេញ​សេចក្តីថ្លែងការណ៍មួយ ចោទលោក Biden ថា​ព្យាយាម​បំបែកបំបាក់​ប្រទេស​ជាតិ​នៅ​ក្នុង​ការ​ថ្លែងសារ​របស់​លោក។

លោក Trump បាន​ថ្លែងថា «លោក Biden ដែលកំពុង​បំផ្លាញ​ប្រទេសជាតិយើង ជាមួយគោល​នយោបាយ​លីលា​ដោយ​បើកចំហរ​ព្រំដែន ការបោះឆ្នោត​ពុករលួយ គោលនយោបាយ​ថាមពល​បរាជ័យ ការតម្រូវខុស​រដ្ឋធម្មនុញ្ញ និង ការ​បិទសាលារៀននោះ បាន​ប្រើប្រាស់​ឈ្មោះខ្ញុំ​នៅថ្ងៃនេះ​ដើម្បីបំបែក​បំបាក់​ប្រទេស​អាមេរិក​ថែមទៀត។ នេះ​ជា​ឆាកល្ខោន​នយោបាយ​ដើម្បីងាកចេញពី​ការពិត​ដែលថា Biden បាន​ទទួល​បរាជ័យ​ទាំងស្រុង​តែប៉ុណ្ណោះ‍»៕

XS
SM
MD
LG