កាលពីថ្ងៃពុធ អង្គការសុខភាពពិភពលោកហៅកាត់ថាអង្គការ WHO បានកំណត់ថានៅពេលនេះការរាលដាលយ៉ាងលឿននៃមេរោគវីរុសកូរ៉ូណាជាការរាតត្បាតសាកលហើយបានព្រមានថា នឹងមានស្ថានភាពអាក្រក់បំផុតថែមទៀតផង។
លោក Tedros Adhanom Ghebreyesus ប្រធាននៃអង្គការ WHO បានមានប្រសាសន៍កាលពីថ្ងៃពុធថា «កាលពីពីរសប្តាហ៍កន្លងទៅនេះចំនួនករណីអ្នកជំងឺ COVID 19 នៅខាងក្រៅប្រទេសចិនបានកើនឡើង១៣ដងហើយចំនួនប្រទេសដែលមានជំងឺនេះបានកើនឡើងបីដងដែរ។ លោក Tedros បាននិយាយថាអង្គការ WHO “ខ្វល់ខ្វាយខ្លាំងដោយសារកម្រិតនៃការរាលដាលនាំឱ្យភ្ញាក់ផ្អើលនិងភាពធ្ងន់ធ្ងរនៃស្ថានភាពនេះនិងដោយសារកម្រិតនាំឱ្យភ្ញាក់ផ្អើលនៃការគ្មានសកម្មភាពផងដែរ»។
លោកបានថ្លែងថា «នៅក្នុងពេលប៉ុន្មានថ្ងៃនិងប៉ុន្មានអាទិត្យខាងមុខនេះ យើងរំពឹងថានឹងឃើញចំនួនករណីអ្នកមានផ្ទុកមេរោគវីរុស COVID-19, ចំនួនមនុស្សស្លាប់និងចំនួនប្រទេសមានជំងឺនេះនឹងកើនឡើងច្រើនជាងមុន»។
រដ្ឋាភិបាលនៅទូទាំងពិភពលោកបានខិតខំព្យាយាមចាត់វិធានការដោះស្រាយបញ្ហារាលដាលនៃមេរោគវីរុសកូរ៉ូណាដែលចាប់តាំងពីខែធ្នូមកបានឆ្លងដល់មនុស្សជាង១សែន១ម៉ឺន៨ពាន់នាក់និងបានបណ្តាលឱ្យមនុស្សប្រមាណ៤ពាន់៣រយនាក់ស្លាប់នៅក្នុងប្រទេស១១៤។
លោក Tedros បានមានប្រសាសន៍ថាអង្គការរបស់លោកបាន «ប្រកាសយ៉ាងខ្លាំងនិងច្បាស់លាស់អំពីភាពអាសន្ននៃការរាលដាលជំងឺនេះហើយ» ហើយថាប្រទេសនានា«នៅតែអាចបង្ក្រាបការរាតត្បាតសាកលនៃជំងឺនេះបាន»។
លោកបានថ្លែងថា ៩០ភាគរយនៃករណីមនុស្សមានផ្ទុកមេរោគវីរុសកូរ៉ូណាមានតែនៅក្នុងប្រទេសបួនប៉ុណ្ណោះ ហើយថា នៅក្នុងប្រទេសពីរក្នុងបណ្តាប្រទេសទាំងនេះគឺប្រទេសចិននិងប្រទេសកូរ៉េខាងត្បូង «មានការចុះថយច្រើនក្រាស់ក្រែលនៃការរាលដាលជំងឺនេះ»។
ជំងឺនេះដែលគេស្គាល់ជាផ្លូវការថា COVID-19 បានកើតមានដំបូងនៅក្នុងប្រទេសចិនដែលនៅទីនោះពួកមន្ត្រីសុខាភិបាលរាយការណ៍កាលពីថ្ងៃពុធថា មានករណីថ្មីៗតែ២៤៕
