ទីផ្សារភាគហ៊ុននៅអាស៊ីនៅក្នុងថ្ងៃអង្គារនេះ បានរើបឡើងវិញមួយថ្ងៃក្រោយពីការបារម្ភរបស់អ្នកវិនិយោគអំពីតម្លៃប្រេងនិងការរីករាលដាលនៃមេរោគកូរ៉ូណាបាននាំឲ្យមានការប្រញាប់ប្រញាល់លក់ភាគហ៊ុនចោលជាទ្រង់ទ្រាយធំកាលពីថ្ងៃចន្ទ។
ផ្សារ Nikkei នៅក្នុងប្រទេសជប៉ុនបានរើបឡើងវិញពីការធ្លាក់ពេលបើទីផ្សារដំបូងមកជាកំណើន១% ខណៈដែលផ្សារ ភាគហ៊ុននៅក្រុងហុងកុងនិងទីក្រុងសាំងហៃនៃប្រទេសចិនបានកើនប្រមាណ២%។
ទីផ្សារ Futures របស់សហរដ្ឋអាមេរិកបានបង្ហាញកំណើននៅមុនការបើកការជួញដូរនៅក្នុងថ្ងៃអង្គារនេះ។
កាលពីថ្ងៃចន្ទ ទីផ្សារភាគហ៊ុននៅទូទាំងពិភពលោកបានធ្លាក់យ៉ាងគំហុក ដោយទីផ្សារសំខាន់ៗនៅទីក្រុងញូវយ៉ក បានធ្លាក់ជាង៧% ទីផ្សារភាគហ៊ុននៅអាស៊ីធ្លាក់ថ្លៃដល់៥% ហើយទីផ្សារហ៊ុននៅអឺរ៉ុបបិទដោយធ្លាក់ប្រហែល៨%។
អ្នកវិនិយោគពេលនោះដែលមានការបារម្ភស្រាប់ពីផ្ទុះរាលដាលនៃមេរោគកូរ៉ូណា Covid-19 មានការបារម្ភថែមទៀតពីការធ្លាក់តម្លៃប្រេងយ៉ាងគំហុក ជាង២០% ក្រោយពីប្រទេសអារ៉ាប៊ីសាអ៊ូឌីតបានចាប់ផ្តើមជម្លោះរឿងតម្លៃប្រទេសជាមួយប្រទេសរុស្ស៊ី ដែលប្រទេសទាំងពីរជាប្រទេសផលិតប្រេងធំជាងគេពីរ។
ព្រឹត្តិការណ៍នេះជាការធ្លាក់តម្លៃប្រេងធ្ងន់ធ្ងរជាងគេបំផុតចាប់តាំងពីសង្គ្រាមឈូងសមុទ្រពែកកាលពីឆ្នាំ១៩៩១ ហើយអ្នកជំនាញបានព្រមានថាតម្លៃប្រេងអាចធ្លាក់ដល់តម្លៃត្រឹមជាង២០ដុល្លារទៀត៕
