ភរិយារបស់លោក Xiyeu Wang ដែលជានិស្សិតនៃសាកលវិទ្យាល័យ Princeton សហរដ្ឋអាមេរិកដែលជាប់ពន្ធនាគារនៅក្នុងរដ្ឋធានី Tehran នៃប្រទេសអ៊ីរ៉ង់លើបទចោទប្រកាន់ពីការធ្វើចារកម្មខណៈដែលកំពុងស្រាវជ្រាវដើម្បីសរសេរនិក្ខេបបទនៅក្នុងប្រទេសអ៊ីរ៉ង់នោះ កំពុងអង្វរសុំលោកប្រធានាធិបតីសហរដ្ឋអាមេរិកដូណាល់ ត្រាំឲ្យធ្វើអន្តរាគមន៍ក្នុងរឿងក្តីរបស់ប្តីលោកស្រី ដោយនិយាយថា សេតវិមានជាសេចក្តីសង្ឃឹមរបស់ខ្ញុំ។
ក្នុងកិច្ចសម្ភាសន៍មួយពីទីក្រុងប៉េកាំងជាមួយ VOA ផ្សាយជាភាសាចិនកុកងឺ លោកស្រី Hua Qu ភរិយារបស់លោក Wang បាននិយាយថា «ខ្ញុំបានព្យាយាមគ្រប់វិធីទាំងអស់កាលពីអតីតកាលក៏ប៉ុន្តែនៅទីបញ្ចប់ សេតវិមានត្រូវតែចាត់វិធានការដើម្បីជំរុញឲ្យប្រទេសអ៊ីរ៉ង់ដោះលែងប្តីរបស់លោកស្រី។
លោកស្រី Quបាននិយាយថា «សេចក្តីសង្ឃឹមទាំងអស់របស់ខ្ញុំគឺសេតវិមាន គឺរដ្ឋបាលរបស់លោកត្រាំ»។
លោក Wang ដែលកើតនៅក្នុងប្រទេសចិន ជាពលរដ្ឋសហរដ្ឋអាមេរិកបានចូលសិក្សាកម្មវិធីថ្នាក់បណ្ឌិតនៅសាកលវិទ្យាល័យ Princeton។ គេហទំព័រ មួយដែលមានការជាប់ទាក់ទិនតុលាការរបស់អ៊ីរ៉ង់បានប្រាប់ឲ្យដឹងថា លោក Wang បានប្រមូលព័ត៌មានសម្ងាត់យ៉ាងច្រើនក្នុងអំឡុងនៃការធ្វើការស្រាវជ្រាវរបស់លោកនៅក្នុងប្រទេសអ៊ីរ៉ង់នេះ។
លោកបានត្រូវចាប់ខ្លួនកាលពីខែសីហា ឆ្នាំ២០១៦ហើយបានត្រូវចោទប្រកាន់ពីការសហការណ៍ជាមួយរដ្ឋាភិបាលបរទេសហើយត្រូវបានគេបញ្ជូនទៅកាន់ពន្ធនាគារ។ រដ្ឋអាជ្ញារបស់ក្រុង Tehran បានបញ្ជាក់កាលពីខែកញ្ញាថា ការប្តឹងឧទ្ធរណ៍របស់លោកបានត្រូវតុលាការច្រានចោល៕
