អតីតប្រធានាធិបតីប្រទេសស៊ីមបាវ៉េ លោក Robert Mugabe កាលពីថ្ងៃអាទិត្យ រិះគន់គណបក្សនយោបាយដែលលោកបានបង្កើតឡើងថា លោកមិនអាចបោះឆ្នោតឲ្យគណបក្ស ZANU-PF ដែលជាគណបក្សកាន់អំណាច នៅក្នុងការបោះឆ្នោតនៅថ្ងៃចន្ទនេះបានទេ។
ការបោះឆ្នោតនេះគឺជាការបោះឆ្នោតដំបូងបង្អស់រយៈពេល៣៨ឆ្នាំ ដែលគ្មានឈ្មោះលោក Mugabe នៅលើសន្លឹកឆ្នោត ក្នុងនាមជាប្រធានគណបក្ស ZANU-PF។ លោកបានលាលែងពីតំណែងកាលពីខែវិច្ឆិកា ក្រោមសម្ពាធពីយោធា។ អនុប្រធានាធិបតីរយៈពេលយូររបស់លោក គឺលោក Emmerson Mnangagwa វ័យ៧៥ឆ្នាំ បានឡើងកាន់អំណាចបន្ត ហើយឥឡូវនេះកំពុងឈរឈ្មោះជាប្រធានាធិបតីសម្រាប់អាណត្តិថ្មី។
លោក Mugabe បានអញ្ជើញអ្នកកាសែតទៅកាន់ភូមិគ្រឹះ Blue Roof របស់លោក នៅជាយក្រុង Harare ដែលសម្បូរអ្នកមានទ្រព្យសម្បត្តិ។ លោកបាននិយាយយឺតៗដោយឥតអាក់អស់រយៈពេលជាង២ម៉ោង។
នៅពេលសួរចំៗថានរណាដែលលោកនឹងជ្រើសរើសនៅក្នុងការបោះឆ្នោតនៅថ្ងៃចន្ទនេះ លោក Mugabe បានបដិសេធមិនឆ្លើយ។
ថ្វីត្បិតតែបេក្ខជន២៣នាក់បានឈរឈ្មោះជាប្រធានាធិបតីក៏ដោយ ក៏ការបោះឆ្នោតនេះផ្តោតតែលើបេក្ខជនពីរនាក់សំខាន់ប៉ុណ្ណោះ គឺលោក Mnangagwa ត្រូវប្រជែងជាមួយនឹងមេដឹកនាំថ្មីនៃគណបក្សប្រឆាំងដ៏ធំបំផុតគឺលោក Nelson Chamisa វ័យ៤០ឆ្នាំ៕
