អង្គការឃ្លាំមើលមួយបានបញ្ជាក់កាលពីថ្ងៃអង្គារម្សិលមិញថា ប្រទេសរុស្ស៊ីបានរៀបចំបញ្ជីឈ្មោះយុទ្ធជនចំនួន ៤០.០០០ នាក់មកពីកងទ័ពស៊ីរីនិងកងជីវពលដែលជាសម្ព័ន្ធមិត្តរបស់ខ្លួន ដើម្បីដាក់ឲ្យប្រុងប្រៀបរៀបចំខ្លួនសម្រាប់ការដាក់ពង្រាយនៅក្នុងប្រទេសអ៊ុយក្រែន។នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
រដ្ឋាភិបាលរុស្ស៊ីបានបញ្ជាក់កាលពីសប្តាហ៍មុនថា ខ្លួនស្វាគមន៍ក្រុមអ្នកស្ម័គ្រចិត្ត ដែលរួមមានទាំងអ្នកស្ម័គ្រចិត្តមកពីប្រទេសស៊ីរីផងដែរ នៅក្នុងការកៀកស្មាជាមួយកងទ័ពរុស្ស៊ីដើម្បីប្រយុទ្ធនៅក្នុងប្រទេសអ៊ុយក្រែន។
អង្គការសិទ្ធិមនុស្ស Syrian Observatory for Human Rights និងសកម្មជននានាបានបញ្ជាក់ថា នៅក្នុងការសម្របសម្រួលជាមួយយោធាស៊ីរីនិងកងជីវពលដែលជាសម្ព័ន្ធមិត្ត ក្រុមមន្ត្រីរុស្ស៊ីបានបង្កើតការិយាល័យចុះឈ្មោះនៅក្នុងតំបន់នានាដែលរបបលោកប្រធានាធិបតី Bashar al-Assad នៃប្រទេសស៊ីរីកាន់កាប់។
លោក Rami Abdel Rahman ប្រធានអង្គការ Syrian Observatory for Human Rights បាននិយាយថា៖ «កន្លងមក មានជនជាតិស៊ីរីជាង ៤០.០០០ នាក់រួចហើយបានចុះឈ្មោះដើម្បីរួមគ្នាជាមួយកងទ័ពរុស្ស៊ីនៅក្នុងការប្រយុទ្ធនៅអ៊ុយក្រែន»។
រដ្ឋាភិបាលរុស្ស៊ីកំពុងជ្រើសរើសពលរដ្ឋស៊ីរីដែលមានបទពិសោធន៍ប្រយុទ្ធក្នុងសង្គ្រាមស៊ីវិល ១១ ឆ្នាំនៅក្នុងប្រទេសស៊ីរី ដើម្បីពង្រឹងការឈ្លានពានរបស់ខ្លួននៅក្នុងប្រទេសអ៊ុយក្រែន៕
