នាយករដ្ឋមន្រ្តីស៊ីមបាវ៉េ (Zimbabwe) លោក មូរកាន ថស្វានគីរាយ (Morgan Tsvangirai) បានថ្កោលទោសប្រឆាំងនឹងការផ្តល់អាជ្ញាប័ណ្ណទៅឲ្យវិទ្យុថ្មី២ ដែលវិទ្យុទាំងនេះត្រូវបានគេសម្គាល់ថាជាអ្នករាយការណ៍គាំទ្រគណបក្សកាន់អំណាច។ កិច្ចព្រងព្រៀងឆ្នាំ២០០៨ដែលបាននាំឲ្យរដ្ឋាភិបាលចម្រុះនេះឡើងកាន់អំណាចបានចែងថា ការផ្សាយតាមរលកអាកាស គួរតែបើកចំហឲ្យដល់ក្រុមដែលមិនមែនពីបណ្តាញផ្សព្វផ្សាយដែលគាំទ្រលោកប្រធានាធិបតី រូបឺត មូកាបេ (Robert Mugabe)។
ក្នុងពេលថ្លែងទៅកាន់ព្រឹទ្ធសភានៅថ្ងៃទី១៥ខែធ្នូ នាយករដ្ឋមន្រ្តី ថស្វានគីរាយ បាននិយាយពីការអភិវឌ្ឍមិនមានសមភាពរបស់ប្រទេសស៊ីមបាវ៉េក្នុងឆ្នាំទី៣នៃរដ្ឋាភិបាលចម្រុះ ដែលរួមមានគណបក្សរបស់លោក គឺគណបក្សចលនាសម្រាប់ការផ្លាស់ប្តូរប្រជាធិបតេយ្យ MDC (Movement for Democratic Change party) និងគណបក្សកាន់អំណាចរបស់ប្រធានាធិបតី មូកាបេ គឺសហភាពប្រជាជាតិអាហ្រ្វិកស៊ីមបាវ៉េ រណសិរ្សសេ្នហាជាតិ (Zimbabwe African National Union – Patriotic Front ឬ ZANU-PF)។
លោកថស្វានគីរាយ បានរិះគន់ជាពិសេសពីការផ្តល់អាជ្ញាប័ណ្ណផ្សព្វផ្សាយទៅឲ្យក្រុមផ្សាយព័ត៌មានចំនួន២ ដែលមានទំនាក់ទំនងយ៉ាងជិតស្និទ្ធជាមួយ ZANU-PF។ អាជ្ញាធរខាងផ្សព្វផ្សាយនៃប្រទេសស៊ីមបាវ៉េ គឺត្រូវបង្កើតដោយមិនបាននិយាយអ្វីពីគណបក្ស MDC ហើយបើតាមការវិភាគផ្នែកនយោបាយមួយចំនួនបាននិយាយថា នេះគឺជាការល្មើសនឹងកិច្ចព្រមព្រៀងនយោបាយជាសាកល ឬ GPA។
ប្រព័ន្ធផ្សព្វផ្សាយអេឡិចត្រូនិកតែមួយគត់ដែលមាននៅក្នុងប្រទេសស៊ីមបាវ៉េ គឺជាស្ថាប័នផ្សព្វផ្សាយរបស់រដ្ឋដែលស្ថិតនៅក្រោមការគ្រប់គ្រងរបស់សាជីវកម្មបណ្តាញផ្សព្វផ្សាយស៊ីមបាវ៉េ (Zimbabwe Broadcasting Corporation, ZBC) ដែលមានវិទ្យុ៤និងស្ថានីយ៍ទូរទស្សន៍ចំនួន២។ វិទ្យុនិងទូរទស្សន៍ទាំងអស់សុទ្ធតែជាអ្នកប្រកាន់គណបក្ស និងជាអ្នកគាំទ្រគណបក្ស ZANU-PF នេះបើយោងតាមគម្រោងឃ្លាំមើលប្រព័ន្ធផ្សព្វផ្សាយរបស់ស៊ីមបាវ៉េ (Media Monitoring Project of Zimbabwe)។
អាជ្ញាធរបណ្តាញផ្សព្វផ្សាយដែលត្រូវបានគេស្គាល់ថា BAZ ថ្មីៗនេះបានពិនិត្យមើលនូវសំណុំពាក្យសុំអាជ្ញាប័ណ្ណទាំង១៣សម្រាប់ការបង្កើតស្ថានីយ៍វិទ្យុជាតិថ្មីចំនួន២។
ដោយមិនបានប្រាប់ពីមូលហេតុ អាជ្ញាប័ណ្ណមួយត្រូវបានគេផ្តល់ទៅឲ្យការិយាល័យថ្មីមួយរបស់កាសែតស៊ីមបាវ៉េ (Zimbabwe Newspapers) ដែលបោះពុម្ពផ្សាយជារៀងរាល់ថ្ងៃនិងផ្តល់នូវការគាំទ្រយ៉ាងពេញទំហឹងទៅឲ្យ ZANU-PF។ រីឯអាជ្ញាប័ណ្ណមួយទៀតត្រូវបានប្រគល់ទៅឲ្យក្រុមមួយដែលដឹកនាំដោយអតីតបុគ្គលិក ZBC ដែលបានគាំទ្រយ៉ាងបើកចំហចំពោះប្រធានាធិបតីមូកាបេ។
«ក្នុងគ្រប់លក្ខខណ្ឌទាំងអស់ វាបានក្លាយជាឆាកកំប្លែងថ្នាក់ជាតិមួយ។ គួរឲ្យដឹងផងដែរថា កំណែទម្រង់ដ៏ទូលំទូលាយលើប្រព័ន្ធផ្សព្វផ្សាយ ដែលក្នុងនោះរួមមានការបញ្ចូលនិងការបន្ថែមនូវការចូលរួមពីបុគ្គលនិងភ្នាក់ងារព័ត៌មានផេ្សងៗឲ្យកាន់តែច្រើនទាំងខាងផ្នែកកាសែតនិងបណ្តាញព័ត៌មានអេឡិចត្រូនិក និងធ្វើការបញ្ឈប់ភ្លាមៗនូវការប្រើពាក្សញុះញង់ឲ្យស្អប់គ្នា គឺជាចំណុចសំខាន់មួយក្នុងចំណោមចំណុចកែទម្រង់សំខាន់ៗទំាងអស់ដែលត្រូវបានរំពឹងទុកនៅក្នុងកិច្ចព្រមព្រៀង GPA និងត្រូវបានយល់ព្រមដោយមេដឹកនាំសំខាន់ៗ។ មកទល់នឹងពេលនេះ គឺមានការមានះមិនគោរពតាមយ៉ាងដាច់អហង្ការពីសំណាក់រដ្ឋមន្ត្រីនិងមន្ត្រីរបស់គាត់ដែលទទួលខុសត្រូវក្នុងរឿងនេះ។»
លោកថស្វានគីរាយ បាននិយាយថា BAZត្រូវបានបង្កើតដោយមិនស្របច្បាប់ នេះបើយោងតាមគោលការណ៍នៃការកែទម្រង់ប្រព័ន្ធផ្សព្វផ្សាយដែលបានចែងនៅក្នុង GPA។
«គណៈនាយករបស់ស្ថាប័នមិនស្របច្បាប់ BAZ សព្វថ្ងៃនេះកំពុងតែសម្រេចសេចក្តីនិងយល់ព្រមផ្តល់ឲ្យអាជ្ញាប័ណ្ណដោយមិនស្របទៅតាមការចែងរបស់ច្បាប់។ គេត្រូវតែបញ្ឈប់ការងាររបស់គណៈនាយកបច្ចុប្បន្នរបស់ BAZ ភ្លាម ហើយអាជ្ញាបណ្ណ័ដែលបានចេញត្រូវតែទុកជានិរាករណ៍ឬលុបចោលឲ្យបានភ្លាមៗ»។
មានគណៈនាយកសាធារណៈមួយចំនួនទៀតទទួលខុសត្រូវក្នុងប្រព័ន្ធផ្សព្វផ្សាយរបស់ស៊ីមបាវ៉េ ហើយលោកថស្វានគីរាយ បានប្រាប់ឲ្យរដ្ឋមន្រ្តីព័ត៌មានរបស់ ZANU-PF ឲ្យរៀបចំគណៈនាយកឡើងវិញឲ្យស្របតាមការព្រមពៀងដែលធ្វើឡើងជាមួយនឹងលោកមូកាបេ កាលពីឆ្នាំមុន។
«គោលនយោបាយលើខ្លឹមសារព័ត៌មានរបស់កាសែតជាតិនិងអ្នកផ្សព្វផ្សាយនៅតែមានសភាពប្រកាន់គណបក្ស និងមិនមានការកែប្រែ ហើយផ្នែកប្រព័ន្ធផ្សព្វផ្សាយនៅតែសិ្ថតនៅក្រោមការគ្រប់គ្រងរបស់រដ្ឋាភិបាលគណបក្សកាន់អំណាចដដែល។ រដ្ឋមន្រ្តីខាងប្រព័ន្ធផ្សព្វផ្សាយ ព័ត៌មាន និងការបោះពុម្ពផ្សាយ គួរតែពិនិត្យសម្រេចនូវការចាត់តាំងគណៈនាយកផ្នែកនេះទាំងអស់។»
ចាប់តាំងពីរដ្ឋាភិបាលចម្រុះឡើងកាន់អំណាចមកកាលពីជិត៣ឆ្នាំមុន គេឃើញមានក្រុមហ៊ុនសារព័ត៌មានឯកជនចំនួនបីបានបង្កើតឡើងនិងចាប់បោះពុម្ពផ្សាយ។ ក្រុមហ៊ុនមួយក្នុងចំណោមនោះបានបិទទ្វាររួចទៅហើយដោយសារបញ្ហាហិរញ្ញវត្ថុ ហើយក្រុមហ៊ុនពីរទៀតបាននិយាយថាការងាររបស់គេធ្វើបានយ៉ាងប្រសើរទាំងការបោះកាសែតនិងការផ្សាយពាណិជ្ជកម្ម៕
ប្រែសម្រួលដោយ៖ សៀក អេង
