ថ្ងៃអង្គារ ទី១ធ្នូនេះ ជាទិវាជំងឺអេដស៍ពិភពលោក ដែលអង្គការជាច្រើននៅលើពិភពលោក តែងបានរៀបចំពិធីផ្សេងៗក្នុងការគាំទ្រអ្នកឆ្លងជំងឺអេដស៍ និងចងចាំអ្នកដែលបានស្លាប់ទៅផងដែរ។
ទិវាជំងឺអេដស៍ក្នុងឆ្នាំនេះ ប្រារព្ធឡើងចំពេលដែលពិភពលោកកំពុងទទួលរងជំងឺរាតត្បាតបង្កឡើងដោយវីរុសកូរ៉ូណា ហើយទីភ្នាក់ងារជំងឺអេដស៍របស់អង្គការសហប្រជាជាតិបានឲ្យដឹងថាអ្នកឆ្លងជំងឺអេដស៍ មានការលំបាកខ្លាំងក្នុងការទទួលបានការពិនិត្យថែទាំសុខភាព និងសេវាផ្សេងៗទៀត ក៏ដូចជាបញ្ហាមួយចំនួនទៀត ដូចជាភាពមិនស្មើគ្នា និងការរើសអើងក្នុងសង្គមជាដើម។
ទីភ្នាក់ងាររបស់អ.ស.ប បានអំពាវនាវឲ្យរដ្ឋាភិបាលនានា លើកកម្ពស់និងធ្វើសកម្មភាពទប់ទល់ប្រឆាំងមេរោគអេសដ៍ និងជំងឺរាតត្បាតដទៃផ្សេងទៀត។ ទីភ្នាក់ងារនេះ បន្ថែមទៀតថា ប្រសិនបើមានប្រព័ន្ធសុវត្ថិភាពសង្គមនិងសុខភាពល្អប្រសើរមួយនោះ ពិភពលោក អាចមានភាពល្អប្រសើរជាងសព្វថ្ងៃនេះ ក្នុងការទប់ទល់និងកាត់បន្ថយការឆ្លងនៃវីរុសកូរ៉ូណា។
អង្គការសហប្រជាជាតិ បានគូសបញ្ជាក់ថាមានការបង្ហាញឲ្យឃើញថាពិភពលោកអាចមានអ្នកឆ្លងជំងឺអេដស៍ថ្មីពីរវាងចំនួន ១២៣.០០០នាក់ ដល់២៩៣.០០០នាក់ និងមានអ្នកស្លាប់ដោយពាក់ព័ន្ធនឹងជំងឺអេដស៍នេះ ពីរង្វង់១៤០.០០០នាក់ ដល់១៤៨.០០០នាក់ត្រឹមឆ្នាំ២០២២ ដោយសារតែផលប៉ះពាល់នៃវីរុសកូរ៉ូណា ទៅលើការឆ្លើយតបនឹងការឆ្លងមេរោគអេដស៍។
បច្ចុប្បន្ននេះ នៅជុំវិញពិភពលោក មានអ្នកឆ្លងជំងឺអេដស៍ប្រមាណ៣៨លាននាក់ ដោយក្នុងនោះចំនួន២៦លាននាក់ បានទទួលការព្យាបាលដោយថ្នាំពន្យារជីវិតផងដែរ។ ក្នុងឆ្នាំ២០១៩ មានមនុស្សប្រមាណ៦៩០.០០០ បានស្លាប់ដោយសារជំងឺអេដស៍៕
