សេតវិមានបានឲ្យដឹងកាលពីថ្ងៃអង្គារថា លោកប្រធានាធិបតី ដូណាល់ ត្រាំ នៅតែជឿថាការបោះឆ្នោតរបស់ជនអន្តោប្រវេសន៍ខុសច្បាប់រាប់លាននាក់បាននាំឲ្យលោកធ្លាក់ប្រជាប្រិយក្នុងពេលបោះឆ្នោត កាលពីខែវិច្ឆិកា។
លោក Sean Spicer អ្នកនាំពាក្យសេតវិមាននិយាយថា «នេះជាជំនឿមួយដែលលោកនៅតែជឿជាបន្ត»។ លោកបានប្រាប់អ្នកយកព័ត៌មានមួយថ្ងៃបន្ទាប់ពីលោកប្រធានាធិបតីថ្មីរំលឹកពីការបោះឆ្នោត នៅក្នុងពិធីជួបជាមួយក្រុមមេដឹកនាំសភា ដោយនិយាយឡើងវិញថា ជនអន្តោប្រវេសន៍ខុសច្បាប់ក្នុងប្រទេសបានបោះឆ្នោតជូនគូប្រជែងរបស់លោក គឺលោកស្រី Hillary Clinton នៃគណបក្សប្រជាធិបតេយ្យ។ លោក Spicer មិនបានផ្តល់ភស្តុតាងអំពីការលួចបន្លំសន្លឹកឆ្នោតនេះទេ។
ក្រុមមន្ត្រីរៀបចំការបោះឆ្នោតដែលបានពិនិត្យមើលការបោះឆ្នោតកាលពីថ្ងៃទី៨ខែវិច្ឆិកា និយាយថា ស្ទើរតែគ្មានការបង្ហាញភ័ស្តុតាងអ្វីទាល់តែសោះអំពីការលួចបន្លំសន្លឹកឆ្នោត ហើយពួកគេប្រាកដថាគ្មានការលួចបន្លំដល់ថ្នាក់ធំដូចលោក ត្រាំ បានអះអាងនោះទេ៕
