ប្រធានាធិបតីអ៊ុយក្រែនលោក Zelenskyy និយាយថា សមរភូមិនៅទីក្រុង Sievierodenetsk ភាគខាងកើតអ៊ុយក្រែន ជាសង្គ្រាមដ៏ពិបាកបំផុតមួយ ខណៈដែលលោកបានបញ្ជាក់ពីសារៈ សំខាន់របស់សង្គ្រាមនោះនៅក្នុងតំបន់ Donbas។
លោក Zelenskyy បាននិយាយនៅក្នុងសុន្ទរកថាតាមវីដេអូកាលពីយប់ថ្ងៃពុធថា «ក្នុងវិធីជាច្រើន ជោគវាសនារបស់តំបន់ Donbas របស់យើង នឹងត្រូវសម្រេចនៅទីនោះ»។
កងកម្លាំងអ៊ុយក្រែនបានត្រូវបង្ខំដកចេញទៅកាន់ជាយក្រុង Sievierodonets កាលពីថ្ងៃពុធនៅក្នុងការប្រឈមការវាយប្រហារដ៏ខ្លាំងពីកងទ័ពរុស្ស៊ី។
កាលពីប៉ុន្មានថ្ងៃមុន កងទ័ពអ៊ុយក្រែនបានចាប់ផ្តើមធ្វើការវាយប្រហារតបតវិញ ដែលបានធ្វើឱ្យពួកគេត្រួតត្រាទីក្រុងនោះប្រហែលពាក់កណ្តាល ក៏ប៉ុន្តែ អភិបាលតំបន់ Luhansk លោក Serthiy Haidai បានប្រាប់បណ្តាញព័ត៌មានអ៊ុយក្រែន RBC ថា នៅពេលដែលរុស្ស៊ីចាប់ផ្តើមកម្ទេចទីក្រុងនោះដោយការបាញ់ផ្លោងនិងការវាយប្រហារតាមអាកាស យើងមិនត្រូវស្ថិតនៅទីនោះទេ។
លោក Haidai បាននិយាយថា «កងទ័ពរបស់យើងឥឡូវនេះបានត្រួតត្រាជាយក្រុងនោះម្តងទៀតតែប៉ុណ្ណោះ។ ក៏ប៉ុន្តែការប្រយុទ្ធនៅកំពុងបន្ត ហើយកងទ័ពរបស់យើងកំពុងការពារទីក្រុងនេះ ដូច្នេះគេមិនទាន់អាចនិយាយថា ពួករុស្ស៊ីត្រួតត្រាទីក្រុងនោះទាំងស្រុងនោះឡើយ»។
លោកបានទទួលស្គាល់ពីការលំបាករបស់កងទ័ពអ៊ុយក្រែនដោយលោកបានប្រាប់ទីភ្នាក់ងារព័ត៌មាន Associated Press ថា «អ្វីដែលទាហានរុស្ស៊ីមានដូចជាកាំភ្លើងធំ កាំភ្លើងត្បាល់ រថក្រោះ យន្តហោះ ពួកគេកំពុងប្រើប្រាស់នៅក្នុងទីក្រុង Sievierodonetsk ដើម្បីកម្ទេចយើងចេញពីផែនដី ហើយដណ្តើមកាន់កាប់ទីក្រុងនោះទាំងមូល»។
បន្ទាប់ពីការផ្តោតការវាយប្រហាររបស់ខ្លួនអស់រយៈពេលជាច្រើនសប្តាហ៍នៅក្នុងតំបន់ភាគខាងកើតអ៊ុយក្រែនមក រដ្ឋមន្ត្រីការពារជាតិរុស្ស៊ីលោក Sergei Shoigu បាននិយាយកាលពីថ្ងៃអង្គារថា កងទ័ពរុស្ស៊ីឥឡូវនេះបានត្រួតត្រាខេត្ត Luhansk ចំនួន៩៧ភាគរយហើយ។ ទីក្រុង Sievierodonetsk ជាទីក្រុងដ៏សំខាន់ចុងក្រោយបង្អស់នៅក្នុងតំបន់ ដែលមិនទាន់បានកាន់កាប់ទាំងស្រុង នៅក្នុងការវាយប្រហាររយៈពេល៣ខែកន្លះរបស់រដ្ឋាភិបាលក្រុងមូស្គូនោះ។
លោក Shoigu បាននិយាយទៀតថា កងទ័ពរុស្ស៊ីបានរុលឆ្ពោះទៅកាន់ទីប្រជុំជន Popasna ហើយលោកបាននិយាយថា កងទ័ពរុស្ស៊ីបានត្រួតត្រាទីប្រជុំជន Lyman និង Sviatohirsk ហើយនឹងទីប្រជុំជន១៥ផ្សេងទៀតនៅក្នុងតំបន់៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារព័ត៌មាន AP, AFP និង Reuters
លោក Zelenskyy ថា សមរភូមិទីក្រុង Sievierodenetsk ជាសង្គ្រាមមួយដែលមានការពិបាកបំផុត
