មូលនិធិកុមារនៃអង្គការសហប្រជាជាតិ ដែលហៅកាត់ថា UNICEF បានឲ្យដឹងថា មិនមានការយកចិត្តទុកដាក់ឲ្យបានគ្រប់គ្រាន់ទៅលើផលប៉ះពាល់នៃជំងឺកូវីដ១៩ ទៅលើកុមារនោះទេ។ ខណៈដែលមនុស្សចាស់ងាយរងគ្រោះដោយសារជំងឺកូវីដ១៩ នេះ វិធានការចាំបាច់នានាដែលត្រូវបានប្រើប្រាស់ដើម្បីទប់ស្កាត់ការឆ្លងរាលដាលជំងឺកូវីដ១៩ ប្រហែលជាអាចជះផលប៉ះពាល់ខ្លាំងដល់សុខុមាលភាពផ្លូវកាយនិងផ្លូវចិត្តរបស់កុមារនៅទូទាំងពិភពលោកទេ។
របាយការណ៍មួយរបស់អង្គការ UNICEF បានរកឃើញថា វិធានការជាច្រើនដែលមានគោលបំណងទប់ស្កាត់ការឆ្លងរាលដាលវីរុសកូរ៉ូណាគឺចាំបាច់ណាស់ ប៉ុន្តែវិធានការទាំងនោះអាចផ្ដល់ផលប៉ះពាល់យ៉ាងខ្លាំងដល់កុមារ។
លោក Laurence Chandy គឺជាអ្នកនិពន្ធដឹកនាំចងក្រងរបាយការណ៍នេះ និងជានាយកការិយាល័យគោលនយោបាយការយល់ដឹងទូទៅជាសាកលនៃអង្គការ UNICEF។
លោកនិយាយថា មានជីវិតកុមារតិចតួចណាស់ដែលមិនបានរងផលប៉ះពាល់ដោយសារការរាតត្បាតជាសាកលនៃជំងឺកូវីដ១៩នេះ។ លោកបានគូសបញ្ជាក់ថា ៦០% នៃកុមារនៅទូទាំងសាកលលោករស់នៅក្នុងបណ្ដាប្រទេសដែលបានអនុវត្តវិធានការហាមមិនឲ្យពលរដ្ឋចេញពីផ្ទះខ្លះៗ ឬទាំងស្រុងតែម្ដង។
លោក Chandy បានថ្លែងក្នុងសម្ដីដើមយ៉ាងដូច្នេះថា៖ «ការបិទសាលារៀនព្រមៗគ្នាដែលមិនធ្លាប់ធ្វើពីមុនមកនៅទូទាំងពិភពលោកនេះកំពុងតែប៉ះពាល់ដល់កុមារចំនួន ១.៥០០ លាន នាក់។ តួលេខនេះគឺជិតស្មើនឹងចំនួនកុមារទាំងអស់នៅក្នុងពិភពលោកនេះ។ របាយការណ៍នេះក៏បានឲ្យដឹងទៀតថា កុមារជាង ៣៦០ លាននាក់ នៅក្នុងបណ្ដាប្រទេសចំនួន ១៤៣ ពឹងផ្អែកលើអាហារនៅតាមសាលារៀន»។
លោក Chandy ថ្លែងថា កុមារលែងទទួលបានអាហារនៅតាមសាលារៀនទៀតហើយ ដោយសារតែសាលារៀនត្រូវបិទទ្វារ។ សម្រាប់កុមារជាច្រើន អាហារដែលពួកគេទទួលទាននៅសាលារៀនគឺជាអាហារតែមួយពេលគត់ដែលពួកគេបានហូបក្នុងមួយថ្ងៃ។ លោកChandy បានលើកឡើងទៀតថា បណ្ដាសេវាកម្មការពារកុមារក៏ត្រូវបានបិទដំណើរការភាគច្រើនផងដែរ ដែលការណ៍នេះធ្វើឲ្យកុមារត្រូវប្រឈមនឹងអំពើហិង្សាក្នុងគ្រួសារ និងទម្រង់ផ្សេងទៀតនៃការបំពាននិងការកេងប្រវ័ញ្ចនានា។
មកទល់នឹងពេលនេះ វីរុសកូរ៉ូណាមិនបានសម្លាប់កុមារច្រើននាក់នោះទេ។ ប៉ុន្តែលោក Chandy បាននិយាយថា វីរុសនេះបានផ្ដល់ផលប៉ះពាល់ដោយប្រយោលទៅលើសុខភាពរបស់កុមារ ដែលនឹងអាចក្លាយជាគ្រោះមហន្ដរាយ។ លោកបានគូសបញ្ជាក់ថា យុទ្ធនាការចាក់វ៉ាក់សាំងនៅទូទាំងពិភពលោកក៏ត្រូវបានផ្អាកដំណើរការដែរ។
លោក Chandy បានថ្លែងយ៉ាងដូច្នេះថា៖ «ការណ៍នេះនឹងធ្វើឲ្យប៉ះពាល់ដល់យុទ្ធនាការជាសាកលក្នុងការចាក់វ៉ាក់សាំងជំងឺគ្រុនស្វិតដៃជើងអស់រយៈពេលរាប់ឆ្នាំ។ យើងរាប់ឃើញថា មានប្រទេសចំនួន ២៣ នៅទូទាំងពិភពលោកដែលបានផ្អាកដំណើរការចាក់វ៉ាក់សាំងជំងឺកញ្ជ្រឹល។ ផលប៉ះពាល់មួយនៃវិបត្តិសេដ្ឋកិច្ចសាកលលោកនេះគឺបង្កើនចំនួនមរណភាពទារក។ គេព្យាករណ៍ថា នឹងមានអត្រាស្លាប់ថែមទៀតរាប់សែនករណីក្នុងឆ្នាំនេះ ដែលអ្នកស្លាប់ទាំងនោះគឺជាកុមារ»។
អង្គការ UNICEF កំពុងអំពាវនាវឲ្យរដ្ឋាភិបាលនានាផ្ដោតឲ្យបានទូលំទូលាយជាងនេះ មិនត្រូវផ្ដោតតែលើការរាប់ចំនួនករណីឆ្លងនិងករណីស្លាប់ដោយសារជំងឺកូវីដ១៩នោះទេ។ អង្គការនេះបានបញ្ជាក់ថា គេត្រូវការវិធីសាស្ត្រដែលមានតុល្យភាពជាងនេះដើម្បីដោះស្រាយហានិភ័យថ្មី ដែលកើតចេញពីការរាតត្បាតជាសាកលនៃជំងឺកូវីដ១៩ ដែលកំពុងតែគំរាមកំហែងដល់អាយុជីវិតកុមារនៅទូទាំងពិភពលោក៕
ប្រែសម្រួលដោយអ្នកស្រី ហុង ចិន្ដា
