សហចៅក្រមស៊ើបសញ្ជាតិអាមេរិកនៃសាលាក្តីខ្មែរក្រហមគឺលោក ម៉ាក ហាម៉ុន (Mark B. Harmon) នៅថ្ងៃសុក្រនេះបានដាក់អោ អាន ដែលជាជនជាប់សង្ស័យម្នាក់ទៀតក្នុងសំណុំរឿង០០៤ឲ្យស្ថិតក្រោមការត្រួតពិនិត្យពីបទមនុស្សឃាត និងឧក្រិដ្ឋកម្មប្រឆាំងមនុស្សជាតិ។
ការដាក់ឲ្យស្ថិតក្រោមការត្រួតពិនិត្យនេះគឺដូចគ្នាទៅនឹងការចោទប្រកាន់ដែរ។ហើយការចោទប្រកាន់នេះធ្វើឡើងនៅចំពោះមុខជនជាប់សង្ស័យនៅក្នុងខេត្តបាត់ដំបង។
នៅក្នុងសេចក្តីថ្លែងការណ៍នៅរសៀលនេះ លោកចៅក្រមម៉ាក ហាម៉ុន បានចោទជនសង្ស័យអោ អាន ហៅតា អាន អតីតអនុប្រធានតំបន់មជ្ឈឹមខេត្តកំពង់ចាមពាក់ព័ន្ធនឹងកន្លែងសម្លាប់មនុស្សគោកព្រីង មន្ទីរសន្តិសុខទួលបេង មន្ទីរសន្តិសុខវត្តអូរត្រកួន។
សហចៅក្រមបញ្ជាក់ថា បទឧក្រិដ្ឋទាំងនេះបង្ហាញពីការធ្វើមនុស្សឃាត ការសម្លាប់រង្គាល ការធ្វើទុក្ខបុកម្នេញផ្នែកនយោបាយ និងសាសនា និងការដាក់ក្នុងមន្ទីរឃុំឃាំង។
លោកឡាស អលសិន (Lars Olsen) មន្ត្រីផ្នែកទំនាក់ទំនងកិច្ចការច្បាប់របស់សាលាក្តីខ្មែរក្រហម បានឲ្យដឹងថា ជនជាប់សង្ស័យនិងមេធាវីបានបង្ហាញមុខនៅចំពោះមុខសហចៅក្រមស៊ើបអង្កេតអន្តរជាតិ នៅពេលធ្វើការចោទប្រកាន់នោះ។
នៅពេលដែលសួរថា ហេតុអ្វីបានជាធ្វើការចោទប្រកាន់នៅចំពោះមុខជនសង្ស័យ តែមិនមានការចាប់ខ្លួនបែបនេះ មន្ត្រីអ្នកនាំពាក្យរូបនេះពន្យល់ថា ការចោទប្រកាន់និងការចាប់ខ្លួនជានីតិវិធីពីរផ្សេងគ្នាពោល គឺការចោទប្រកាន់មិនមែនមានន័យថា ត្រូវតែចាប់ខ្លួននោះទេ។
យ៉ាងណាក្តី ការចោទនេះបានធ្វើឲ្យមានការប្រឆាំងជំទាស់ភ្លាមៗពីលោក យូ ប៊ុនឡេង សហចៅក្រមស៊ើបអង្កេតកម្ពុជា។
លោកនេត្រ ភក្ត្រា អ្នកនាំពាក្យសាលាក្តីខ្មែរក្រហមខាងភាគីជាតិ បានស្រង់សម្តីលោកយូ ប៊ុនឡេង ដោយបង្ហាញពីភាពមិនច្បាស់លាស់អំពីការទទួលខុសត្រូវរបស់ជនសង្ស័យថា តើជនសង្ស័យត្រូវស្ថិតក្រោមវិសាលភាពត្រូវចោទប្រកាន់ដែរឬយ៉ាងណា។
«ចំពោះសហចៅក្រមស៊ើបអង្កេតជាតិគឺឯកឧត្តម យូ ប៊ុនឡេង យល់ឃើញថា សម្រាប់នីតិវិធីស៊ើបអង្កេតពេលនេះគឺមិនមានភាពចាំបាច់ក្នុងការដាក់ជនសង្ស័យឲ្យស្ថិតនៅក្រោមការត្រួតពិនិត្យទេ ដោយសារតែតាមការស៊ើបអង្កេតកន្លងមក ភស្តុតាងបង្ហាញថា មានវិមតិសង្ស័យច្រើនទៅលើថា តើជនសង្ស័យចូលទៅក្នុងយុត្តាធិការបុគ្គលរបស់សាលាក្តីដែរ ឬយ៉ាងណា»។
នេះគឺជាការចោទប្រកាន់លើជនជាប់សង្ស័យក្នុងសំណុំរឿងដ៏ចម្រូងចម្រាស់ទី៣ហើយ បន្ទាប់ពីសហចៅក្រមស៊ើបអង្កេតម៉ាក ហាម៉ុនបានសម្រេចចោទប្រកាន់ជាឯកតោភាគីកាលពីពេលថ្មីៗនេះលើជនសង្ស័យឈ្មោះមាស មុត ក្នុងសំណុំរឿង០០៣ និងអ្នកស្រីអ៊ឹម ចែមក្នុងសំណុំរឿង០០៤។
ការចោទប្រកាន់នេះនាំឲ្យមានការសាទរពីអង្គការឃ្លាំមើលការរំលោភសិទ្ធិមនុស្សជាតិ និងអន្តរជាតិ រួមទាំងមន្ត្រីសិទ្ធិមនុស្សជាន់ខ្ពស់របស់អង្គការសហប្រជាជាតិផងដែរ។
ប៉ុន្តែលោកនាយករដ្ឋមន្ត្រី ហ៊ុន សែន បានព្រមានឡើងវិញថា ការចោទប្រកាន់និងការពង្រីកវិសាលភាពការកាត់ទោសលើសំណុំរឿងបន្ថែមនឹងនាំឲ្យមានហានិភ័យផ្នែកសន្តិសុខជាតិ។
កាលពីឆ្នាំទៅ ជនជាប់សង្ស័យអោ អានបានបដិសេធពីការជាប់ពាក់ព័ន្ធទៅនឹងបទឧក្រិដ្ឋនានានៅក្នុងសម័យខ្មែរក្រហម។
«ដូច្នេះខ្ញុំជម្រាបប្រសាសន៍ក្មួយអញ្ចឹង។ បច្ចុប្បន្ននេះក៏ខ្ញុំអត់ភ័យនឹងតុលាការ។ ពេលអនាគតទៅទៀត ពេលខ្ញុំស្លាប់ទៅ ក៏ខ្ញុំអត់ភ័យនឹងយមបាល។ អត់ភ័យទេ! បុណ្យ ឥឡូវខ្ញុំធ្វើ! សីលខ្ញុំកាន់! ពីមុនមកខ្ញុំអត់មានកាប់សម្លាប់ ខ្ញុំខ្លាចយមបាល? បើមានសិទ្ធិតវ៉ា ដូចខ្ញុំថា អញ្ចឹងគឺខ្ញុំអត់បានបញ្ហាអីទាក់ទងនឹងឃាតកម្មអស់ហ្នឹងទេ។ អត់មានទេ! ដូចខ្ញុំជម្រាបប្រសាសន៍អញ្ចឹងគឺថា ពេលដែលខ្ញុំទៅ គឺអស់ហើយតាំងពីក្រោមរហូតដល់លើ នៅសល់តែកែវ ពកមួយទេ។ ពេលខ្ញុំទៅ ខ្ញុំរៀបចំភូមិឃុំថ្មី។ ខ្ញុំមានការទាក់ទងរឿងអីទេ! អត់!»
នៅដើមសប្តាហ៍នេះអង្គការ Human Rights Watch ដែលមានមូលដ្ឋាននៅសហរដ្ឋអាមេរិក បានទាមទារឲ្យរដ្ឋាភិបាលកម្ពុជាបញ្ឈប់ការរារាំងដល់ការចាត់នីតិវិធីក្នុងសំណុំរឿង០០៣ និង០០៤ខាងលើនេះ។ ប៉ុន្តែលោកសុខ អាន រដ្ឋមន្ត្រីទីស្តីការគណៈរដ្ឋមន្ត្រី និងជាប្រធានក្រុមចរចាកិច្ចការសាលាក្តីខ្មែរក្រហមបានប្រកាសកាលពីថ្ងៃព្រហស្បតិ៍ម្សិលមិញនេះថា រដ្ឋាភិបាលខ្មែរមិនបង្កការគាបសង្កត់លើតុលាការនោះទេ៕