ក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃចន្ទ បានសម្របសម្រួលការចរចាប្រាក់ឈ្នួលអប្បបរមាលើកទី៣ ដោយតំណាងភាគីកម្មករ និងនិយោជក បានបង្ហាញតួលេខខុសៗគ្នាលើការកំណត់ប្រាក់ឈ្នូលអប្បបរមាសម្រាប់ឆ្នាំ២០២៤ក្នុងឧស្សាហកម្មកាត់ដេរ។ នេះបើតាមមេដឹកនាំសហជីព និងសេចក្តីប្រកាសរបស់រដ្ឋាភិបាល។
ក្នុងការចរចាជុំទី៣នោះ តំណាងភាគីនិយោជកថានឹងដំឡើងប្រាក់ឈ្នួលឱ្យកម្មករ១ដុល្លារអាមេរិក បន្ថែមលើប្រាក់ឈ្នួលឆ្នាំ២០២៣ ដែលមានចំនួន២០០ដុល្លារ ខណៈភាគីកម្មករនិយោជិត ចង់បានដល់២១៥ដុល្លារអាមេរិក ដែលមានន័យថា ខាងតំណាងភាគីកម្មករចង់ដំឡើង១៥ដុល្លារបន្ថែមទៀត។
តំណាងភាគីកម្មករលើកហេតុផលថា បើប្រាក់ខែគោលកម្មករទាបជាង២១៥ដុល្លារនោះកម្មករនឹងមិនអាចរស់នៅបានសមរម្យទេ ព្រោះថ្លែទំនិញលើទីផ្សារក៏ចេះតែបន្តកើនឡើង បូករួមការចំណាយផ្សេងៗទៀត។ តំណាងភាគីនិយោជកចង់ដំឡើងត្រឹមតែ១ដុល្លារ ព្រោះស្ថានភាពសេដ្ឋកិច្ចសព្វថ្ងៃមិនអំណោយផល ដល់ផលិតកម្មរបស់ខ្លួន ហើយថា ការដំឡើងចំនួនច្រើនបែបនោះនឹងបង្កការខាតបង់ប្រាក់ចំណេញ។ នេះបើតាមអ្នកពាក់ព័ន្ធក្នុងការចរចាប្រាក់ឈ្នួលសម្រាប់ឆ្នាំ២០២៤។
យ៉ាងណាក៏ដោយ ដោយសារអត្រាអតិផរណា ឬថ្លែទំនិញលើទីផ្សារចេះតែបន្តកើនឡើងនោះ តំណាងភាគីកម្មករយល់ថា លុះត្រាតែកម្មករនិយោជិតអាចទទួលបានប្រាក់ឈ្នួលចន្លោះពី២៥០ ទៅដល់៣៥០ដុល្លារអាមេរិក ទើបពួកគេអាចរស់នៅបានសមរម្យ ដែលស្របទៅតាមស្ថានភាពសេដ្ឋកិច្ចសង្គមបច្ចុប្បន្ន និងស្របតាមច្បាប់ស្តីពីការងារ។
ខណៈមានការផ្តល់តួលេខខុសៗគ្នាពីសំណាក់ភាគីសហជីព និងភាគីថៅកែរោងចក្រ នោះ ភាគីរដ្ឋាភិបាលមិនទាន់បង្ហាញតួលេខជាក់លាក់ណាមួយនៅឡើយទេ ពាក់ព័ន្ធនឹងការកំណត់ប្រាក់ឈ្នួលអប្បបរមាថ្មីនៅឆ្នាំ២០២៤។ នេះបើតាមសេចក្តីប្រកាសព័ត៌មានរបស់ក្រសួងការងារ ចេញផ្សាយកាលពីថ្ងៃទី៤ ខែកញ្ញា។
ប្រធានសម្ព័ន្ធសហជីពកម្ពុជា អ្នកស្រី យ៉ាង សោភ័ណ្ឌ ប្រាប់វីអូអេនៅថ្ងៃអង្គារនេះថា បើទោះបីជាប្រាក់ឈ្នួលអប្បបរមា នៃវិស័យវាយនភណ្ឌកាត់ដេរសម្រាប់ឆ្នាំ២០២៤ ឡើងដល់២១៥ដុល្លារតាមសំណើរបស់តំណាងកម្មករនិយោជិតយ៉ាងណាក្តី ក៏ប្រាក់ឈ្នួលនេះ នៅតែមិនអាចឆ្លើយតបនឹងតម្រូវការរបស់កម្មករនិយោជិតបានដែរ។
អ្នកស្រីថ្លែងថា៖ «ខ្ញុំអាចនិយាយបានថា កម្មករនិយោជិតទទួលបានប្រាក់ឈ្នួលចន្លោះពី២៥០ ទៅដល់៣០០ ឬ៣៥០ ទើបអាច[ឱ្យ] គាត់យកលុយហ្នឹងទៅចាយបាន។ ប៉ុន្តែគ្រាន់ថាមិនទាន់អាចចាយបានគ្រប់គ្រាន់ទេ អត់ទាន់ថា ទៅជាលុយសល់ [ឬ]គាត់ចាយសល់ គឺអត់មានទេ»។
បើតាមអ្នកស្រី យ៉ាង សោភ័ណ្ឌ ច្បាប់ស្តីពីការងារ បានកំណត់ថា ប្រាប់ឈ្នួលអប្បបរមា ត្រូវធានាឱ្យជីវភាពកម្មករនិយោជិត រស់នៅថ្លៃថ្នូរ និងសមរម្យក្នុងសង្គម។ ប៉ុន្តែអ្នកស្រីកត់សម្គាល់ថា បច្ចុប្បន្ន កម្មករ ត្រូវខំធ្វើការថែមម៉ោងដល់យប់ និងថែមម៉ោងចុងសប្តាហ៍និងថ្ងៃបុណ្យ ទើបកម្មករអាចដោះស្រាយសេដ្ឋកិច្ចគ្រួសាររបស់ពួកគេបាន។ អ្នកស្រីរៀបរាប់ទៀតថា កម្មករ ថែមទាំងត្រូវបានបង្ខំឱ្យធ្វើការហួសកម្លាំង ទៅតាមតម្រូវការរោងចក្រសហគ្រាសផងដែរ។
អ្នកស្រីបន្ថែមថា៖ «ប្រាក់ឈ្នួល ដែលគាត់ទទួលបាន២០០ដុល្លារជាងអីនេះ ខ្ញុំគិតថាមិនទាន់អាចឱ្យពួកគាត់យកទៅចាយបាន [និង]រស់នៅបានសមរម្យក្នុងសង្គមរបស់យើងបានទេ ហើយប្រៀបធៀបទៅនឹងអតិផរណាទីផ្សារ [ហើយ]កម្លាំងនៃការធ្វើការងាររបស់កម្មករនិយោជិត គឺឃើញថា សព្វថ្ងៃ គាត់ធ្វើការងារហត់ជាងមុនឆ្ងាយណាស់ ពីព្រោះគេមានកំណត់ចំនួនឱ្យគាត់ធ្វើ ហើយបើគាត់ធ្វើអត់បានទេ គេត្រូវបង្ខំគាត់ ហើយគាត់ត្រូវខំទៅតាមអ្វីដែលគេបង្ខំគាត់អ៊ីចឹង»។
ដូចគ្នានេះដែរ ប្រធានសហភាពការងារកម្ពុជា (CLC) លោក អាត់ ធន់ ប្រាប់វីអូអេថា មូលហេតុដែលតំណាងនិយោជិត កំណត់ត្រឹម២១៥ដុល្លារ គឺដោយសារការទាមទារឱ្យដំឡើងប្រាក់ឈ្នួល គឺមិនអាចទាមទារជាគំហុកបានទេ។ ក៏ប៉ុន្តែ លោកយល់ថា ប្រាក់ឈ្នួលអប្បបរមាគោល ដែលសមរម្យសម្រាប់កម្មករ គឺចន្លោះពី២៥០ទៅ៣០០ដុល្លារអាមេរិក។
លោកថ្លែងថា៖«បច្ចុប្បន្ននៅពេលដែលគាត់ប្រាក់ខែមិនគ្រប់ គាត់បង្ខំចិត្តធ្វើការថែមម៉ោងលើសកំណត់ ហើយធ្វើការថ្ងៃអាទិត្យ ឬថ្ងៃបុណ្យអ្វីផ្សេងៗ។ ហើយតាមពិតទៅ២១៥ [ដុល្លារ]នេះ ក៏វានៅតែតិចនៅឡើយទេ ក៏ប៉ុន្តែយើងអាចនិយាយថា យើងមិនអាចទាមទារសម្រុកតែម្តង រហូតដល់ចំនួនច្រើនតែម្តងបានទេ។ ហើយបើសិនជា មិនបានទទួលប្រាក់ឈ្នួលខ្ពស់បែបហ្នឹង គឺកម្មករពិតជាមានការពិបាកក្នុងការរស់នៅ»។
រហូតមកដល់ពេលនេះ ក្រសួងការងារមិនទាន់បង្ហាញតួលេខដែលភាគីរដ្ឋាភិបាលកំណត់នៅឡើយទេ។
ទោះជាយ៉ាងណា មេដឹកនាំសហជីពលោក អាត់ ធន់ ថា ប្រាក់ឈ្នួលឆ្នាំ២០២៤ ហាក់មិនទាន់មានពន្លឺនឹងទទួលបានច្រើននោះដែរ ប៉ុន្តែលោកនឹងចាំមើលបន្ថែមទៀត ថាតើប្រាក់ឈ្នួលនេះ នឹងកើនឡើងកម្រិតណា ជាពិសេសក្នុងរដ្ឋាភិបាលអាណត្តិថ្មី ដែលដឹកនាំដោយលោកនាយករដ្ឋមន្ត្រី ហ៊ុន ម៉ាណែត។
លោកលើកឡើងថា៖ «ទោះបីយ៉ាងណាក៏ដោយ យើងចាំមើល តើរដ្ឋមន្ត្រីការងារថ្មី និងនាយករដ្ឋមន្ត្រីថ្មី ចង់ផ្ញើសារឬជាកាដូរអ្វីសម្រាប់កម្មករនៅពេលដែលគាត់ចូលកាន់តំណែង។ ហើយបើមិនដូច្នោះទេ វាក៏មិនមែនជាការសាទរពីកម្មករប៉ុន្មានទេ»។
បើតាមលោក អាត់ ធន់ ការចរចាប្រាក់ឈ្នួលនេះ គ្រោងធ្វើឡើងចំនួន៣ដងទៀត គឺនៅថ្ងៃទី១១ និងថ្ងៃទី២៥ ខែកញ្ញា និងថ្ងៃចុងក្រោយគឺថ្ងៃទី២ ខែតុលា ដែលគ្រោងបញ្ចប់ ឱ្យបានមុនថ្ងៃបុណ្យភ្ជុំបិណ្ឌ។
វីអូអេមិនទាន់អាចសុំការអត្ថាធិប្បាយពីអគ្គលេខាធិការសមាគមរោងចក្រកាត់ដេរនៅកម្ពុជា ឬ GMACលោក ខេន លូ បាននៅឡើយទេ។
ប៉ុន្តែលោក ខេន លូ ធ្លាប់ប្រាប់វីអូអេកាលពីពេលថ្មីៗនេះថា សមាគមកំពុងរង់ចាំពិនិត្យលទ្ធផលនៃការចរចាប្រាក់ឈ្នួលនេះ ដោយផ្អែកលើស្ថានភាពសេដ្ឋកិច្ចពិភពលោកដែលកំពុងដំណើរការមិនល្អ ហើយការនាំចេញរបស់កម្ពុជាគិតត្រឹមខែកក្កដាក្នុងឆ្នាំ២០២៣នេះ បានធ្លាក់ចុះជិត២០%។
វីអូអេក៏មិនទាន់អាចសុំការអត្ថាធិប្បាយពីលោក ហេង សួរ រដ្ឋមន្រ្តីក្រសួងការងារបាននៅឡើយដែរ។
យ៉ាងណាក្តី រដ្ឋមន្រ្តីក្រសួងការងាររូបនេះបានឱ្យដឹងថា ក្រសួងការងារ នឹងព្យាយាមសម្របសម្រួលឱ្យភាគីទាំងសងខាង យល់គ្នាទៅវិញទៅមក មុនឈានដល់ការព្រមព្រៀងគ្នាឱ្យបានមុនបុណ្យភ្ជុំបិណ្ឌ។ នេះបើតាមឃ្លីបវីដេអូ មួយដែលបង្ហោះក្នុងគណនីហ្វេសប៊ុកក្រសួងការងារកាលពីថ្ងៃទី៤ ខែកញ្ញា។
លោក ហេង សួរ ថ្លែងប្រាប់អ្នកសារព័ត៌មាន ក្នុងវីដេអូមួយមានរយៈពេលជាង៥នាទីនោះថា៖ «ជារួម គឺយើងជាអ្នកសម្របសម្រួល យើងមានតួលេខ ប៉ុន្តែយើងមិនចង់ឱ្យភាគីទាំងសងខាងផ្តោតលើតួលេខ [ពីភាគីរដ្ឋាភិបាល]ទាំងអស់នោះទេ»។
កាលពីចុងខែសីហា លោកនាយករដ្ឋមន្ត្រី ហ៊ុន ម៉ាណែត បានណែនាំឱ្យក្រសួងការងារនិងបណ្តុះបណ្តាលវិជ្ជាជីវៈ បន្តខិតខំសម្របសម្រួលការពិភាក្សាប្រាក់ឈ្នួលអប្បបរមាក្នុងផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូបសម្រាប់ឆ្នាំ២០២៤ ដោយឈរលើលក្ខណៈវិទ្យាសាស្ត្រ និងលក្ខណៈវិនិច្ឆ័យ ដែលមានចែងក្នុងច្បាប់ស្ដីពីប្រាក់ឈ្នួលអប្បបរមា ឱ្យបានមុនបុណ្យភ្ជុំបិណ្ឌ បើទោះដំឡើងប្រាក់ឈ្នួលកម្មករនិយោជិតបានតិច ឬច្រើនក្តី។
គួរបញ្ជាក់ថា ជារៀងរាល់ឆ្នាំ ក្រសួងការងារ តែងតែសម្របសម្រួល ឱ្យមានការកំណត់ប្រាក់ឈ្នួលគោលសម្រាប់កម្មករនិយោជិតក្នុងវិស័យកាត់ដេរ។ ហើយនៅក្នុងឆ្នាំ២០២៣ ប្រាក់ឈ្នួលគោលអប្បបរមារបស់កម្មករនិយោជិតទទួលបាន២០០ដុល្លារអាមេរិកក្នុងមួយខែ៕
