ប្រធានាធិបតីអ៊ុយក្រែនលោក Volodymyr Zelenskyy បានសរសើរការងាររបស់កងទ័ពលោកនៅក្នុងតំបន់ Donbas ភាគខាងកើតហើយបាននិយាយថា រុស្ស៊ីមិនបានរំពឹងនឹងជួបការតស៊ូបែបនេះទេ ខណៈដែលរុស្ស៊ីបានអះអាងថាបានត្រួតត្រាខេត្តមួយស្ទើរតែទាំងអស់នៅក្នុងតំបន់ Donbas។
បន្ទាប់ពីការផ្តោតការវាយប្រហាររបស់ខ្លួនអស់រាប់សប្តាហ៍នៅផ្នែកខាងកើតប្រទេសអ៊ុយក្រែនមក រដ្ឋមន្ត្រីការពារជាតិរុស្ស៊ីលោក Sergei Shoigu បាននិយាយកាលពីថ្ងៃអង្គារម្សិល មិញថា កងទ័ពរុស្ស៊ីឥឡូវនេះបានត្រួតត្រាខេត្ត Luhansk ៩៧ភាគរយហើយ។
លោកZelenskyyបាននិយាយនៅសុន្ទរកថាតាមវីដេអូនៅពេលយប់របស់លោកកាលពីថ្ងៃអង្គារថា «ការការពារដ៏អង់អាចក្លាហាននៅតំបន់ Donbasកំពុងបន្ត»។ លោកបានបន្ថែមទៀតថា រុស្ស៊ីមិនបានរុលទៅមុខជាដុំកំភួននៅក្នុងតំបន់នោះទេ ក្នុងរយៈពេលមួយថ្ងៃកន្លងមកនេះទេ។
តំបន់ Donbas ក៏រួមបញ្ចូលខេត្ត Donetsk ផងដែរហើយបានក្លាយជាគោលដៅដ៏សំខាន់មួយសម្រាប់រុស្ស៊ី ចាប់តាំងពីរុស្ស៊ីបង្វែរការខំប្រឹងប្រែងរុលទៅមុខឆ្ពោះទៅកាន់រដ្ឋធានីកៀវកាល ពី២ខែមុន។
ការប្រយុទ្ធបានរីកកាន់តែធំឡើងនៅក្នុងទីក្រុង Sievierodonetsk នៃខេត្តLuhansk ជាទីកន្លែងដែលកងទ័ពរុស្ស៊ីនិងអ៊ុយក្រែនបានពើបប្រយុទ្ធគ្នាពីផ្លូវមួយទៅផ្លូវមួយ។
លោក Shoigu បាននិយាយកាលពីថ្ងៃអង្គារម្សិលមិញថា កងទ័ពរុស្ស៊ីបានកាន់កាប់តំបន់នានានៃទីក្រុង ខណៈដែលអភិបាលខេត្ត Luhansk លោក Serhiy Haidai បាននិយាយថា រុស្ស៊ីបានត្រួតត្រាតំបន់ជាយក្រុងឧស្សាហកម្មមួយនេះ។
លោក Shoigu និយាយថា កងទ័ពរុស្ស៊ីក៏បានរុលទៅមុខឆ្ពោះទៅកាន់ទីប្រជុំជន Popasna ហើយលោកបាននិយាយទៀតថា ពួកគេបានត្រួតត្រាទីប្រជុំជន Lyman និង Sviatohirsk និងទីប្រជុំជន១៥ផ្សេងទៀតនៅក្នុងតំបន់នោះ។
លោក Shoigu បានថ្លែងថា កងទ័ពអ៊ុយក្រែន៦ពាន់៤រយ៨៩នាក់ត្រូវបានចាប់ធ្វើជាចំណាប់ខ្មាំងចាប់តាំងពីកិច្ចប្រតិបត្តិការយោធានៅក្នុងប្រទេសអ៊ុយក្រែនកាលថ្ងៃទី២៤ ខែកុម្ភៈមក រួមទាំងទាហានចំនួន១២៦នាក់ក្នុងរយៈពេល៥ថ្ងៃកន្លងមកនេះផងដែរ។
អ្នកនាំពាក្យក្រសួងការពារជាតិសហរដ្ឋអាមេរិកបាននិយាយកាលពីថ្ងៃអង្គារថា សហរដ្ឋអាមេរិកបានចាប់ផ្តើមហ្វឹកហាត់ទាហានអ៊ុយក្រែនឱ្យចេះប្រើប្រព័ន្ធរ៉ុក្កែតដែលទំនើបជាងមុនដែលត្រូវបានបញ្ជូនទៅឱ្យប្រទេសអ៊ុយក្រែនដែលជាផ្នែកមួយនៃកញ្ចប់ជំនួយដែលមានទឹកប្រាក់៧០០លានដុល្លារដែលត្រូវបានអនុម័តកាលពីសប្តាហ៍មុន៕
