ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្បួន​ដើរ​តវ៉ា​របស់​ក្រុម​ស្ត្រី​បន្ត​ទៅ​ដល់​ទីក្រុង Las Vegas និង​ទីក្រុង​នានា​ក្នុង​ទ្វីប​អ៊ឺរ៉ុប


មនុស្ស​ម្នា​កាន់​ស្លាក​សញ្ញា​នៅ​ក្នុង​ការ​ប្រមូល​ផ្តុំ​ការ​ដើរ​ក្បួន​ស្ត្រី​មួយ​នៅ​ក្នុង​ក្រុង Las Vegas កាលពី​ថ្ងៃទី២១ ខែមករា ឆ្នាំ២០១៨។

នៅ​ប៉ុន្មាន​ម៉ោង​មុន​នេះ​ ក្បួ​នដើរ​តវ៉ា​របស់​ស្ត្រី​រាប់ពាន់អ្នក​បាន​ធ្វើឡើង​នៅក្នុង​ទីក្រុង​ឡុងដ៏​ ទីក្រុងប៉ារីស​ ស៊ីដនី​ និង​ទីក្រុង​ផ្សេងៗ​ទៀត​ក្នុង​ទ្វីបអ៊ឺរ៉ុប​ និង​ប្រទេសអូស្ត្រាលី ដែល​មាន​បំណង​គាំទ្រ​ និង​សាមគ្គី​ជាមួយ​នឹង​ការ​ដើរក្បួន​របស់​ក្រុម​ស្ត្រី​នៅ​ក្នុង​សហរដ្ឋ​អាមេរិក។ ពួកគេ​ជាច្រើន​តវ៉ា​ប្រឆាំង​នឹង​រដ្ឋបាល​លោក​ប្រធានាធិបតី Donald Trump។

ក្បួន​ដើរ​តវ៉ា​របស់​ស្ត្រី​ក្នុង​ឆ្នាំ២០១៨នេះ​ បាន​ធ្វើឡើង​នៅ​ចំថ្ងៃ​គម្រប់​ខួប​មួយ​ឆ្នាំនៃ​ការ​ស្បថ​ចូល​កាន់តំណែង​ជា​ប្រធានាធិបតី​របស់​លោក Trump។ បាតុករ​ជាច្រើន​បាន​កាន់​បដា​ និង​ស្លៀកពាក់​រិះគន់​ដល់​លោក Trump មាន​ដូចជា​ស្លៀកពាក់​ និង​ពាក់មួក​ស្រួច​សងខាង​ពណ៌ផ្កាឈូក​ជាដើម​ ក្នុង​ន័យ​រិះគន់​ទៅលើ​ប្រវត្តិ​មិនល្អ​របស់​លោក Trump មុន​នឹង​លោក​ធ្វើ​ជាប្រធានាធិបតី។ លោក Trump ត្រូវ​បាន​គេរិះគន់​ថា​បាន​បៀតបៀន​ផ្លូវភេទ​ទៅលើ​ស្ត្រី​យ៉ាងហោច​ណាស់​ចំនួន១៩នាក់។ ប៉ុន្តែ​សេតវិមាន​បានច្រាន​ចោល​ការចោទ​ប្រកាន់​ទាំងនោះ។

ការដើរក្បួនតវ៉ានេះ​ មិនមែន​ដើម្បី​ទាមទារ​តែ​សិទ្ធិស្មើ​របស់​ស្ត្រី​ប៉ុណ្ណោះ​ ក៏ប៉ុន្តែ​ពួកអ្នក​តវ៉ា​បាន​ទាមទារ​ឲ្យ​មាន​ដំណោះស្រាយ​លើ​បញ្ហា​ផ្សេងៗ​ជាច្រើន​ទៀត។

មាន​អ្នកតវ៉ា​ច្រើនជាង១២ម៉ឺននាក់​ បាន​ចេញ​តវ៉ា​កាល​ពី​ថ្ងៃសៅរ៍​នៅក្នុង​តំបន់ Manhattan ខណៈ​មាន​អ្នកតវ៉ា​រាប់សែននាក់​ផ្សេងទៀត​ដើរក្បួន​តវ៉ានៅ​ក្នុងទីក្រុង​ផ្សេងៗ​នៅ​ទូទាំងសហរដ្ឋអាមេរិក​ ទាមទារ​ឲ្យ​មាន​សិទ្ធិ​ស្មើ​គ្នា​នៅក្នុង​ការ​ទទួល​បាន​ប្រាក់កម្រៃ​ និង​សិទ្ធិ​ស្មើគ្នា​ក្នុងការ​ទទួល​បាន​សេវា​ថែទាំ​សុខភាព​ លុបបំបាត់​ការបៀតបៀន​ផ្លូវភេទ និង​លើកទឹក​ចិត្ត​ដល់​ស្ត្រី​ឲ្យ​ធ្វើ​ជា​អ្នកដឹកនាំ៕

XS
SM
MD
LG