ក្រុមហ៊ុនបច្ចេកវិទ្យាទំនាក់ទំនង Zoom បាននិយាយកាលពីថ្ងៃពុធថា ខ្លួនកំពុងពង្រឹងបន្ថែមនូវបច្ចេកវិទ្យាសារសម្ងាត់ encryption នៅក្នុងកម្មវិធី app សម្រាប់ការប្រជុំជា videoconferencing របស់ខ្លួន ដើម្បីបន្ថូរបន្ថយនូវការបារម្ភខាងសុវត្ថិភាព ខណៈដែលអ្នកប្រើប្រាស់របស់ខ្លួនបានកើន៥០%នៅក្នុងរយៈពេល៣សប្តាហ៍ចុងក្រោយ។
ក្រុមហ៊ុន Zoom បានបន្ថែមអ្នកប្រើប្រាស់ថ្មីប្រចាំថ្ងៃ១០០លាននាក់ក្នុងរយៈពេល២២ថ្ងៃចុងក្រោយនេះ បើទោះបីក្រុមហ៊ុននេះបានទទួលរងនូវការរិះគន់ច្រើនពីអ្នកជំនាញខាងសន្តិសុខអ៊ីនធឺណិតនិងអ្នកប្រើប្រាស់អំពីបញ្ហាបច្ចេកទេសកូដនិងកង្វះបច្ចេកវិទ្យារក្សាសារសម្ងាត់ អក្ខរបម្លែងឬ encryption នៅក្នុងពេលសរសេរសារតាមឈែត (chat) ក្នុងកម្មវីធីនេះ។
ការប្រើប្រាស់កម្មវិធី Zoom បានកើនឡើងយ៉ាងគំហុកនៅតាមការិយាល័យក្រុមហ៊ុន គណបក្សនយោបាយ សាលារៀន អង្គការនានា និងក្រុមគ្រួសារនៅជុំវិញពិភពលោក ដែលត្រូវធ្វើការពីផ្ទះ ក្រោយពីអាជ្ញាធរចេញវិធានការបិទសកម្មភាពក្នុងប្រទេសនិងសហគមន៍ដើម្បីបន្ថយការឆ្លងរាតត្បាតនៃវីរុសកូរ៉ូណាដែលបណ្តាលឲ្យកើតជំងឺកូវីដ១៩។
ក៏ប៉ុន្តែបញ្ហាបច្ចេកទេសខ្លះរបស់ app នេះ រួមមាន អ្វីដែលគេហៅថា Zoombombing គឺករណីអ្នកដែលមិនត្រូវបានគេអញ្ជើញឲ្យចូលប្រជុំតាម Zoom អាចមានសមត្ថភាពលួចប្រជុំបាន បាននាំឲ្យក្រុមហ៊ុនជាច្រើន សាលារៀន និងស្ថាប័នរដ្ឋាភិបាលឈប់ប្រើប្រាស់កម្មវិធី app នេះ។
ជាការឆ្លើយតប ក្រុមហ៊ុនថា ខ្លួននឹងបញ្ចេញទម្រង់ថ្មីមួយនៃកម្មវិធីនេះដែលមានឈ្មោះថា Zoom 5.0 នៅក្នុងសប្តាហ៍នេះ។
ក្រុមហ៊ុន Zoom ដែលប្រកួតប្រជែងជាមួយកម្មវិធីដូច Teams របស់ក្រុមហ៊ុន Microsoft និង Webex របស់ Cisco ក៏បានចាប់ផ្តើមគម្រោងរ់យៈពេល៩០ថ្ងៃដើម្បីធ្វើឲ្យប្រសើរកម្មវិធីនេះដោយបានតែងតាំងអតីតប្រធានសន្តិសុខរបស់ Facebook មួយរូបឲ្យធ្វើជាទីប្រឹក្សា៕
