ភរិយារបស់នាយកក្រុមហ៊ុនអាកាសចរណ៍ Korean Air លោក Cho Yang-ho ត្រូវបានប៉ូលិសប្រទេសកូរ៉េខាងត្បូងកោះហៅឲ្យចូលបំភ្លឺពាក់ព័ន្ធនឹងការចោទប្រកាន់ថាលោកស្រីបានរំលោភបំពានលើបុគ្គលិកធ្វើការ។
លោកស្រី Lee Myung-hee បានធ្វើការសុំទោសចំពោះក្រុមអ្នកសារព័ត៌មានពីការបង្កបញ្ហា ខណៈដែលលោកស្រីបានដើរចូលទៅក្នុងការិយាល័យប៉ូលិសនៅថ្ងៃចន្ទនេះ។
លោកស្រី Lee ត្រូវបានចោទប្រកាន់ថាបានជេរប្រមាថ និងច្រានកម្មករសំណង់កាលពីឆ្នាំ២០១៤ នៅឯសណ្ឋាគារដែលគ្រប់គ្រងដោយក្រុមហ៊ុន Hanjin Group ដែលជាក្រុមហ៊ុនមេរបស់ក្រុមហ៊ុនអាកាសចរណ៍ Korean Air។ លោកស្រីក៏បានត្រូវសង្ស័យថាបានធ្វើបាបរាងកាយ និងជេរប្រមាថអ្នកធ្វើការនៅក្នុងគេហដ្ឋានរបស់លោកស្រីក្នុងទីក្រុងសេអ៊ូល និងមានអត្តចារឹកបំពានលើបុគ្គលិកក្រុមហ៊ុន សន្តិសុខ និងអ្នកធ្វើការក្នុងផ្ទះផងដែរ។
ការចោទប្រកាន់ទាំងនោះរួមមានការធាក់ច្រំ ទះកំផ្លៀង និងចោលកន្ត្រៃដាក់បុគ្គលិកក្រុមហ៊ុន។
គ្រួសារត្រកូល Choត្រូវបានដាក់ឲ្យស្ថិតក្រោមការតាមដានចាប់តាំងពីមានរឿងអាស្រូវកាលពីឆ្នាំ២០១៤មកជុំវិញនឹងករណីប្រើប្រាស់ហិង្សា ដែលមានជាប់ពាក់ព័ន្ធជាមួយនឹងកូនស្រីច្បងឈ្មោះ Cho Hyun-ah ដែលបានជះកំហឹងលើបុគ្គលិកបម្រើលើយន្តហោះ Korean Air ម្នាក់ដែលបានយកអាហារសម្រន់ដាក់ក្នុងថង់ ជាជាងដាក់ក្នុងចាន។ ចំណែកឯកូនស្រីប្អូនឈ្មោះ Cho Hyun-min បានត្រូវចោទប្រកាន់ថាបានជះទឹកនៅក្នុងកិច្ចប្រជុំអាជីវកម្មមួយ។ គ្រួសារនេះក៏កំពុងប្រឈមនឹងការស៊ើបអង្កេតពីការនាំមនុស្សចូល គេចវៀសបង់ពន្ធ និងបំពានច្បាប់អន្តោប្រវេសន៍៕
