ក្រុមមេដឹកនាំអង្គការសង្គមស៊ីវិលដែលធ្វើការលើការលើកកម្ពស់សិទ្ធិស្ត្រី នៅថ្ងៃពុធនេះ បានស្នើឲ្យមន្ត្រីអនុវត្តច្បាប់នាំខ្លួនអតីតស្នងការនគរបាលខេត្តកំពង់ធំ លោកអ៊ុក កុសលមកប្រឈមនឹងការកាត់ទោសនៅតុលាការបន្ទាប់ពីអតីតមេប៉ូលិសរូបនេះ ត្រូវបានដកហូតពីតំណែងដោយសាររឿងបៀតបៀនផ្លូវភេទ។
ក្រសួងមហាផ្ទៃបានសម្រេចបញ្ចប់តំណែងលោក អ៊ុក កុសល កាលពីពេលថ្មីៗនេះ ក្រោយពីរកឃើញថាលោកបានប្រព្រឹត្តអំពើបៀតបៀនផ្លូវភេទលើមន្ត្រីនគរបាលដែលជាស្ត្រីនៅស្នងការដា្ឋននគរបាលខេត្តកំពង់ធំ។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា ប្រាប់វីអូអេថា អតីតមេប៉ូលិសរូបនេះគួរតែត្រូវបាននាំខ្លួនមកផ្តន្ទាទោសនៅតុលាការ ពីព្រោះវិធានការរដ្ឋបាល គឺមិនគ្រប់គ្រាន់ ដើម្បីផ្តល់យុត្តិធម៌ដល់ជនរងគ្រោះ។ លោកស្រីអះអាងថាការដាក់ទោសមន្ត្រីនគរបាលជាន់ខ្ពស់រូបនេះគឺជាផ្នែកមួយនៃការឆ្ពោះទៅបញ្ចប់និទណ្ឌភាពនៅកម្ពុជា។
«ចំណាត់ការ(មួយ)ផ្នែកប៉ុណ្ណេះ គឺវាមិនគ្រប់គ្រាន់នោះទេ យើងត្រូវធ្វើទៅតាមនីតិវិធីច្បាប់ ហើយដើម្បីធានាថា រាល់នូវករណីរំលោភបំពាន បែបនេះ គឺរដ្ឋាភិបាលបានយកចិត្តទុកដាក់ ហើយយើងធ្វើទៅតាមនីតិវិធីច្បាប់ ដោយមិនបង្កនូវបរិយាកាសមួយដែលយើងមើលឃើញនូវការបន្តនៃវប្បធម៌និទណ្ឌភាពនោះទេ»។
នាយិកាអង្គការក្លាហានដែលធ្វើការលើសិទ្ធិស្ត្រី កញ្ញា បុណ្យ រចនាផ្តល់យោបល់ស្រដៀងគ្នាដែរថា គួរនាំខ្លួនអតីតមេប៉ូលិសខេត្តកំពង់ធំ លោក អ៊ុក កុសលមកផ្តន្ទាទោស ដោយកញ្ញាយល់ថា អតីតមេប៉ូលិសរូបនេះបានប្រព្រឹត្តបទលើ្មសដែលមានចែងក្នុងក្រមព្រហ្មទណ្ឌកម្ពុជា។
«ការណ៍ដែលនាំយករឿងនេះទៅធ្វើការជំនុំជម្រះ គឺជារឿងដែល...គឺជារឿងត្រឹមត្រូវតាមច្បាប់ ហើយនេះ ជាបទល្មើសព្រហ្មទណ្ឌ។ វាអត់អាចធ្វើការទូទាត់ឬក៏សម្រុះសម្រួលនៅក្រៅតុលាការបានទេច៎ា»។
នាយិការូបនេះលើកឡើងថា បើត្រឹមវិធានការរដ្ឋបាល នោះ មន្ត្រីមានបុណ្យស័ក្តិធំៗផ្សេងទៀត នឹងមិនញញើតចំពោះការប្រព្រឹត្តបទល្មើសនេះបន្តទៀតទេ។
«អ៊ីចឹង នៅពេលដែលបុរសលោកមានអំណាច មានបុណ្យស័ក្តិគាត់ធ្វើអ៊ីចឹង គាត់ថា ធ្ងន់ធ្ងរបំផុតត្រឹមតែអស់តំណែងហ្នឹង មានទៅដល់ជាប់គុក ជាប់ច្រវាក់អី! អីចឹងវាអត់ល្អទេ សម្រាប់សង្គមរបស់យើងហ្នឹងនោះ»។
កាលពីចុងខែកក្កដា លិខិតមួយច្បាប់ដែលជាពាក្យបណ្តឹងរបស់មន្ត្រីនគរបាលជាស្ត្រីបួននាក់ ត្រូវបានគេចែករំលែកតៗគ្នានៅតាមបណ្តាញសង្គម និងត្រូវបានយកមកផ្សព្វផ្សាយដោយបណ្តាញសារព័ត៌មានផងដែរ។ពាក្យបណ្តឹងចុះថ្ងៃទី៣០ ខែកក្កដា និងដែលបានផ្ញើជូនរដ្ឋមន្ត្រីក្រសួងមហាផ្ទៃលោកស ខេងនោះក្រុមនគរបាលជាស្ត្រីបួនរូបនោះ បានចោទប្រកាន់លោក អ៊ុក កុសល ធ្ងន់ៗថាបានលួងលោមមន្ត្រីនគរបាលជាស្ត្រីឲ្យផ្តល់ខ្លួនប្រាណឲ្យលោក ឬ អនុញ្ញាតឲ្យលោកប៉ះពាល់កេរភេទ ជាថ្នូរនឹងការបានឡើងឋានន្តរស័ក្តិ។
មាត្រា២៤៦នៃក្រមព្រហ្មទណ្ឌកម្ពុជាស្តីពីបទប្រទូស្តកេរខ្មាស បានចែងថា៖ «គ្រប់អំពើប៉ះពាល់ ស្ទាបអង្អែលកេរភេទ ឬផ្នែកភេទផ្សេងទៀតរបស់បុគ្គលដទៃ តែបុគ្គលនេះមិនស្ម័គ្រផងទេ ឬបង្ខំបុគ្គលដទៃឲ្យប្រព្រឹត្តអំពើនេះមកលើខ្លួន ឬទៅលើតតិយបុគ្គលក្នុងគោលបំណងធ្វើឲ្យរំជួល ឬរីករាយដល់ចំណង់ផ្លូវភេទរបស់ជនល្មើសគឺជាអំពើប្រទូស្តកេរខ្មាស»។
បទល្មើសនេះ អាចត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់ពីពីរលានរៀល ទៅប្រាំមួយលានរៀល។
វីអូអេមិនទាន់អាចសុំការអធិប្បាយពីអតីតស្នងការនគរបាលខេត្តកំពង់ធំលោក អ៊ុក កុសលបានទេ ដោយទូរស័ព្ទរោទិ៍គ្មានអ្នកទទួល។វីអូអេក៏មិនទាន់អាចទាក់ទងសុំការអត្ថាធិប្បាយពីមន្ត្រីនគរបាលជាស្ត្រីដែលប្តឹងលោក អ៊ុក កុសល ផងដែរ។
ក្រោយបែកធ្លាយពាក្យបណ្តឹងរបស់មន្ត្រីនគរបាលជាស្ត្រីនៅខេត្តកំពង់ធំលោកអ៊ុក កុសល បានបកស្រាយក្នុងឃ្លីបវីដូអេមួយថា បណ្តឹងប្រឆាំងនឹងលោកនោះកើតឡើងដោយ«មានការរៀបចំជាប្រព័ន្ធ និងមានសេណារីយ៉ូ» ដើម្បីធ្វើបាបរូបលោក ក្នុងគោលដៅឲ្យលោកបាត់បង់តំណែងជាស្នងការ។
លោកនាយឧត្តមសេនីយ៍ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា លោកសូមស្វាគមន៍ទទួលយកយោបល់របស់ក្រុមសង្គមស៊ីវិល ទាក់ទងនឹងវិធានការផ្លូវច្បាប់ប្រឆាំងលោក អ៊ុក កុសល ដែលត្រូវរដ្ឋមន្ត្រីក្រសួងមហាផ្ទៃដកចេញពីមុខតំណែងកាលពីថ្ងៃច័ន្ទ។
យ៉ាងណាក៏ដោយលោកយល់ថាវិធានការដកហូតបុណ្យស័ក្តិនេះ គឺវាគ្រប់គ្រាន់ និងធ្ងន់រួចទៅហើយសម្រាប់មន្ត្រីនគរបាលនោះ។ លោកបន្ថែមថា ក្រសួងក៏បានដាក់សំណើទៅរដ្ឋាភិបាលឲ្យបន្ថយឋានន្តរស័ក្តិលោកអ៊ុក កុសល ពីថ្នាក់ឧត្តមសេនីយ៍ទោ(ផ្កាយពីរ)មកត្រឹមថ្នាក់វរសេនីយ៍ឯក(ស័ក្តិប្រាំ)ផងដែរ។
«ការលើកយោបល់សម្តែងមតិអ៊ីចឹង វាមិនអីជាការខុសច្បាប់ទេ គ្រាន់ថាសូមជម្រាបជូនថាការណ៍ដែលប្តឹងទៅតុលាការនេះ ក៏វាអាចបញ្ជូនធ្វើទៅបានដែរប៉ុន្តែខ្ញុំគិតថា ការដោះស្រាយប៉ុណ្ណោះ គឺជារឿងមួយដែលវាធ្ងន់សមរម្យដែរសម្រាប់មន្ត្រីនគរបាលព្រោះថា មិនត្រឹមតែបញ្ឈប់ពីតំណែងទេ គឺបានស្នើសុំទៅរាជរដ្ឋាភិបាល ដើម្បីបញ្ចុះឋានន្តរស័ក្តិ សាមីខ្លួនពីរថ្នាក់ទៀត បានសេចក្តីថា ពីផ្កាយពីរ មកនៅត្រឹមស័ក្តិប្រាំ ហើយខ្ញុំគិតថា នេះជាសារមួយយ៉ាងធ្ងន់ដែរចំពោះកងនគរបាលជាតិទាំងមូល»។
លោកនាយឧត្តមសេនីយ៍នេត សាវឿន អគ្គស្នងការនគរបាលជាតិ បានប្រាប់បណ្តាញព័ត៌មានក្នុងស្រុកមួយកាលពីថ្ងៃអង្គារថាសំណុំរឿងលោក អ៊ុក កុសល មិនអាចបញ្ជូនទៅតុលាការបានទេ ដោយសារតែ«អាជ្ញាធរលំបាកក្នុងការចងក្រងឯកសារ និងធាតុផ្សំនៃរឿង...និងដើម្បីការពារសេចក្តីថ្លៃថ្នូររបស់ជនរងគ្រោះជានគរបាលស្ត្រីទាំងនោះផងដែរ»។
លោក ស៊ឹង សែនករុណា មន្ត្រីសិទ្ធិមនុស្សជាន់ខ្ពស់នៃសមាគមការពារសិទ្ធិមនុស្សអាហុក គាំទ្រឲ្យមានវិធានការច្បាប់ លើអតីតស្នងការប៉ូលិសខេត្តកំពង់ធំដើម្បីព្រមានដល់មន្ត្រីមានបុណ្យស័ក្តិផ្សេងទៀត មិនឲ្យឆ្លៀតប្រព្រឹត្តអំពើអសីលធម៌បែបនេះមកលើមន្ត្រីក្រោមបង្គាប់របស់ខ្លួន។
«បើមិនមានចំណាត់ការបែបនេះយើងព្រួយបារម្ភថាលើកក្រោយៗអ្នកដែលមានតួនាទីមានឥទ្ធិពល មានអំណាបែបហ្នឹង ចេះតែប្រព្រឹត្តនូវអំពើល្មើសច្បាប់ លើ្មសសីលធម៌អីបែបហ្នឹង»៕
