នៅថ្ងៃសុក្រនេះ រដ្ឋមន្ត្រីហិរញ្ញវត្ថុសហរដ្ឋអាមេរិកលោកស្រី Janet Yellen បានជួបជាមួយនាយករដ្ឋមន្ត្រីចិនលោក Li Qiang និងមន្ត្រីចិនឯទៀតៗនៅក្នុងទីក្រុងប៉េកាំង ដែលនៅទីនោះលោកស្រីត្រៀមដោះស្រាយបញ្ហាទាក់ទងគ្នាដ៏រអាក់រអួលរវាងប្រទេសទាំងពីរ។
លោកស្រី Yellen បានអញ្ជើញទៅដល់ទីក្រុងប៉េកាំងកាលពីថ្ងៃព្រហស្បតិ៍។
លោកស្រី Yellen បាននិយាយតាម Twitter ថា៖ «ខ្ញុំរីករាយដោយស្ថិតនៅទីក្រុងប៉េកាំងដើម្បីជួបជាមួយក្រុមមន្ត្រីចិននិងមេដឹកនាំធុរកិច្ច។ យើងស្វះស្វែងឱ្យមានការប្រកួតប្រជែងសេដ្ឋកិច្ចដោយត្រឹមត្រូវដែលផ្តល់ប្រយោជន៍ដល់ក្រុមកម្មករនិងក្រុមហ៊ុនអាមេរិកាំង និងសហការគ្នាអំពីឧបសគ្គសាកល»។
លោកស្រីបានបន្ថែមថា៖ «យើងនឹងធ្វើសកម្មភាពដើម្បីការពារសន្តិសុខជាតិរបស់យើងនៅពេលណាចាំបាច់ ហើយដំណើរទស្សនកិច្ចនេះជាឱកាសមួយដើម្បីទាក់ទងគ្នានិងបញ្ចៀសកុំឱ្យមានកំហុសឬការយល់ច្រឡំ»។
លោកស្រី Yellen បានមានប្រសាសន៍ថា លោកប្រធានាធិបតី Joe Biden «ប្រគល់ភារកិច្ចដល់រដ្ឋបាលលោកឱ្យពង្រឹងការនិយាយទាក់ទងគ្នារវាងប្រទេសយើងទាំងពីរលើបញ្ហាមួយចំនួន ហើយខ្ញុំនឹងបំពេញភារកិច្ចនេះនៅក្នុងឱកាសទស្សនកិច្ចរបស់ខ្ញុំនេះ»។
ក្រុមមន្ត្រីក្រសួងហិរញ្ញវត្ថុបាននិយាយនៅមុនដំណើរទស្សនកិច្ចនេះថា លោកស្រី Yellen នឹងពិភាក្សាអំពីការធ្វើឱ្យសេដ្ឋកិច្ចសាកលមានស្ថិរភាពនិងជំទាស់នឹងការគាំទ្ររបស់ចិនដល់រុស្ស៊ីនៅពេលរុស្ស៊ីលុកលុយអ៊ុយក្រែន។ គេមិនរំពឹងថា លោកស្រី Yellen នឹងជួបជាមួយប្រធានាធិបតីចិនលោក Xi Jinping ទេ៕
(ព័ត៌មានមួយចំនួនសម្រាប់សេចក្តីរាយការណ៍នេះ ដកស្រង់មកពីទីភ្នាក់ងារសារព័ត៌មាន The Associated Press, Agent France-Presse និង Reuters)
