នៅថ្ងៃចន្ទនេះ លោកប្រធានាធិបតីស.រ.អា. Donald Trump កំណត់នឹងជួបជាមួយលោក Paul Ryan ប្រធានសភាតំណាងរាស្ត្រអាមេរិកាំងនិងចុះហត្ថលេខាលើបទបញ្ជានីតិប្រតិបត្តិមួយចំនួននៅពេលដែលរដ្ឋបាលរបស់លោកចាប់ផ្តើមបំពេញការងារក្នុងសប្តាហ៍ទីមួយ។
សេតវិមានមិនបាននិយាយប្រាប់ឱ្យដឹងអំពីបញ្ហាអ្វីខ្លះដែលជាប្រធានបទនៃ បទបញ្ជានីតិប្រតិបត្តិទាំងនេះទេ។
នៅក្នុងពេលធ្វើយុទ្ធនាការឃោសនាបោះឆ្នោត លោក Trump បានសន្យាថានឹងលុបចោលបទបញ្ជាដែលលោកអតីតប្រធានាធិបតីបារ៉ាក់ អូបាម៉ាបានចុះហត្ថលេខា ហើយនៅក្រោយលោកបានជាប់ឆ្នោតលោកបានលាតត្រដាងផែនការមួយសម្រាប់រយៈពេលប៉ុន្មានថ្ងៃដំបូងនៃរដ្ឋបាលលោកដែលមានរួមបញ្ចូលការផ្តល់ដំណឹងអំពីផែនការរបស់ស.រ.អា.ក្នុងការដកខ្លួនថយចេញពីកិច្ចព្រមព្រៀងពាណិជ្ជកម្មភាពដៃគូឆ្លងកាត់មហាសមុទ្រប៉ាស៊ីហ្វិក មានប្រទេសជាតិ១២ជាសមាជិកនិងក្នុងការធ្វើការចរចាជាថ្មីអំពីកិច្ចព្រមព្រៀងពាណិជ្ជកម្មសេរីអាមេរិកខាងជើងហៅកាត់ថា NAFTA ជាមួយប្រទេសម៉ិកស៊ិក និងប្រទេសកាណាដា។
លោក Sean Spicer អ្នកនាំពាក្យសេតវិមានបាននិយាយកាលពីសប្តាហ៍មុនថា «ខ្ញុំយល់ថាលោកអ្នកនឹងឃើញការណ៍ទាំងនោះកើតមានឡើងក្នុងពេលឆាប់ៗនេះ។»
ផែនការរបស់លោក Trump ក៏នឹងមានរួមបញ្ចូលផងដែរនូវបទបញ្ជានីតិប្រតិបត្តិទាក់ទងជាមួយអន្តោប្រវេសន៍និងសន្តិសុខជាតិ។ លោកបានចុះហត្ថលេខាហើយលើបទបញ្ជាមួយចែងអំពីបំណងរបស់លោកក្នុងការលុបចោលកម្មវិធីថែរក្សាសុខភាពរបស់លោកអូបាម៉ាជាបន្ទាន់។
សេតវិមានបាននិយាយថាលោក Trump នឹងពិភាក្សាបញ្ហាអន្តោប្រវេសន៍និងកំណែទម្រង់កិច្ចព្រមព្រៀង NAFTA ជាមួយលោកប្រធានាធិបតីម៉ិកស៊ិក Enrique Pena Nieto នៅថ្ងៃទី៣១ ខែមករា។ លោកក៏គ្រោងនឹងជួបក្នុងពេលឆាប់ៗនេះជាមួយលោកនាយករដ្ឋមន្ត្រីកាណាដា Justin Trudeau ផងដែរ៕
