សេតវិមានកាលពីថ្ងៃព្រហស្បតិ៍បានប្រឈមនឹងការចោទសួរអំពីហេតុអ្វីបានជាសេតវិមាននៅបន្តជួលបុគ្គលិកជំនួយការសំខាន់មួយនៅក្នុងរដ្ឋបាលរបស់លោកប្រធានាធិបតី Trump ដែលបុគ្គលិករូបនោះបានធ្លាក់នៅក្នុងការធ្វើដំណើរឆែកប្រវត្តិរូប បន្ទាប់ពីអតីតភរិយាពីរនាក់របស់លោកបានប្រាប់ក្រុមអ្នកស៊ើបអង្កេតថា លោកបានប្រើអំពើហិង្សាលើពួកគេ។
លោកជំនួយការ Rob Porterបានលាលែងពីតំណែងកាលពីថ្ងៃព្រហស្បតិ៍ បន្ទាប់ពីអតីតភរិយាទីមួយរបស់លោក គឺអ្នកស្រី Colbie Holdernessបានបង្ហាញរូបថតដែលមានស្នាមជាំនៅលើភ្នែក ដែលអ្នកស្រីបាននិយាយថា លោក Porterបានវាយអ្នកស្រីកាលពីឆ្នាំ២០០៥ នៅពេលដែលលោក និងអ្នកស្រីទៅវិស្សមកាលនៅប្រទេសអ៊ីតាលី។
លោក Porterបញ្ចប់ការសិក្សាផ្នែកមេធាវិពីសាកលវិទ្យាល័យ Harvard និងបម្រើការជាលេខានៅក្នុងសេតវិមានរបស់រដ្ឋបាលលោក Trump។ លោកគឺជាជំនួយការរបស់លោកJohn Kelly ទទួលខុសត្រូវលើការរៀបចំបញ្ជូនសំណើ និងសេចក្តីព្រៀងគោលនយោបាយទៅឲ្យប្រធានាធិបតី Trump ធ្វើការត្រួតពិនិត្យ។
យោងតាមសេចក្តីរាយការណ៍របស់សារពត៌មាន CNN បានរាយការណ៍ថា លោក Kelly បានដឹងជាច្រើនខែថាមានការចោទប្រកាន់ពីសំណាក់អតីតភរិយាទាំងពីររបស់លោក Porterថាលោកបានប្រើប្រាស់អំពើហិង្សាទៅលើពួកគេទាំងពីរនាក់។ អតីតភរិយាទាំងពីរបានរៀបរាប់ពីទំនាស់នៅក្នុងគ្រួសារជាមួយលោក Porter នៅពេលដែលក្រុមស៊ើបអង្កេតរបស់ FBI ធ្វើការស៊ើបអង្កេតលើប្រវតិ្តរូបរបស់លោក៕
