ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ស្នង​ការ​ខេត្ត​កំពង់ធំ​ការពារ​ខ្លួន​ថា​ មាន​គេ​ចង់​ធ្វើ​បាប ​ទើប​មាន​ការ​ចោទ​ប្រកាន់​រឿង​បៀតបៀន​​ផ្លូវ​ភេទ


លោក អ៊ុក កុសល​ ស្នង​ការ​នគរបាល​ខេត្ត​កំពង់​ធំ ត្រូវបានក្រុម​មន្ត្រី​នគរបាល​ជា​នារី​​ ​ប្តឹង​ថាបាន​ប្រព្រឹត្ត​អំពើ​បៀត​បៀនកេរ​ខ្មាស​។ (រូបដកស្រង់ពីបណ្តាញសង្គម)

ស្នងការ​នគរបាល​ខេត្ត​កំពង់​ធំ​ដែល​ត្រូវ​បាន​ព្យួរ​ការងារ លោក ​អ៊ុក កុសល បាន​ចេញ​មុខ​បក​ស្រាយ​ថា​ មាន​គេ​ចង់​ធ្វើ​បាប​រូប​លោក​ ដូច្នេះ​ហើយ​ទើប​មាន​ពាក្យ​បណ្តឹង​ចោទ​ប្រកាន់​លោក​ ទាក់ទង​នឹង​ការ​បៀត​បៀន​ផ្លូវ​ភេទ។​

ចាប់​តាំង​ពី​ដើម​សប្តាហ៍​នេះ សារព័ត៌មាន​និង​អ្នក​ប្រើប្រាស់ប្រព័ន្ធ​សង្គម​ហ្វេសប៊ុកបាន​ចាប់​ផ្តើម​ចុះ​ផ្សាយ​អំពី​ពាក្យ​បណ្តឹង​របស់​ស្រ្តី​ ៤​រូប​ ដែល​ជា​មន្រ្តីធ្វើ​ការ​នៅ​ស្នងការ​ដ្ឋាន​នគរបាល​ខេត្ត​កំពង់ធំ។​ ពួក​គេ​បាន​ចោទ​ប្រកាន់ថា លោក ​អ៊ុក កុសល​ បាន​លួង​លោម​មន្ត្រី​នគរបាល​ជាស្ត្រី​ឲ្យ​ផ្តល់​ខ្លួន​ប្រាណ​ឲ្យ​លោក​ ឬ​អនុញ្ញាត​ឲ្យ​លោក​ប៉ះ​ពាល់​កេរ​ភេទ​ ជាថ្នូរ​នឹង​ការ​បាន​ឡើង​ឋានន្តរ​ស័ក្តិ។​ ពាក្យ​បណ្តឹង​នេះ​បញ្ជាក់​ថា ក្រៅពី​ពាក្យ​សម្តី​លួងលោម​ លោក​ក៏បាន​ចាប់​បង្ខំ​ស្ទាប​អង្អែល​កេរខ្មាស​ ដោយ​មិន​ញញើត។​

កាល​ពី​ថ្ងៃ​ព្រហស្បតិ៍​ លោក ​អ៊ុក​ កុសល ​ដែល​រង​ការ​ចោទ​ប្រកាន់​បាន​ចេញ​មុខ​បក​ស្រាយ​នៅ​ក្នុង​វីដេអូមួយ​ជាង​ ១៧នាទី​ ដែល​ត្រូវបាន​បង្ហោះលើ​បណ្តាញ​សង្គម ​និង​សារព័ត៌មាន​ Freshnews។

លោក ​អ៊ុក កុសល​ បាន​លើក​ឡើង​ថា បណ្តឹង​នេះ​កើត​ឡើង​ដោយ​ «មាន​ការ​រៀបចំ​ជាប្រព័ន្ធ​និង​មាន​សេណារីយ៉ូ»​ ដើម្បី​ធ្វើ​បាប​រូប​លោក ​ក្នុង​គោល​ដៅ​ឲ្យ​លោក​បាត់​បង់​តំណែង​ជា​ស្នងការ។​

លោក​មាន​ប្រសាសន៍​ថា៖​ «ខ្ញុំ​អះអាង​ថា​ជា​ការ​រៀបចំ​ជា​ប្រព័ន្ធ​ ដើម្បី​ផ្តួល​រំលំ​រូប​ខ្ញុំ​បាទ ​ឲ្យ​ចេញខ្ទាត​ឆ្ងាយពី​ឋានៈ​ជាស្នងការនគរបាល​ខេត្ត​កំពង់ធំ»។​

លោក​ឲ្យ​ដឹង​ថា​ នេះ​ការ​រៀប​ចំ​ដោយ​បុគ្គល​មួយ​ចំនួន​ ហើយ​លោក​មាន​ភ័ស្តុតាង ប៉ុន្តែ​លោក​ថា មិន​អាច​បញ្ចេញ​បាន​ទេ​ ព្រោះ​ទាក់​ទង​នឹង​ផ្លូវ​ច្បាប់​កិត្តិយស​ និង​ការ​លាក់​ការ​សម្ងាត់​របស់​សាក្សី ​និង​អ្នក​ផ្តល់​ព័ត៌មាន។​ លោក​បន្ត​ថា ការ​ដែល​ស្រ្តី​ទាំង​នេះ​ប្តឹង​ប្រហែល​ដោយ​ការខឹង​សម្បារ ​ឬ​ការ​អូស​ទាញ​របស់​ក្រុម​ណា​មួយ​ ដែល​លោក​ថា ស្អប់​រូប​លោក ​និងឆ្លៀត​ឱកាស​កេង​ចំណេញ។​

លោក ​អ៊ុក កុសល ​ឲ្យ​ដឹង​ទៀត​ថា ​លោក​មិន​បាន​ចេញ​បក​ស្រាយ​ភ្លាមៗ​ ដោយ​សារ​រង់​ចាំ​គោល​ការណ៍​របស់​ថ្នាក់​ដឹកនាំ​របស់​លោក​ជាមុន​សិន ​គឺ​លោក​ ស ខេង​ រដ្ឋមន្រ្តី​ក្រសួង​មហាផ្ទៃ ​និង​លោក​ នេត សាវឿន​ អគ្គស្នងការ​នគរបាល​ជាតិ​ មុន​នឹង​ចេញ​មុខ​បក​ស្រាយ។ លោក​ថា ការ​ស៊ើប​អង្កេត​របស់​ក្រសួង​មហាផ្ទៃ​ នឹង​ផ្តល់​យុត្តិធម៌​ដល់​រូប​លោក ​និង​បញ្ចប់​រឿង​រ៉ាវ​ដែល​កើត​មាន​កន្លង​មក។​

លោក​បញ្ជាក់​ថា៖​ «ខ្ញុំ​រង់​ចាំចំណាត់​ការ​របស់​ក្រុម​ការងារ​ ដើម្បី​ខ្ញុំ​ទទួល​បាន​ភាព​យុត្តិធម៌​ដែរ»។​

នាយក​រង​ទទួល​បន្ទុក​ឃ្លាំ​មើល​ និង​ការពារ​សិទ្ធិ​មនុស្ស​ នៃ​អង្គការ​លីកាដូ​ លោក អំ សំអាត​ មាន​ប្រសាសន៍​ថា​ ដោយសារ​មាន​ការ​អះអាង​ផ្ទុយ​គ្នា​ ដូច្នេះ​ត្រូវ​តែ​មាន​ «ការ​ស៊ើប​អង្កេត​មួយ​ដោយ​តម្លាភាព​ឯករាជ្យ​ និង​យុត្តិធម៌»​ ដើម្បី​ស្វែង​រក​ការ​ពិត​ និង​យុត្តិធម៌​គ្រប់​ភាគី។​

ដោយសារ​មាន​ពាក្យ​បណ្តឹង​រឿង​បៀត​បៀន​ផ្លូវ​ភេទ​នេះ រដ្ឋមន្រ្តី​ក្រសួង​មហាផ្ទៃ​បាន​សម្រេច​ផ្អាក​ការងារ​របស់​លោក អ៊ុក កុសល​ ជា​បណ្តោះ​អាសន្ន។​ នេះ​បើ​តាម​សេចក្តី​សម្រេច​មួយ ​ចុះ​ថ្ងៃ​ទី​១២​ ខែ​សីហា។​ ក្រសួង​មហា​ផ្ទៃ​បញ្ជា​ឲ្យ​លោក អ៊ុក កុសល ត្រូវ​បង្ហាញ​ខ្លួន​នៅ​នាយកដ្ឋាន​បុគ្គលិក​រៀង​រាល់​ម៉ោង​ធ្វើការ ដើម្បី​រង់​ចាំ​ការ​សម្រេច​ជា​ថ្មី៕

តួលេខនៃករណីឆ្លងជំងឺកូវីដ១៩

XS
SM
MD
LG