ប្រធានាធិបតីអ៊ុយក្រែនលោក Volodymyr Zelensky នឹងថ្លែងសុន្ទរកថាទៅកាន់សភាសហរដ្ឋអាមេរិកនៅថ្ងៃពុធនេះ ស្របពេលដែលប្រធានាធិបតីសហរដ្ឋអាមេរិកលោក Joe Biden ត្រូវគេរំពឹងថា នឹងប្រកាសផ្តល់ជំនួយ៨០០លានដុល្លារនៅក្នុងជំនួយសន្តិសុខថ្មីមួយហើយរដ្ឋ មន្ត្រីការពារជាតិរបស់អង្គការអូតង់ កំពុងជួបប្រជុំគ្នានៅក្នុងទីក្រុងប៊្រុចសែលដើម្បីពិភាក្សាពីការពង្រឹងសន្តិសុខរបស់សម្ព័ន្ធមិត្តបន្ទាប់ពីការឈ្លានពានរបស់រុស្ស៊ីលើប្រទេសអ៊ុយក្រែន។
សុន្ទរកថារបស់លោក Zelensky ត្រូវធ្វើឡើងតាមវីដេអូទៅកាន់ពួកសមាជិកសភាអាមេរិក បន្ទាប់ពីសុន្ទរកថាស្រដៀងគ្នានេះរបស់លោក ទៅកាន់សភាជាន់ទាបរបស់ចក្រភពអង់គ្លេស សភាកាណាដា និងសភាអឺរ៉ុបក្នុងប៉ុន្មានសប្តាហ៍ថ្មីៗនេះ នៅពេលដែលលោកជំរុញឲ្យមានការគាំទ្រខាងយោធានិងមនុស្សធម៌កាន់តែច្រើនឡើងថែមទៀត មកពីសហគមន៍អន្តរជាតិ។
លោកប្រធានាធិបតី Biden មានគម្រោងថ្លែងនៅឯសេតវិមានប៉ុន្មានម៉ោងក្រោយមក ដើម្បីផ្សព្វផ្សាយជំនួយថ្មីដល់ប្រទេសអ៊ុយក្រែន ដែលនឹងបង្កើនជំនួយសរុបទាំងអស់របស់សហ រដ្ឋអាមេរិកក្នុងរយៈពេលមួយសប្តាហ៍កន្លងមកនេះទៅដល់២ពាន់លានដុល្លារ។
លោកប្រធានាធិបតី Biden បានប្រាប់ពួកអ្នកយកព័ត៌មានកាលពីថ្ងៃអង្គារម្សិលមិញថា «ការ ឈ្លានពានរបស់លោក Putin ប្រឆាំងនឹងអ៊ុយក្រែនបានធ្វើឲ្យប្រជាពលរដ្ឋរួបរួមគ្នានៅទូទាំងប្រទេសអាមេរិក»។
លោកBiden មានគម្រោងនឹងចូលរួមសន្និសីទកំពូលជាមួយប្រមុខរដ្ឋផ្សេងទៀតនៅក្នុងទីក្រុងប៊្រុចសែល ដែលនឹងត្រូវធ្វើឡើងនៅថ្ងៃទី២៣ ខែមីនាខាងមុខនេះ ដែលជាខួបរយៈ ពេលមួយខែនៃការចាប់ផ្តើមឈ្លានពានរបស់រុស្ស៊ីទៅលើអ៊ុយក្រែន បន្ទាប់ពីរុស្ស៊ីបានបដិ សេធអស់រយៈពេលជាច្រើនខែថា ខ្លួនគ្មានគម្រោងឈ្លានពានលើអ៊ុយក្រែននោះឡើយ។
អគ្គលេខាធិការអង្គការអូតង់លោក Jens Stoltenberg ដែលបានអំពាវនាវឲ្យមានសន្និសីទកំពូលនេះ បានបញ្ជូនសារតាម Twitter ថា សមាជិករបស់សម្ព័ន្ធមិត្ត «នឹងធ្វើសុន្ទរកថាអំពីការឈ្លានពានរបស់រុស្ស៊ីលើអ៊ុយក្រែន ការគាំទ្រដ៏ខ្លាំងរបស់យើងដល់អ៊ុយក្រែន និងបន្តពង្រឹងការកំញ៉ើញនិងការការពាប្រទេសដែលជាសមាជិករបស់អង្គការអូតង់។
មុនការពិភាក្សាទាំងនោះ រដ្ឋមន្ត្រីការពារជាតិរបស់អង្គការអូតង់ នឹងជួបគ្នាដើម្បីអ្វីដែលលោក Stoltenberg និយាយថា នឹងក្លាយជា«ការពិភាក្សាដ៏សំខាន់ស្តីពីវិធានការដ៏សុក្រិត្យដើម្បីពង្រឹងសន្តិសុខរបស់យើងសម្រាប់រយៈពេលយូរលើគ្រប់វិស័យ»។
លោក បានប្រាប់ពួកអ្នកយកព័ត៌មានថា សកម្មភាពប្រកបដោយសក្តានុពលនោះ អាចរួមមានការដាក់ពង្រាយកងកម្លាំងកាន់តែច្រើនថែមទៀតក្នុងទឹកដីផ្នែកខាងកើតរបស់សម្ព័ន្ធមិត្ត រួមជាមួយការបង្កើនការដាក់ពង្រាយនាវានិងយន្តហោះ ប្រព័ន្ធការពារកាំជ្រួចមីស៊ីលហើយនឹងធ្វើសមយុទ្ធយោធាទ្រង់ទ្រាយធំកាន់តែញឹកញាប់ឡើងថែមទៀត។
រុស្ស៊ី បានជំទាស់ប្រឆាំងវត្តមានរបស់អង្គការអូតង់នៅជិតព្រំដែនរបស់ខ្លួន ហើយបានស្វះ ស្វែងរកការធានាថា អ៊ុយក្រែន នឹងមិនចូលរួមក្នុងអង្គការអូតង់នោះឡើយ។ អង្គការអូតង់ ទទូចថា ប្រទេសនានា មានសេរីភាពដើម្បីធ្វើការសម្រេចដោយខ្លួនឯង អំពីចំណងទាក់ទងខាងសន្តិសុខរបស់ខ្លួន៕
អ្នកស្រី Patsy Widakuswara ប្រធានការិយាល័យរបស់វីអូអេនៅសេតវិមាននិងលោក Jeff Seldin អ្នកយកព័ត៌មានរបស់វីអេអូខាងសន្តិសុខជាតិ បានផ្តល់ព័ត៌មានដល់សេចក្តីរាយ ការណ៍នេះ។ ហើយព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារព័ត៌មាន AP, AFP និង Reuters។
