ប្រធានាធិបតីអ៊ុយក្រែនលោក Volodymyr Zelenskyy បានចូលរួមនៅក្នុងកិច្ចប្រជុំកំពូលរបស់សហភាពអឺរ៉ុបនៅទីក្រុង Brussels កាលពីថ្ងៃព្រហស្បតិ៍ ដែលនៅទីនោះ លោកបានអរគុណសមាជិកសហភាពអឺរ៉ុបចំពោះកិច្ចព្រមព្រៀងសន្តិសុខរយៈពេលវែងមួយ ដែលពួកគេរំពឹងថានឹងចុះហត្ថលេខា។ លោក Zelenskyy ក៏បានតឿនឱ្យមានការបញ្ជូនជំនួយយោធា ដែលត្រូវបានសន្យានោះ ឱ្យបានឆាប់ៗផងដែរ។
ក្នុងពេលថតរូបជាមួយប្រធានក្រុមប្រឹក្សាសន្តិសុខអឺរ៉ុប លោក Charles Michel លោក Zelenskyy បានសម្តែងការដឹងគុណចំពោះកញ្ចប់ជំនួយយោធាដែលសហភាពអឺរ៉ុបបានសន្យា ប៉ុន្តែលោកបានបន្ថែមថា យោធាអ៊ុយក្រែននៅក្នុងសមរភូមិ ត្រូវការជំនួយជាបន្ទាន់ ជាពិសេសជំនួយសម្រាប់ការពារដែនអាកាស។
លោកក៏បានថ្លែងអំណរគុណសហភាពអឺរ៉ុប និងក្រុមប្រទេសមានឧស្សាហកម្មធំទាំង៧ (G-7) ចំពោះការសន្យារបស់ពួកគេ ក្នុងការប្រើប្រាស់ទ្រព្យសម្បត្តិបង្កករបស់រុស្ស៊ី ដើម្បីគាំទ្រកិច្ចប្រឹងប្រែងរបស់អ៊ុយក្រែននៅក្នុងការធ្វើសង្គ្រាម។
នៅមុនកិច្ចប្រជុំកំពូល លោក Zelenskyy បានបង្ហោះសារមួយនៅលើបណ្តាញសង្គម X ថា លោករំពឹងថានឹងចុះហត្ថលេខាលើកិច្ចព្រមព្រៀងសន្តិសុខ ៣ ជាមួយបណ្តាប្រទេសដែលជាសមាជិកនៃសហភាពអឺរ៉ុប ដែលមានរួមទាំងកិច្ចព្រមព្រៀងមួយជាមួយសហភាពអឺរ៉ុបផងដែរ។
លោក Zelenskyy បានថ្លែងថា៖ «ជាលើកទីមួយហើយ ដែលកិច្ចព្រមព្រៀងនេះនឹងលើកដំកើងការតាំងចិត្តរបស់សមាជិកទាំង ២៧ នៃសហភាពអឺរ៉ុប ដើម្បីផ្តល់ការគាំទ្រយ៉ាងច្រើន ទោះជាមានការផ្លាស់ប្តូរផ្ទៃក្នុងយ៉ាងណាក៏ដោយ។
ទាក់ទងនឹងកិច្ចចរចាចូលជាសមាជិកសហភាពអឺរ៉ុប លោកបានថ្លែងថា៖ «ជំហាននីមួយៗនឹងនាំយើងកាន់តែខិតទៅជិតគោលដៅប្រវត្តិសាស្ត្ររបស់យើង សម្រាប់សន្តិភាព និង ភាពរុងរឿង នៅក្នុងក្រុមគ្រួសារអឺរ៉ុបរបស់យើង»៕
ព័ត៌មានខ្លះសម្រាប់សេចក្តីរាយការណ៍នេះផ្តល់ដោយទីភ្នាក់ងារសារព័ត៌មាន Associated Press, Reuters និង Agence France-Presse។
វេទិកាបញ្ចេញមតិ