ចិន កំពុងតាមដានដោយព្រួយកង្វល់អំពីការរីកលូតលាស់នៃសមត្ថភាពខាងយោធារបស់អូស្ត្រាលី។
«នៅពេលដែលប្រទេសអូស្ត្រាលីងាកចេញពីប្រទេសចិន ប្រទេសកុម្មុយនិស្តនេះ យល់ថា ប្រទេសអូស្ត្រាលីកំពុងខិតទៅជិតសហរដ្ឋអាមេរិក។ ដូច្នេះមនោសញ្ចេតនាខ្វល់ខ្វាយនេះ នឹងលេចឡើង»។ នេះបើតាមលោក Oh Ei Sun អ្នកសិក្សាស្រាវជ្រាវជាន់ខ្ពស់នៅឯវិទ្យាស្ថានកិច្ចការអន្តរជាតិក្នុងប្រទេសសិង្ហបូរី។
មួយទសវត្សរ៍ចុងក្រោយនេះ ប្រទេសអូស្ត្រាលី បានបង្កើនសមត្ថភាពខាងយោធា។ ប្រទេសចិនព្រួយបារម្ភជាពិសេសខ្លាចប្រទេសអូស្ត្រាលីធ្វើជាដៃគូសហរដ្ឋអាមេរិកដែលមានកងកម្លាំងប្រដាប់អាវុធខ្លាំងជាងគេបំផុតនៅក្នុងពិភពលោកដើម្បីទប់ទល់ការពង្រីកនាវារបស់ប្រទេសចិន។ នេះបើតាមពួកអ្នកជំនាញ។
ទំនាក់ទំនងរវាងប្រទេសចិននិងប្រទេសអូស្ត្រាលី បានធ្លាក់ចុះកាន់តែខ្លាំងឡើងកាលពីសប្តាហ៍មុន នៅពេលដែលប្រទេសអូស្ត្រាលី សហរដ្ឋអាមេរិក និងចក្រភពអង់គ្លេស បានចុះហត្ថលេខាលើភាពជាដៃគូសន្តិសុខ៣ប្រទេស។ កិច្ចព្រមព្រៀងនោះនឹងអនុញ្ញាតឲ្យមានការចែករំលែកបច្ចេកវិទ្យាយោធាជឿនលឿន និងផ្តល់ឲ្យប្រទេសអូស្ត្រាលីនូវនាវាមុជទឹកចំនួន៨គ្រឿងដែលប្រើថាមពលនុយក្លែអ៊ែរ។
កិច្ចព្រមព្រៀងដៃគូសន្តិសុខ៣ប្រទេសនេះ ជាព្រឹត្តិការណ៍មួយនៃព្រឹត្តិការណ៍ជាបន្តបន្ទាប់ដែលបណ្តាលឲ្យទំនាក់ទំនងរវាងប្រទេសចិន និងប្រទេសអូស្ត្រាលីកាន់តែល្វីងជូរចត់៕
