ភ្ជាប់​ទៅ​គេហទំព័រ​ទាក់ទង

មេដឹកនាំ​ពិភពលោក​ធ្វើដំណើរ​ទៅ​អារ៉ាប៊ីសាអូឌីត​នៅ​ក្រោយ​ការ​ចូលទីវង្គត​របស់​ព្រះចៅ Abdullah


ព្រះសព​នៃ​ព្រះចៅ​ Abdullah bin Abdul Aziz ត្រូវ​បាន​គេ​ហែរ​កំឡុង​ពិធីបុណ្យសព​របស់​ទ្រង់​នៅ​ឯ​ព្រះវិហារ Imam Turki Bin Abhullah Grand Mosque ក្នុង​រាជធានី​រ៉ាយ៉ាដ កាលពី​ថ្ងៃទី២៣ ខែមករា ឆ្នាំ២០១៥។​

ក្រុម​មេដឹកនាំ​ពិភពលោកបាន​ធ្វើដំណើរ​ទៅ​កាន់​ប្រទេស​អារ៉ាប៊ីសាអូឌីត (Saudi Arabia) ដើម្បី​សម្តែង​ការ​គោរព​នៅ​ក្រោយ​ការចូល​ទីវង្គត​នៃ​ព្រះ​ចៅ Abdullah។ ទោះណាជា​មាន​ភាព​តានតឹង​រវាង​ប្រទេស​ជាតិ​ទាំង​ពីរ​ក៏​ដោយ​ ក៏លោករដ្ឋមន្ត្រីការបរទេស​ Iran Mohammad Javad Zarif ជា​ឥស្សរជន​ម្នាក់​ក្នុង​បណ្តា​ក្រុម​ឥស្សរជន​បរទេស​ដែល​បាន​ទៅ​ដល់​មុន​គេ​កាល​ពី​ថ្ងៃ​សោរ៍។​

លោក​ប្រធានាធិបតី​ស.រ.អា.បារ៉ាក់អូបាម៉ា​លុបចោល​ទស្សនកិច្ច​មួយ​ក្នុង​ប្រទេស​ឥណ្ឌា​ដើម្បី​ធ្វើដំណើរ​តាម​យន្តហោះ​ទៅ​កាន់​ព្រះ​រាជាណាចក្រ​នេះ​ដែល​គ្រប់គ្រង​ដោយ​ក្រុម​ Sunni នៅ​ថ្ងៃ​អង្គារ។​ លោក​អនុ​ប្រធានាធិបតី​ Joe Biden នឹង​ដឹកនាំ​គណៈប្រតិភូ​មួយ​ក្នុងនាម​លោក​ប្រធានាធិបតី ក៏ប៉ុន្តែ​លោក​នឹង​ឋិត​នៅ​ក្នុង​រដ្ឋធានី​វ៉ាស៊ីនតោន។​

ក្រុម​ឥស្សរជន​ឯទៀតៗ​ដែល​ធ្វើដំណើរ​ទៅ​ដល់​ដើម្បី​សម្តែង​មរណទុក្ខ​និង​ជួបជាមួយ​ព្រះ​ចៅ​អង្គ​ថ្មី​នៃ​ប្រទេស​អារ៉ាប៊ីសាអូឌីត​មាន​ព្រះអង្គម្ចាស់​ Charles និង​លោក​នាយក​រដ្ឋមន្ត្រី​ David Cameron នៃ​ប្រទេស​អង់គ្លេស លោក​ប្រធានាបតី​បារាំង Francois Hollande និង​លោក​ប្រធានាធិបតី Egypte Abdel Fattah el-Sissi។​ វីដេអូ​មួយ​ដែល​គេ​បាន​ផ្សាយ​កាល​ពី​ថ្ងៃ​សៅរ៍​បាន​បង្ហាញ​ឱ្យ​ឃើញ​គណៈប្រតិភូ​អារ៉ាប៊ីសាអូឌីត​មួយ​ទៅ​ទទួលលោក​ប្រធានាធិបតី​នៃ​ប្រទេស​អាហ្វហ្គានីស្ថាន និង​ប្រទេស​ទុយនីស៊ី និង​លោក​អនុប្រធានាធិបតី​នៃ​ប្រទេស​ឥណ្ឌា​និង​ប្រទេស​ឥណ្ឌូនេស៊ី។​

លោក​ប្រធានាធិបតី​ Recep Tayyib Erdogan នៃ​ប្រទេស​ទួរគី​ឋិត​នៅ​ក្នុង​ចំណោម​ក្រុម​មេដឹកនាំ​អ៊ីស្លាម​ដែល​បាន​ចូល​រួម​ក្នុង​ពីធី​បុណ្យ​ព្រះសព​ព្រះ​ចៅ Abdullah កាល​ពី​ថ្ងៃ​សុក្រ​នៅ​ក្នុង​រាជធានី​រីយ៉ាដ (Riyadh)។

ព្រះ​ចៅ​ Abdullah ដែល​មាន​ព្រះជន្ម​៩០​ព្រះ​វស្សា​បាន​សុគត​កាល​ពី​ថ្ងៃ​សុក្រ​ដោយសារ​ជំងឺ​រលាកសួត។ ព្រះ​ចៅ Salman ដែល​ជា​ព្រះអនុជ​មាន​បិតា​រួមគ្នា​របស់​ព្រះអង្គបាន​ទ្បើង​សោយរាជ្យ​ត​ពីព្រះអង្គ៕

XS
SM
MD
LG