ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នកជំនួញ​ធំៗ​ចូលរួម​ថវិកា​ជួយ​ដោះ​មីន​នៅ​កម្ពុជា ប្រមាណ​១៣​លាន​ដុល្លារ តាម​ការ​អំពាវនាវ​របស់​នាយក​រដ្ឋមន្រ្តី


រូបឯកសារ៖ សមាជិក​មជ្ឈ​មណ្ឌល​សកម្ម​ភាព​កម្ចាត់​មីន​កម្ពុជា​(CMAC) (ឆ្វេង) និង​ប៉ូលិស​ឈរ​យាម​ពី​ក្រោយ​គ្រាប់​បែក​ម៉ាក ៨២ នៅ​ខេត្ត​កណ្ដាល កាលពី​ថ្ងៃ​ទី​២១ ខែ​ឧសភា ឆ្នាំ​២០១៥។
រូបឯកសារ៖ សមាជិក​មជ្ឈ​មណ្ឌល​សកម្ម​ភាព​កម្ចាត់​មីន​កម្ពុជា​(CMAC) (ឆ្វេង) និង​ប៉ូលិស​ឈរ​យាម​ពី​ក្រោយ​គ្រាប់​បែក​ម៉ាក ៨២ នៅ​ខេត្ត​កណ្ដាល កាលពី​ថ្ងៃ​ទី​២១ ខែ​ឧសភា ឆ្នាំ​២០១៥។

ក្រោយ​ពី​លោក​នាយក​រដ្ឋ​មន្ត្រី ហ៊ុន សែន បាន​ប្រកាស​កៀរ​គរជំនួយ​ថវិកាពី​សប្បុរស​ជន​ក្នុង​ការ​សម្អាត​មីន ថវិកា​ដែល​ប្រមូល​បាន​រហូត​មក​ដល់​ថ្ងៃ​ចន្ទ​នេះ មាន​ប្រមាណ​ជាង​១៣​លាន​ដុល្លារ​អាមេរិក។ នេះ​បើ​យោង​តាម​មន្រ្តី​ពាក់​ព័ន្ធ​។

កម្ពុជា​បាន​ដាក់​ផែនការ​សម្អាត​មីន​ឱ្យ​អស់ ឬ​ហៅថា ​កម្ពុជា​គ្មាន​មីន នៅ​ឆ្នាំ​២០​២៥ ដែល​នឹង​ត្រូវ​បោសសម្អាត លើ​ផ្ទៃ​ដីមាន​មីនប្រមាណ​ជាង​៧០០​គីឡូ​ម៉ែត្រ​ក្រឡា​ទៀត។ ​ការ​ចំណាយ​ថវិកា​មាន​ប្រមាណ​ជាង​១០០​លាន​ដុល្លារ​អាមេរិក​ទៀត​សម្រាប់រយៈ​ពេល​៣​ឆ្នាំ​ខាង​មុខ។ នេះ​បើ​តាម​មន្រ្តី​ជាន់​ខ្ពស់​នៃ​អាជ្ញាធរ​មីន។

​លោក​នាយក​រដ្ឋមន្ត្រី ហ៊ុន សែន ​កាល​ពី​ថ្ងៃ​ទី១​ ខែ​កក្កដា បាន​ប្រកាស​ឱ្យ​អាជ្ញាធរ និង​អ្នក​ពាក់​ព័ន្ធយក​ចិត្ត​ទុក​ដាក់​ក្នុង​ការ​សម្អាត​មីន ​ឬបង្ហើយ​ការ​ងារ​ដោះ​មីន​ឱ្យ​បាន​ឆាប់​ ដើម្បី​ប្រកាស​ថា​ខេត្ត​ ស្រុក ​ឃុំ​របស់​កម្ពុជាគ្មាន​មីន។

នៅ​ក្នុង​ពិធី​អបអរ​សាទរ​ទិវា​មច្ឆ​ជាតិ​ ​នៅ​ទីតាំង​អាង​ទឹក​ត្រពាំងថ្ម ភូមិ​ត្រពាំង​ថ្ម ឃុំ​ប៉ោយ​ចារ ស្រុក​ភ្នំ​ស្រុក​ ខេត្ត​បន្ទាយ​មាន​ជ័យ លោក ហ៊ុន សែន បាន​ប្រកាស​កៀរ​គរ​ជំនួយ​មនុស្សធម៌​ក្នុង​ការ​ដោះ​មីន​នេះ ហើយ​លោក​ក៏​បាន​បញ្ជា​ទៅ​រដ្ឋមន្ត្រី​ក្រសួង​សេដ្ឋ​កិច្ច និង​ហិរញ្ញវត្ថុ​ឱ្យ​ពិ​ចារ​ណា​ប្រើ​ប្រាស់​ថវិកា​ជាតិ ​ឆ្នាំ​២០​២៣-​២០​២៤ ក្នុង​ការ​សម្អាត​មីន​ទៅ​តាម​ដំណាក់​កាលៗ​ផង​ដែរ។

លោក ហ៊ុន សែន ថ្លែង​ថា៖ «​ហើយ​ខ្ញុំ​ក៏​សុំ​យក​ឱកាស​នេះ អំពាវ​នាវ​ចំពោះ​វិស័យ​ឯក​ជន​ ប្រសិន​បើ​មាន​បំណង ខ្ញុំ​សូម​អរគុណ​ទុក​ជា​មុន​ ដើម្បី​ទទួល​យក​ការ​ចូល​រួម​ពី​សំណាក់​វិស័យ​ឯក​ជន​របស់​យើង​ ជួយ​ដោះ​មីន​នៅ​កន្លែង​ណា។ ឧទាហរណ៍​ កន្លែង​ខ្លះ​ត្រឹម​១០​ម៉ឺន​ដុល្លា​រ​ តែ​ប៉ុណ្ណឹង​ទេ។ កន្លែង​ខ្លះ​ ​មាន​ភូមិ​មួយ​ ​ឥណ្ឌា​...គេ​ជួយ​៥​ម៉ឺន​ដុល្លា​រ​ដើម្បីបញ្ចប់...។ ​អ៊ីចឹង​ទេ ​យើង​អា​ច​ប្រើ​ការ​គួប​ផ្សំ​ពី​រ ​[គឺ]​មួយ​ថវិកា​ជាតិ​ មួយ​ទៀត​គឺ​សប្បុរស​ជន​អាច​ចូល​រួមដើម្បី​អាច​រក្សា​សុវត្ថិ​ភាព»។

លោក សេង ទៀង រដ្ឋ​លេខា​ធិការ​ទីស្តីការ​គណៈ​រដ្ឋ​មន្ត្រី និង​ជា​ជំនួយ​ការ​នាយក​រដ្ឋមន្រ្តី​ដែល​ជា​អ្នក​ទទួល​ថវិកា បាន​បញ្ជាក់​ប្រាប់​វីអូអេ​យ៉ាង​ខ្លី​ថា​មក​ដល់​ថ្ងៃ​ចន្ទ​នេះ ក្រុម​ការងារ​ទទួល​បាន​ថវិ​កា​ជាង​១០​លាន​ដុល្លា​រ​អាមេ​រិកហើយ។

លោក​ថ្លែង​ថា៖ «បាន​ជាង​១០​លាន​[ដុល្លារ​អាមេរិក​]បន្តិច​ហើយ»។

ថវិកា​ទាំង​នោះ​បាន​មក​ពី​អ្នក​ជំនួញ​ធំៗ សិល្ប​ករ និង​ក្រុម​មនុស្ស​ផ្សេង​ទៀត។ ភ្លាមៗ​ក្រោយ​ការ​ប្រកាស​របស់​លោក ហ៊ុន សែន កូន​ស្រី​របស់​លោក គឺ​អ្នកស្រី ហ៊ុន ម៉ាណា និង​ស្វាមី និង​កូនស្រី​ម្នាក់​ទៀត គឺ​អ្នកស្រី ហ៊ុន ម៉ាលី ​និង​ស្វាមី បាន​ចេញ​មុខ​ប្រកាស​បរិច្ចាគ​ថវិកា​ចំនួន​១​លាន​ដុល្លារ​អាមេរិក​ដល់​រដ្ឋា​ភិបាល ដើម្បី​ដោះ​ស្រាយ​បញ្ហា​មីន។ នេះ​បើ​តាម​ការ​ចុះ​ផ្សាយ​របស់​សារ​ព័ត៌មាន ​Fresh News ដែល​ស្និទ្ធ​នឹង​រដ្ឋាភិបាល។

​ក្រុមហ៊ុន និង​ឧកញ៉ា​ល្បី​ឈ្មោះ​ដែល​ចូលរួម​ថវិកា​១​លាន​ដុល្លារ​អាមេរិក រួម​មាន​ក្រុមហ៊ុន​ជីប ម៉ុង ក្រុមហ៊ុន ប៉េង​ហួត អ្នក​ឧកញ៉ា ឡេង ណាវ៉ាត្រា ​ពុង ឃាវសែ ​ហុង ពីវ ​ចេន ហ្ស៊ី ​គិត ម៉េង ​លី យ៉ុងផាត់ និង​អ្នក​ឧកញ៉ា​ឡាវ ម៉េង​ឃីន​ជា​ដើម។ ចំណែក​កាក​បាទ​ក្រហម​កម្ពុជា​ដែល​ដឹកនាំ​ដោយ​អ្នកស្រី ប៊ុន​ រ៉ានី ភរិយា​របស់​លោក ហ៊ុន សែន បាន​បរិច្ចាគ​ថវិកា​ចំនួន​២​លាន​ដុល្លារ។ នេះ​បើ​តាម​ការ​ចុះ​ផ្សាយ​របស់​ Fresh News ។

ក្រៅ​ពី​អ្នក​ជំនួញ​ធំៗ គេក៏ឃើញ​មាន​ក្រុម​សិល្ប​ករ​មួយ​ចំនួន​បាន​ចូលរួម​ឧបត្ថម្ភ​ផង​ដែរ​ ដោយ​មា​ន​អ្នក​ខ្លះ​ឧបត្ថម្ភ​ចំនួន​១​ពាន់​ដុល្លារ​ ៣​ពាន់​ដុល្លារ​ និង​១​ម៉ឺន​ដុល្លារ​ជា​ដើម។

លោក លី ធុជ ​អនុ​ប្រធាន​ទី​១​របស់​អាជ្ញាធរ​មីន​ ប្រាប់​វីអូអេ​នៅ​ថ្ងៃ​ចន្ទ​នេះ​ថាកម្ពុជា​បាន​ដាក់​ផែន​ការ​ថា​គ្មាន​មីន​ត្រឹមឆ្នាំ​២០២៥​ ហើយ​ក្នុង​រយៈ​ពេល​៣​ឆ្នាំ​ខាង​មុខ​នេះ គឺ​ត្រូវ​ការ​ថវិកា​ប្រមាណ​ជាង​១០០​លាន​ដុល្លារ​អាមេរិក ក្នុង​ការ​សម្អាត​ផ្ទៃ​ដី​មីន​ជាង​៧០០​គីឡូ​ម៉ែត្រ​ក្រឡា​ទៀត ដោយមិនទាន់​រាប់​បញ្ចូល​ផ្ទៃ​ដី​គ្រាប់​បែកច​ង្កោម និង​សំណល់​ជាតិ​ផ្ទុះ​នោះ​ទេ។

លោក​ថ្លែង​ថា៖ «​ចំការ​មីន​ដែល​យើង​មា​ន​លើ​ផ្ទៃ​ដី​ជាង​៧០០​គីឡូម៉ែត្រ​ក្រឡា អ៊ីចឹង​យើង​ធ្វើ​ម៉េច​ខិត​ខំ​បោស​សម្អាត​ឱ្យ​បាន​គ្រប់​ចំនួន​របស់​វា ដើម្បី​ឈាន​ឱ្យ​បាន​ជោគ​ជ័យ​ឆ្នាំ​២០២៥​នេះ»។​

លោក​បន្តថា៖ ​«យើង​ត្រូវ​ការ​លុយ​ប្រមាណ​១២០​ជាង [ឬ]​ ១៣០​ជាង​លាន​ដុល្លារ​អាមេរិក​ទៀត​ ដើម្បី​បញ្ចប់​កិច្ច​ការ​ហ្នឹង»។

លោក​បន្ថែមថា​ក្នុង​ប៉ុន្មាន​ឆ្នាំ​ចុង​ក្រោយ​នេះ កម្ពុជា​បាន​បោស​សម្អាត​មីន​ប្រឆាំង​មនុស្ស​លោក ​និង​មីន​ប្រឆាំង​គោយន្ត​ ​លើ​ផ្ទៃ​ដី​ប្រមាណ​៩០ ឬ​១០០​គីឡូម៉ែត្រ​ក្រឡា​ក្នុង​មួយ​ឆ្នាំៗ​ ហើយ​បើ​បូក​គ្រាប់​បែក​បង្កោម និង​សំណល់​ជាតិ​ផ្ទុះ​ គឺ​សម្អាត​បាន​ផ្ទៃ​ដី​ជាង​១០០​គីឡូ​ម៉ែត្រ​ក្រឡា។ ទាក់​ទង​ការ​សម្អាត​មីន​នេះ លោក​ថា​ក៏​មាន​បញ្ហា​ប្រឈម​មួយចំនួន​ដែរ​ ដូច​ជា​ធន​ធាន​ថវិកា​មិន​ទាន់​ឆ្លើយ​តប​គ្រប់​គ្រាន់​នៅ​ឡើយ​ ព្រោះ​បើ​មាន​ថវិកា​គ្រប់​គ្រាន់​ឬច្រើន​ នោះ​ការងារ​ដោះ​មីន​នឹង​ធ្វើ​បាន​លើ​ផ្ទៃ​ដី​ច្រើន ​ហើយ​ឧប​សគ្គ​រារាំង​ផ្សេង​ទៀត មាន​ដូច​ជាការ​រាត​ត្បាត​ជំងឺ​កូវីដ​១៩ ការ​ប្រែប្រួល​អាកាស​ធាតុ ដែល​ជា​ការ​រំខាន​ដល់​ប្រតិបត្តិការ​សម្អា​តមី​ន ខណៈ​បុគ្គលិក​មួយ​បានចំនួន​ចូល​និវត្តន៍ជា​ដើម។

ប្រទេស​មួយ​ចំនួន​បាន​ផ្តល់​ថវិកា​ដល់​រដ្ឋាភិបាល​កម្ពុជា​ក្នុង​កិច្ចការ​ដោះ​មីន​នេះ។ សហរដ្ឋ​អាមេរិក​បាន​ចំណាយ​ថវិកា​ចំនួន​ជាង​១៣០​លាន​ដុល្លារ​មក​ហើយ នៅ​ក្នុង​រយៈ​ពេល​២​ទសវត្សរ៍​កន្លង​ទៅ​នេះ​ ដើម្បី​រក​មើល​ និង​ដោះ​ចេញ​ មិន​ត្រឹម​តែ​យុទ្ធភណ្ឌ​មិន​ទាន់​ផ្ទុះ​នៅ​ក្នុង​ប្រទេស​កម្ពុជា។ ប៉ុន្តែ​កាល​ពី​ឆ្នាំ​២០១៧ សហរដ្ឋ​អាមេរិក​បាន​បញ្ចប់​ជំនួយ​សម្រាប់​ប្រតិបត្តិ​ការ​ដោះ​មីន​នៅ​កម្ពុជា​ទៅ​ឱ្យ​មជ្ឈ​មណ្ឌល​សកម្ម​ភាព​កម្ចាត់​មីន​កម្ពុជា ​(CMAC) ដែល​ជា​ស្ថាប័ន​របស់​រដ្ឋាភិបាល​កម្ពុជា។ ការ​ប្រកាស​កាត់​ផ្តាច់​ជំនួយ​នេះ​ ធ្វើ​ឡើង​នៅ​ចំ​ពេល​ មាន​ការប្រើ​ប្រាស់​វោហា​សាស្ត្រ​នយោបាយ​ ប្រឆាំង​នឹង​សហរដ្ឋ​អាមេរិក​ពី​មេដឹកនាំ​កម្ពុជា​ គឺ​លោក​ ហ៊ុន សែន​ ដែល​បាន​ចោទ​អាមេរិក​ថា​នៅ​ពី​ក្រោយ​គណបក្ស​សង្គ្រោះ​ជាតិ​ ក្នុង​ការ​រៀប​គម្រោង​ផ្តួល​រដ្ឋាភិបាល​របស់​លោក។

ទោះ​ជា​យ៉ាង​ណា នៅ​ឆ្នាំ​២០១៧​ដដែល​ រដ្ឋា​ភិបាល​ចិន​បាន​សន្យា​ថា​នឹង​ជួយ​ឱ្យ​អស់​លទ្ធ​ភាព ដើម្បី​បោស​សម្អាត​មីន និង​យុទ្ធភ័ណ្ឌ​មិន​ទាន់​ផ្ទុះ​នៅ​កម្ពុជា​ឱ្យ​បាន​ឆាប់​រហ័ស។ ក្រោយ​ការ​ប្រកាស​នេះ រដ្ឋាភិបាល​ចិន​បាន​ផ្តល់​ជំនួយ​មក​កម្ពុជា​ជា​បន្ត​បន្ទាប់។

បើ​តាម​គេហ​ទំព័រ​របស់អាជ្ញាធរ​មីន បច្ចុប្បន្ន​មាន​ប្រតិបត្តិករ​ជាតិ​ និង​អន្តរ​ជាតិ​ចំនួន​៩​ស្ថាប័ន​ ដែល​កំពុង​អនុវត្ត​ការងារ​បោស​សម្អាត​មីន​នៅ​កម្ពុជា​ ​ក្នុង​នោះប្រតិបត្តិករ​ផ្នែក​មនុស្ស​ធម៌​មាន​៨ ​រួម​មាន​មជ្ឈ​មណ្ឌល​ជាតិ​គ្រប់​គ្រង​កង​កម្លាំង​រក្សា​សន្តិភាព​បោស​សម្អាត​មីន និង​កាក​សំណល់​សង្គ្រាម ​(NPMEC) មជ្ឈ​មណ្ឌល​សកម្មភាព​កម្ចាត់​មីន​កម្ពុជា ​(CMAC) អង្គការ​ហាឡូ​ត្រាស្ត ​(HALO Trust) អង្គការ​ម៉ែក​ (MAG) អង្គការ​ NPA អង្គការ​ APOPO​ អង្គការ​ដោះមីន​កម្ពុជា ​(CSHD) និង​បញ្ជាការ​ដ្ឋាន​វិស្វកម្ម​កង​ទ័ព​ជើង​គោក និង​ប្រតិ​បត្តិករ​ផ្នែក​ពាណិជ្ជ​កម្ម​មាន​មួយ​ គឺ​ក្រុមហ៊ុន​ D&​Y។

បើ​តាមលោក ​លី ធុជ ​អនុ​ប្រធាន​ទី​១​របស់​អាជ្ញាធរ​មីន បច្ចុប្បន្ន​នេះ ផ្ទៃ​ដីមីន គ្រាប់​បែក​ចង្កោម និងសំណល់​ជាតិ​ផ្ទុះ​ពី​ស​ង្គ្រាម​ផ្សេងៗ គឺ​កម្ពុជា​នៅ​សល់ប្រមាណ​១.៩០០គីឡូ​ម៉ែត្រ​ក្រឡា​ទៀត​ ហើយអ្នកបោស​សម្អាត​មីន​ទាំង​ជាតិ និង​អន្តរ​ជាតិ​មាន​ចំនួន​ប្រមាណ​២.០​០៦​នាក់​ ដែល​កំពុង​បំពេញ​ការងារប្រឈម​ហានិភ័យ​ខ្ពស់​មួយ​នេះ។ លោក​ក៏​បាន​ឱ្យ​ដឹង​ដែរ​ថាតាំង​ពី​ឆ្នាំ​១៩៧៩​មក ​ប្រជា​ពលរដ្ឋរង​គ្រោះ​ដោយ​សារ​សំណល់​ជាតិ​ផ្ទុះ​ពី​សង្គ្រាម​ប្រមាណ​ជាង​៦​.៥០០​នាក់ ដែលស្លាប់ និង​ពិការ​ដល់​បច្ចុប្បន្ន​នេះ៕

XS
SM
MD
LG