ប្រធានក្រុមអ្នកជំនាញអន្តរជាតិដែលកំពុងស៊ើបអង្កេតអំពីប្រភពដើមនៃជំងឺកូវីដ១៩ ក្នុងប្រទេសចិនបានគូសបញ្ជាក់ថា ពួកគេពុំបានរកឃើញនូវភស្តុតាងណាមួយនៃការផ្ទុះរាលដាលក្នុងទ្រង់ទ្រាយធំនៃជំងឺកូវីដ១៩ មុនការរកឃើញជំងឺនេះក្នុងទីក្រុង Wuhan កាលពីខែធ្នូ ឆ្នាំ ២០១៩ នោះទេ។
លោក Peter Ben Embarek អ្នកជំនាញផ្នែកជំងឺឆ្លងដោយវីរុសនៃអង្គការសុខភាពពិភពលោក បាននិយាយនៅថ្ងៃអង្គារម្សិលមិញ ក្នុងទីក្រុង Wuhan ថា ការរកឃើញរបស់ក្រុមការងាររបស់លោកបង្ហាញថា ជំងឺកូវីដ១៩ ប្រហែលជាមានប្រភពដើមមកពីសត្វប្រចៀវ ប៉ុន្តែសត្វប្រចៀវនោះទំនងជាមិនមែននៅក្នុងទីក្រុង Wuhan នោះទេ។
ក្រុមការងារស៊ើបអង្កេតនេះបានធ្វើទស្សនកិច្ចទៅកាន់ផ្សារលក់គ្រឿងសមុទ្រ Huanan ក្នុងទីក្រុង Wuhan ដែលត្រូវបានគេជឿពីដំបូងថា ជាកន្លែងដែលកើតមានការផ្ទុះនូវជំងឺកូវីដ១៩ នេះដំបូងគេ។ ពួកគេក៏បានទៅពិនិត្យវិទ្យាស្ថានវីរុសសាស្ត្រនិងមន្ទីរពិសោធន៍មួយចំនួន ដែលស្ថិតក្នុងអគាររបស់រដ្ឋ ដែលក្នុងនោះរួមមានទាំងមជ្ឈមណ្ឌលត្រួតពិនិត្យជំងឺក្នុងទីក្រុង Wuhan ផងដែរ។
លោក Embarek បានគូសបញ្ជាក់ក្នុងសន្និសីទសារព័ត៌មានមួយថា គោលគំនិតដែលលើកឡើងថាវីរុសកូរ៉ូណាបានលេចធ្លាយចេញពីមន្ទីរពិសោធន៍មួយនោះ គឺមិនអាចទៅរួចទេ ហើយក្រុមអ្នកជំនាញស៊ើបអង្កេតរបស់លោក នឹងមិនស៊ើបអង្កេតរឿងនេះបន្ថែមទៀតនោះទេ។
លោក Embarek លើកឡើងទៀតថា គោលគំនិតដែលទំនងបំផុតនោះគឺវីរុសកូរ៉ូណានេះអាចឆ្លងមកកាន់មនុស្សបាន តាមរយៈប្រភេទសត្វជាអន្តរការី។ លោកក៏បានបន្ថែមផងដែរថា វាអាចទៅរួចផងដែរដែលថា ជំងឺកូវីដ១៩ អាចឆ្លងតាមរយៈផលិតផលដែលត្រូវបានគេដាក់បង្កកនោះ។
ទន្ទឹមនឹងនេះ វេជ្ជបណ្ឌិត Liang Wannian អ្នកជំនាញនៃគណៈកម្មាធិការសុខាភិបាលចិន បានប្រាប់ក្រុមអ្នកព័ត៌មាននៅក្នុងសន្និសីទសារព័ត៌មានថា វីរុសកូរ៉ូណាអាចមានការចម្លងនៅក្នុងតំបន់ផ្សេងទៀត នៅមុនពេលវាត្រូវបានគេរកឃើញជាផ្លូវការក្នុងទីក្រុង Wuhan នោះ៕
