ឯកអគ្គរដ្ឋទូតមីយ៉ាន់ម៉ាប្រចាំអង្គការសហប្រជាជាតិលោក Kyaw Moe Tun កាលពីថ្ងៃសុក្រ បានថ្កោលទោសការធ្វើរដ្ឋប្រហារយោធាថ្ងៃទី១ ខែកុម្ភៈ ដោយបានស្នើឲ្យប្រទេសជាសមាជិកអង្គការសហប្រជាជាតិ ថ្កោលទោសការធ្វើរដ្ឋប្រហារនេះជាសាធារណៈ។ នេះបើយោងតាមសេចក្តីរាយការណ៍របស់សារព័ត៌មាន The Irrawaddy។
លោក Tun បានថ្លែងនៅក្នុងសុន្ទរកថាត្រៀមទុកជាមុនមួយថា៖ «យោធាមីយ៉ាន់ម៉ាបានឃុំខ្លូនប្រមុខរដ្ឋអ្នកស្រី Aung San Suu Kyi លោកប្រធានាធិបតីU Win Myint និងមេដឹកនាំនយោបាយនិងសកម្មជនសង្គមនានា។ ចាប់តាំងពីពេលនោះមក មនុស្សគ្រប់វ័យនាំគ្នាចេញទៅធ្វើបាតុកម្មនៅតាមដងផ្លូវនានានៅទូទាំងប្រទេស ហើយបានបង្ហាញការខកចិត្តរបស់ពួកគេ ចំពោះការធ្វើរដ្ឋប្រហារដោយយោធា»។
នេះបើយោងតាមសេចក្តីរាយការណ៍មួយ ដែលចេញផ្សាយដោយគេហទំព័ររបស់សារព័ត៌មានតាមប្រព័ន្ធអ៊ីនធឺណិត Axios ដែលមានមូលដ្ឋាននៅសហរដ្ឋអាមេរិក។
លោក Tun ថ្លែងថា៖ «ពលរដ្ឋនៅមីយ៉ាន់ម៉ានៅតែមានអារម្មណ៍ថា អស់សង្ឃឹម។ យើងនៅតែត្រូវការចំណាត់ការធ្ងន់ធ្ងរបំផុតដែលអាចធ្វើទៅបាន ពីសហគមន៍អន្តរជាតិដើម្បីបញ្ចប់ការធ្វើរដ្ឋប្រហារដោយយោធានេះជាបន្ទាន់»។
លោក Tun បានស្នើឲ្យសមាជិកអង្គការសហប្រជាជាតិទាំងអស់ថ្កោលទោសការធ្វើរដ្ឋប្រហារនេះស្នើកុំឲ្យមានការទទួលស្គាល់របបដឹកនាំដោយយោធា និងចាត់គ្រប់វិធានការ «ធ្ងន់ធ្ងរបំផុតដែលអាចធ្វើទៅបាន» ដើម្បីបញ្ឈប់ការបង្ក្រាបរបស់ប៉ូលិសមីយ៉ាន់ម៉ា ទៅលើក្រុមបាតុករនិងដើម្បីបញ្ចប់រដ្ឋប្រហារនេះជាបន្ទាន់។
កាលពីថ្ងៃសុក្រ ប្រេសិតពិសេសរបស់អង្គការសហប្រជាជាតិប្រចាំនៅប្រទេសមីយ៉ាន់ម៉ាអ្នកស្រី Christine Schraner Burgener បានអំពាវនាវឲ្យមាន «សញ្ញាសមូហភាពច្បាស់លាស់មួយដើម្បីគាំទ្រលទ្ធិប្រជាធិបតេយ្យ»។ នេះបើយោងតាមសេចក្តីរាយការណ៍របស់សារព័ត៌មាន Reuters។
អ្នកស្រី Schraner Burgener បានថ្លែងថា៖ «វាសំខាន់ណាស់ដែលសហគមន៍អន្តរជាតិមិនផ្តល់ភាពស្របច្បាប់ឬការទទួលស្គាល់ដល់របបយោធានេះ»។
អគ្គលេខាធិការអង្គការសហប្រជាជាតិលោក Antonio Guterres បានសន្យាថា សហគមន៍អន្តជាតិនឹងអនុម័តការដាក់សម្ពាធ «ដើម្បីធ្វើឲ្យប្រាកដថា រដ្ឋប្រហារនេះទទួលបរាជ័យ»។ នេះបើយោងតាមសារព័ត៌មាន Reuters៕
