ប្រទេសអូស្ត្រាលីបានបញ្ជាក់នៅថ្ងៃអង្គារនេះថា ខ្លួននឹងហាមឃាត់បណ្តាញសង្គម TikTok លើឧបករណ៍របស់រដ្ឋាភិបាល។ ការធ្វើដូច្នេះគឺជាការចូលរួមជាមួយនឹងបស្ចិមប្រទេសមួយចំនួននៅក្នុងការបង្ក្រាបលើ TikTok របស់ចិននេះ ដោយសារតែមានការព្រួយបារម្ភពីសន្តិសុខជាតិ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
អគ្គរដ្ឋអាជ្ញាអូស្ត្រាលីលោក Mark Dreyfus បាននិយាយថា ការសម្រេចនេះបានធ្វើឡើងបន្ទាប់ពីទទួលបានការប្រឹក្សាយោបល់ពីទីភ្នាក់ងារស៊ើបការណ៍សម្ងាត់របស់អូស្ត្រាលី ហើយការហាមឃាត់នេះនឹងចាប់ផ្ដើម«ឆាប់ៗនេះនៅពេលណាដែលអាចអនុវត្តបាន»។
អូស្ត្រាលីគឺជាសមាជិកចុងក្រោយបង្អស់នៃសម្ព័ន្ធភាពសន្តិសុខ Five Eyes សម្ងាត់នៅក្នុងការអនុវត្តការហាមឃាត់ TikTok លើឧបករណ៍របស់រដ្ឋាភិបាល ដោយបានចូលរួមជាមួយនឹងសម្ព័ន្ធមិត្តរបស់ខ្លួនរួមមានសហរដ្ឋអាមេរិក ចក្រភពអង់គ្លេស កាណាដា និងនូវែលសេឡង់។
ប្រទេសបារាំង ហូឡង់ និងគណៈកម្មការអឺរ៉ុបក៏បានចាត់វិធានការស្រដៀងគ្នានេះផងដែរ។
លោក Dreyfus បាននិយាយថា រដ្ឋាភិបាលនឹងផ្ដល់ការលើកលែងមួយចំនួនតាម «ករណីមួយៗជាក់ស្ដែង» ជាមួយនឹង «ការបន្ធូរបន្ថយសន្តិសុខសមរម្យដែលមានស្រាប់»។
អ្នកជំនាញផ្នែកសន្តិសុខអ៊ីនធឺណិតបានព្រមានថា កម្មវិធី app TikTok ដែលមានអ្នកប្រើជាងមួយពាន់លាននាក់នៅលើពិភពលោកនេះអាចត្រូវបានគេប្រើដើម្បីប្រមូលទិន្នន័យក្នុងគោលបំណងចែកចាយជាមួយនឹងរដ្ឋាភិបាលចិន។
ការស្ទង់មតិនានាបានប៉ាន់ប្រមាណថា ពលរដ្ឋអូស្ត្រាលីរហូតដល់ ៧ លាននាក់ដែលស្មើនឹងប្រហែលមួយភាគបួននៃប្រជាជនសរុបបានប្រើ TikTok។
នៅក្នុងការជូនដំណឹងអំពីសន្តិសុខដែលបង្ហាញអំពីការហាមឃាត់ TikTok នេះ ការិយាល័យអគ្គរដ្ឋអាជ្ញាអូស្ត្រាលីបានបញ្ជាក់ថា TikTok បានបង្ក«ហានិភ័យខ្លាំងគួរសមផ្នែកសន្តិសុខនិងឯកជនភាព» ដោយសារតែ «ការប្រមូលទិន្នន័យអ្នកប្រើប្រាស់យ៉ាងទូលំទូលាយ»។
ប្រទេសចិនបានថ្កោលទោសការហាមឃាត់នេះ ដោយបានបញ្ជាក់ថា ខ្លួនបាន«ធ្វើការប្រឆាំងផ្នែក
ការទូត» ចំពោះរដ្ឋាភិបាលអូស្ត្រាលីទាក់ទិននឹងវិធានការនេះ និងបានជំរុញអូស្ត្រាលីឱ្យ«ផ្ដល់ឱ្យក្រុមហ៊ុនចិននូវបរិយាកាសអាជីវកម្មដែលមានយុត្តិធម៌ តម្លាភាព និងមិនរើសអើង»៕
អូស្ត្រាលីហាមឃាត់ TikTok លើឧបករណ៍រដ្ឋាភិបាល
រូបស្លាកសញ្ញារបស់កម្មវិធីវីដេអូ TikTok ដែលគ្រប់គ្រងដោយចិននៅលើអេក្រង់ទូរសព្ទមួយគ្រឿងនៅពីមុខរូបទង់ជាតិអូស្ត្រាលីនៅក្នុងរូបដែលថតនៅថ្ងៃទី៤ ខែមេសា ឆ្នាំ២០២៣។
ទីក្រុង Sydney —