ភ្ជាប់​ទៅ​គេហទំព័រ​ទាក់ទង

សេតវិមាន៖ អ៊ីស្រាអែល និង​ប៉ាឡេស្ទីន​អាច​ជ្រើសរើស​ដំណោះស្រាយ​តាម​រយៈ​ការ​ចរចា​រវាង​រដ្ឋ​ទាំង​ពីរ


ទិដ្ឋភាព​ពី​លើ​អាកាស​នៅ​លើ​តំបន់ West Bank បង្ហាញ​ពី​ភូមិ​ប៉ាឡេស្ទីន​មួយ (រូប​ឆ្វេង) និង​លំនៅឋាន​របស់​ជនជាតិ​ជ្វីព (រូប​ស្តាំ) ត្រូវ​បាន​ខណ្ឌ​ចែក​ដោយ​ជញ្ជាំង​មួយ។

មន្ត្រី​ជាន់​ខ្ពស់​ម្នាក់​នៃ​សេតវិមាន​បាន​និយាយ​កាល​ពី​ថ្ងៃ​អង្គារ​ថា ​សន្តិភាព​រវាង​ប្រទេស​អ៊ីស្រាអែល និង​ជន​ជាតិ​ប៉ាឡេស្ទីន​មិនមែន​ជា​ការ​ចាំ​បាច់​ត្រូវ​តែ​ធ្វើ​ឡើងតាម​រយៈ​ដំណោះស្រាយ​រដ្ឋ​ពីរ​ទេ ហើយ​ថា វា​អាស្រ័យ​លើ​ភាគី​ទាំង​ពីរ​ដែល​ត្រូវ​សម្រេច។​

នៅ​ក្នុង​ការ​និយាយ​ត្រួសៗ​មួយ​ប្រាប់​ពួក​អ្នក​កាសែត​នៅ​មុន​ទស្សនកិច្ច​នៅ​ថ្ងៃ​ពុធ​នេះ​ក្នុង​រដ្ឋធានី​វ៉ាស៊ីនតោន​របស់​លោក​នាយក​រដ្ឋ​មន្ត្រី​អ៊ីស្រាអែល Benjamin Netanyah មន្ត្រី​មួយ​រូប​បាន​និយាយ​ថា​ ស.រ.អា.​នឹង​មិន «កំណត់​អ្វី​ដែល​ជា​លក្ខខណ្ឌ​សម្រាប់​សន្តិភាព​ទេ»។

មន្ត្រី​រូប​នេះ​បាន​និយាយ​ថា​ «ដំណោះ​ស្រាយ​រដ្ឋ​ពីរ​ដែល​មិន​ធ្វើ​ឱ្យ​មាន​សន្តិភាព​មិនមែន​ជា​គោលដៅ​ដែល​យើង​បាន​នោះ​ទេ។​ សន្តិភាព​ជា​គោលដៅ​ ទោះ​ណា​ជា​វា​មាន​ក្នុង​ទម្រង់​នៃ​ដំណោះស្រាយ​រដ្ឋ​ពីរ ឬ​ទម្រង់​ផ្សេង​ទៀត តាម​តែ​ការ​ចង់​បាន​របស់​រដ្ឋ​ទាំង​ពីរ។ ​យើង​នឹង​ជួយ​ពួក​គេ»។

គោលជំហរ​ជា​ផ្លូវ​ការ​របស់​ស.រ.អា.​ដែល​មាន​ជា​យូរយារ​មក​ហើយ​គឺ​ថា ​ប្រទេស​អ៊ីស្រាអែល និង​ជន​ជាតិ​ប៉ាឡេស្ទីន​គួរ​ធ្វើ​ការ​ចរចា​គ្នា​ឱ្យ​មាន​កិច្ចព្រមព្រៀង​មួយ​ដែល​មាន​ការ​បែង​ចែក​ជា​រដ្ឋ​ពីរ​ ដែល​ទំនង​ជា​នឹង​ទុក​ឱ្យ​ជនជាតិ​ប៉ាឡេស្ទីន​ ត្រួតត្រា​តំបន់ Gaza ទាំងអស់ ឬ​ផ្នែក​ខ្លះ​នៃ​តំបន់​ត្រើយ​ខាង​លិច​នៃ​ទន្លេ Jordan និង​ផ្នែក​ខាង​កើត​នៃក្រុង​ Jerusalem ដែល​ពួក​ប៉ាឡេស្ទីន​ចង់​យក​ធ្វើ​ជា​រដ្ឋធានី​របស់​ពួកគេ។ ​អ.ស.ប.​ក៏​បាន​គាំទ្រ​ដំណោះ​ស្រាយ​រដ្ឋ​ពីរ​ដែរ។

កិច្ចចរចា​សន្តិភាព​ចុង​ក្រោយ​បង្អស់​បាន​ដួលរលំ​ជិត​បី​ឆ្នាំ​មក​ហើយ​ ដោយ​មិន​បាន​សម្រច​កិច្ចព្រមព្រៀង​អ្វី​ឡើយ៕

XS
SM
MD
LG