កងកម្លាំងសន្តិសុខមីយ៉ាន់ម៉ា បានបើកការបាញ់ប្រហារលើក្រុមបាតុករប្រឆាំងការគ្រប់គ្រងយោធានៅថ្ងៃពុធនេះ មួយថ្ងៃបន្ទាប់ពីបណ្តាប្រទេសនៅក្នុងសមាគមអាស៊ាន បានអំពាវនាវឲ្យមានការអត់ធ្មត់ និងបានស្នើសុំជួយដើម្បីដោះស្រាយវិបត្តិនៅក្នុងប្រទេសមីយ៉ាន់ម៉ា។
ទីភ្នាក់ងារព័ត៌មាន AP បានរាយការណ៍ថា មនុស្សយ៉ាងតិច៦នាក់ បានត្រូវសម្លាប់ ដោយយោងតាមបណ្តាញព័ត៌មានក្នុងស្រុក។
អ្នកឃើញហេតុការណ៍ផ្ទាល់និយាយថា កងកម្លាំងសន្តិសុខ បានបាញ់គ្រាប់កាំភ្លើងពិតៗដោយមានការព្រមានតិចតួចជាមុន នៅក្នុងទីក្រុងជាច្រើន ខណៈក្រុមយោធា ហាក់បង្ហាញនូវការតាំងចិត្តជាងពេលណាៗទាំងអស់ដើម្បីបំបាត់ការតវ៉ាប្រឆាំងរដ្ឋប្រហារថ្ងៃទី១ ខែកុម្ភៈ ដែលបានបណ្តេញរដ្ឋាភិបាលជាប់ឆ្នោតរបស់អ្នកស្រី Aung San Suu Kyi។
កាឌីណាល់ Charles Maung Bo អាចារ្យគ្រឹស្តសាសនានៃក្រុងរ៉ង់ហ្គូន បានសរសេរតាម Twitter ថា៖ «ទីក្រុងជាច្រើនរបស់ប្រទេសនេះ ដូចជាទីលាន Tiananmen នៃប្រទេសចិន»។ លោកបាននិយាយបញ្ឆិតបញ្ឆៀងដល់ការបង្ក្រាបការតវ៉ាប្រឆាំងដែលដឹកនាំដោយក្រុមនិស្សិតនៅក្នុងទីក្រុងប៉េកាំងនៅឆ្នាំ១៩៨៩។ នេះ បើតាមទីភ្នាក់ងារព័ត៌មាន Reuters។
កាលពីថ្ងៃអង្គារ សមាគមប្រជាជាតិអាស៊ីអាគ្នេយ៍ ឬអាស៊ាន មិនបានបំបែកភាពទាល់ច្រកនៅក្នុងជំនួបរដ្ឋមន្ត្រីការបរទេសតាមអនឡាញស្តីពីប្រទេសមីយ៉ាន់ម៉ាទេ។
ខណៈដែលពួកគេរួមគ្នាអំពាវនាវឲ្យមានភាពអត់ធ្មត់ មានតែសមាជិក៤ប្រទេសគត់ គឺឥណ្ឌូណេស៊ី ម៉ាឡេស៊ី ហ្វីលីពីន និងសិង្ហបូរី បានអំពាវនាវឲ្យដោះលែងអ្នកស្រី Suu Kyi និងអ្នកទោសផ្សេងទៀត។
ក្នុងព័ត៌មានមួយទៀត អ្នកកាសែត៦នាក់ ត្រូវគេរាយការណ៍ថា បានត្រូវចាប់ខ្លួននៅក្នុងប្រទេសមីយ៉ាន់ម៉ា ចំពោះសេចក្តីរាយការណ៍របស់ពួកគេអំពីបាតុកម្មប្រឆាំងនឹងរដ្ឋប្រហារ៕