នៅពេលអង់គ្លេសចាកចេញពីសហភាពអឺរ៉ុបដោយអ្នកខ្លះសោកស្តាយផងសប្បាយផងនោះ ជនជាតិអឺរ៉ុបជាច្រើនមិនបានយកចិត្តទុកដាក់ខ្លាំងចំពោះបញ្ហាដែលអូសបន្លាយយូរមកហើយនេះទេ។
ការចាកចេញរបស់អង់គ្លេសពីសហភាពអឺរ៉ុបអាចបណ្តាលឱ្យមានការរញ្ជួយខាងនយោបាយនៅទីក្រុងប្រ៊ុចសែល ប្រទេសប៊ែលហ្ស៊ិ ប៉ុន្តែវាមិនជារឿងធំទេនៅក្រុងប៉ារីសប្រទេសបារាំង។ អ្នកជំនួញជនជាតិបារាំងលោកស្រី Meriela Masson និយាយថា៖ «ជាអកុសលខ្ញុំមិនមានពេលវេលាដើម្បីគិតអំពីបញ្ហានេះទេ ដោយសារតែការងាររបស់ខ្ញុំនិងដោយសារបញ្ហាជាច្រើនដែលកំពុងកើតឡើងនៅក្នុងប្រទេសរបស់យើងផងដែរ»។
លោកស្រី Masson ធ្លាប់ធ្វើការនៅទីក្រុងឡុងដ៍ ប៉ុន្តែអ្នកស្រីពិបាកស្វែងយល់អំពីការចាកចេញរបស់អង់គ្លេសពីសហភាពអ៊ឺរ៉ុបនៅពេលអ្នកស្រីនៅប្រទេសបារាំងជាស្រុកកំណើត។
អ្នកស្រីថា៖ «ខ្ញុំមិនបានតាមដានព័ត៌មានទាក់ទងនឹង Brexit ទេ ដូច្នេះខ្ញុំគ្មានតម្រុយអំពីរឿងនេះទេ»។
ជនជាតិបារាំងនិងអឺរ៉ុបផ្សេងទៀតមានបញ្ហាផ្ទាល់ខ្លួនដើម្បីដោះស្រាយ ដូចជាការតវ៉ាប្រឆាំងនឹងកំណែទម្រង់ប្រាក់សោធនិវត្តន៍ ការរីករាលដាលនៃមេរោគឆ្លងពីប្រទេសចិន។ អ្នកស្រី Masson និយាយថា៖ «ខ្ញុំគិតថា អារម្មណ៍ដំបូងដែលជនជាតិអឺរ៉ុបគិតអំពី Brexit គឺភាពសោកសៅ ពីព្រោះវាជាចុងបញ្ចប់នៃអ្វីដែលយើងបានធ្វើរួមគ្នាអស់រយៈពេលជិតកន្លះសតវត្សរ៍មកហើយ»៕
