ប្រទេសឥណ្ឌាមានមោទនភាពចំពោះខ្លួនឯងដែលបានធ្វើឲ្យលំហាត់ប្រាណយោគៈ (yoga) និងការធ្វើសមាធិ មានប្រជាប្រិយនៅតាមប្រទេសជាច្រើនក្នុងពិភពលោក។ ឥឡូវនេះ ឥណ្ឌាកំពុងសម្លឹងមើលថាតើវិធីសំពះជាលក្ខណៈប្រពៃណីរបស់ខ្លួន ដែលហៅថា Namaste ដែលត្រូវបានគេពិពណ៌នាថាអាច «ទប់ស្កាត់ការឆ្លងមេរោគបាន» ត្រូវគេយកទៅអនុវត្តជាសាកលឬក៏អត់ ស្របពេលដែលមេដឹកនាំមួយចំនួននៅលើពិភពលោកបានបាប់ផ្តើមប្រើវិធីនេះនៅក្នុងស្ថានការណ៍ដែលមានការឆ្លងរាលដាលមេរោគកូរ៉ូណាថ្មីជាសាកល។
ស្របពេលដែលអាជ្ញាធរនានាណែនាំប្រជាពលរដ្ឋឲ្យជៀសវាងការស្វាគមន៍បែបចាប់ដៃគ្នាដើម្បីទប់ស្កាត់ការឆ្លងរាលដាលនៃមេរោគដែលងាយស្រួលឆ្លងនេះ ប្រធានាធិបតីសហរដ្ឋអាមេរិកលោក Donald Trump ប្រធានាធិបតីបារាំងលោក Emmanuel Macron និងព្រះអង្គម្ចាស់ Charles នៃចក្រភពអង់គ្លេស កាលពីពេលថ្មីៗនេះបានប្រើវិធីជម្រាបសួរស្រដៀងទៅនឹងវិធីសំពះរបស់ឥណ្ឌា។
ពាក្យ «Namaste» ដែលជាពាក្យសំស្ក្រឹតពីរបញ្ចូលគ្នា មានន័យថា «ការឱនគោរពអ្នក»។ ការសំពះនេះមិនមានការប៉ះស្បែកគ្នាទេ និងអនុញ្ញាតឲ្យមនុស្សអាចរក្សាគម្លាតពីគ្នាបាន។
លោកប្រធានាធិបតីMacron របស់បារាំងបានលើកដៃសំពះបែបប្រពៃណីឥណ្ឌា និងឱនលំទោនបន្តិច នៅពេលលោកជម្រាបសួរព្រះមហាក្សត្រ Felipe និងព្រះមហាក្សត្រីយានី Letizia នៃប្រទេសអេស្ប៉ាញ នៅវិមានប្រធានាធិបតី Elysee Palace ក្នុងទីក្រុងប៉ារីស ប្រទេសបារាំង កាលពីថ្ងៃទី ១១ ខែមីនាកន្លងទៅនេះ។
ឯកអគ្គរដ្ឋទូតបារាំងប្រចាំទីក្រុងញូវដេលី ប្រទេសឥណ្ឌា លោក Emmanuel Lenain បានសរសេរនៅលើ Twitter ថា៖ «លោកប្រធានាធិបតី Macron បានសម្រេចចិត្តស្វាគមន៍ចំពោះសមភាគីរបស់លោកទាំងអស់ដោយវិធីសំពះ ដែលជាកាយវិការដ៏សមសួនមួយដែលលោករៀនពីដំណើរទស្សនកិច្ចរបស់លោកទៅកាន់ប្រទេសឥណ្ឌាកាលពីឆ្នាំ ២០១៨»។
នៅក្នុងអំឡុងពេលជំនួបរបស់លោកប្រធានាធិបតី Donald Trump ជាមួយនឹងនាយករដ្ឋមន្ត្រីអៀរឡង់លោក Leo Varadkar នៅក្នុងរដ្ឋធានីវ៉ាស៊ីនតោនកាលពីថ្ងៃទី ១២ ខែមីនាកន្លងទៅនេះ លោកទាំងពីរបានលើកដៃសំពះគ្នាទៅវិញទៅមក។
លោក Trump បញ្ជាក់ប្រាប់អ្នកកាសែតនៅពេលលោកបង្ហាញអំពីវិធីសំពះបែបឥណ្ឌា និងវិធីឱនគោរពបែបជប៉ុន យ៉ាងដូច្នេះថា៖ «ខ្ញុំទើបតែត្រឡប់មកពីប្រទេសឥណ្ឌាវិញ។ នៅទីនោះ ខ្ញុំមិនបានប្រើវិធីចាប់ដៃដើម្បីជម្រាបសួរនរណាម្នាក់នោះទេ ហើយការធ្វើបដិសណ្ឋារកិច្ចបែបឥណ្ឌា និងជប៉ុននេះគឺងាយស្រួលខ្លាំងណាស់។ នេះគឺជាទំនោរនាំមុខដ៏ល្អមួយ»។
ជាការពិតណាស់ វាមិនងាយស្រួលនោះទេនៅក្នុងការផ្អាកប្រើវិធីចាប់ដៃជាទម្លាប់កន្លងមក។
លោក Trump និយាយដូច្នេះថា៖ «ពួកយើងមើលគ្នាទៅវិញទៅមក និងបាននិយាយថាតើពួកយើងគួរធ្វើយ៉ាងម៉េចទៅ? វាហាក់ដូចជាមានលក្ខណៈឆ្គងៗយ៉ាងម៉េចមិនដឹងទេ»។
ចំណែកឯលោក Varadkar វិញ និយាយថា៖ «វាហាក់ដូចជាមានអារម្មណ៍ប្លែកៗ។ ខ្ញុំមានអារម្មណ៍ថាខ្លួនឯងដូចជាមិនគួរសមយ៉ាងម៉េចមិនដឹងទេ។ ប៉ុន្តែនៅក្នុងពេលប៉ុន្មានសប្ដាហ៍ខាងមុខនេះ យើងត្រូវសម្របខ្លួនឲ្យបាន»។
នៅក្នុងចក្រភពអង់គ្លេស ព្រះអង្គម្ចាស់ Charles ដែលជាអ្នកនឹងត្រូវស្នងរាជ្យបន្ត ក៏បានប្រើវិធីសំពះជំនួសឲ្យវិធីចាប់ដៃផងដែរ នៅពេលដែលព្រះអង្គជួបជាមួយភ្ញៀវនៅក្នុងព្រឹត្តិការណ៍មួយក្នុងទីក្រុងឡុងដ៍។ ការធ្វើដូច្នេះសម្រាប់ព្រះអង្គក៏មិនងាយស្រួលនោះដែរ។
វីដេអូមួយបានបង្ហាញថា ព្រះអង្គបានលើកព្រះហស្ថសំពះដើម្បីធ្វើបដិសណ្ឋារកិច្ចចំពោះអ្នកតំណាងផ្ទាល់ខ្លួនរបស់ព្រះមហាក្សត្រីយានីចក្រភពអង់គ្លេសប្រចាំរាជធានីឡុងដ៍ លោក Sir Kenneth Olisa ហើយបន្ទាប់មក ព្រះអង្គបានដាក់ព្រះហស្ថចុះវិញយ៉ាងលឿន និងស៊កម្រាមព្រះហស្ថចូលគ្នា។
កាលពីពេលថ្មីៗនេះ នាយករដ្ឋមន្ត្រីអ៊ីស្រាអែលលោក Benjamin Netanyahu បានជំរុញឲ្យមានការប្រើវិធីសំពះបែបឥណ្ឌានៅក្នុងប្រទេសរបស់លោក ហើយលោកបានបង្ហាញពីវិធីនេះ ដោយលើកដៃសំពះនៅក្នុងអំឡុងពេលសន្និសីទកាសែតមួយ។
ជាងនេះទៀត នៅក្នុងប្រទេសឥណ្ឌា ដែលការធ្វើបដិសណ្ឋារកិច្ចបែបចាប់ដៃ និងឱបកាន់តែនិយមឡើង ជាពិសេសនៅតាមទីក្រុង លោកនាយករដ្ឋមន្ត្រី Narendra Modi បានរំឭកប្រជាពលរដ្ឋអំពីអត្ថប្រយោជន៍នៃការផ្ដោតលើវិធីសំពះបែបប្រពៃណីឥណ្ឌាវិញ៕
ប្រែសម្រួលដោយ ភី សុភាដា
