ក្នុងរយៈពេលប៉ុន្មានសប្តាហ៍ខាងមុខទៀតនេះ លោកប្រធានាធិបតីសហរដ្ឋអា មេរិកដូណាល់ ត្រាំប្រហែលតែងតាំងលោក Mike Pompeo នាយកទីភ្នាក់ងារស៊ើបការណ៍សម្ងាត់កណ្តាលសហរដ្ឋអាមេរិក(CIA)ឲ្យជំនួសលោក Rex Tillerson រដ្ឋមន្រ្តីការបរទេស។ នេះតាមសេចក្តីរាយការណ៍ព័ត៌មានដែលបានដកស្រង់សម្តីពួកមន្រ្តីរដ្ឋបាលជាន់ខ្ពស់កាលពីថ្ងៃព្រហស្បត៍។
បណ្តាញព័ត៌មានសហរដ្ឋអាមេរិកជាច្រើនបានរាយការណ៍ថា ការរុះរើក្រុមប្រឹក្សាសន្តិសុខកំពូលរបស់ប្រធានាធិបតីត្រាំនេះបានស្ថិតនៅក្រោមការពិចារណានៅពេលឥឡូវនេះ ទោះជាយ៉ាងណាក៏ដោយ គេមិនទាន់ដឹងច្បាស់នៅឡើយថា តើប្រធានាធិបតីដូណាល់ ត្រាំបានធ្វើការសម្រេចយ៉ាងដូចម្តេចទេ។
ក្នុងសន្និសីទកាសែតមួយជាមួយពួកអ្នកយកព័ត៌មាននៅសេតវិមាន នៅពេលដែលសួរអំពីជោគវាសនារបស់លោករដ្ឋមន្រ្តីការបរទេស Tillerson លោកត្រាំបាននិយាយថា «លោកស្ថិតនៅទីនេះ។ លោក Rexបានស្ថិតនៅទីនេះ»។លោកប្រធានាធិបតីមិនបានធ្វើអត្ថាធិប្បាយផ្សេងទៀតទេ។
សេតវិមានបាននិយាយសម្រាលសេចក្តីរាយការណ៍ពីការចាកចេញរបស់លោករដ្ឋមន្រ្តីការបរទេស Tillerson។
លោកស្រី Sarah Huckabee Sanders អ្នកនាំពាក្យសេតវិមាន បាននិយាយថា «ដូចដែលលោកប្រធានាធិបតីទើបតែបាននិយាយហើយថា លោក Rex ស្ថិតនៅទីនេះ។ មិនមានការប្រកាសអំពីបញ្ហានេះនៅពេលនេះទេ។ លោករដ្ឋមន្រ្តីការបរទេស Tillerson បន្តដឹកនាំក្រសួងការបរទេសហើយគណៈរដ្ឋមន្រ្តីទាំងមូលបានផ្តោតលើភាពជោគជ័យនៃការកាន់អំណាចឆ្នាំទី១របស់រដ្ឋបាលរបស់ប្រធានាធិបតី ត្រាំ៕
