ប្រជាពលរដ្ឋមួយចំនួនចាប់ផ្តើមប្រើប្រាស់បណ្តាញសង្គមហ្វេសប៊ុក ដើម្បីចែករំលែកអំពីកង្វះទឹកប្រើប្រាស់ប្រចាំថ្ងៃនៅតាមផ្ទះរបស់ពួកគេក្នុងរាជធានីភ្នំពេញ ជាពិសេសនៅតំបន់ជាយក្រុងភ្នំពេញ។
ប្រជាពលរដ្ឋមួយចំនួនដែលប្រឈមនឹងកង្វះទឹកប្រើប្រាស់នេះបានជំរុញឱ្យអាជ្ញាធរដោះស្រាយបញ្ហាទឹកជូនពួកគេឱ្យឆាប់រហ័ស និងមានប្រសិទ្ធភាព តាមកាលកំណត់ ដោយសារតែពួកគេប្រឈមការលំបាកយ៉ាងខ្លាំង នៅពេលមិនមានទឹកប្រើប្រាស់។
លោក រ៉ា អាយុ៣០ឆ្នាំ រស់នៅភូមិព្រៃពពេល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ប្រាប់វីអូអេថាលោកបានរស់នៅទីនេះ រយៈពេលពីរឆ្នាំមកហើយ ហើយលោកនិងគ្រួសារបង្ខំចិត្តទៅរស់នៅផ្ទះបងប្អូននៅខេត្តកណ្តាលជាបណ្ដោះអាសន្ន អំឡុងពេលជួបបញ្ហាខ្វះទឹកប្រើប្រាស់ជាងកន្លះខែមកហើយ។
លោកថ្លែងថា៖ «តាមពិតជាសំណូមពររបស់ខ្ញុំ ខ្ញុំសង្ឃឹមថាផ្នែកពាក់ព័ន្ធឱ្យដោះស្រាយ ឱ្យមានទឹកប្រើប្រាស់ ព្រោះដល់ពេលពិបាកអ៊ីចឹងទៅខ្ញុំគ្រាន់តែសំណូមពរថា បើថ្ងៃអត់មានក៏អត់ចុះ សង្ឃឹមថាពេលយប់នឹងមានទឹកឱ្យពួកខ្ញុំបានបូម ទុកប្រើប្រាស់ផង កុំឱ្យដូចរាល់ថ្ងៃនេះរយៈពេលជាងកន្លះខែនេះហើយ នៅតំបន់ខ្ញុំ គឺគ្មានអ្នកណាបានទឹកប្រើប្រាស់ទេ គឺអត់មានសោះហ្មង។ អ៊ីចឹងវាធ្វើឱ្យពួកខ្ញុំពិបាកទីមួយចំណូលយើងតិច ចំណាយច្រើនហើយមកត្រូវចំណាយទិញទឹកមួយឡានបីទៅបួនម៉ឺនទៀត វាអាចថាធ្វើឱ្យប្រជាពលរដ្ឋជួបផលលំបាកខ្លាំងមែនទែន»។
ប្រជាពលរដ្ឋរូបនោះបន្តទៀតថារដ្ឋាករទឹកតែងតែប្រាប់ប្រជាពលរដ្ឋថានឹងមានដំណោះស្រាយអំពីបញ្ហាទឹក តែផ្ទុយទៅវិញនៅតែខ្វះទឹកប្រើប្រាស់ដដែល។
ចំណែកអ្នកស្រី ពេជ្រ ចន្ធី អាយុ៣៩ឆ្នាំ ជាជាងសាឡនអ៊ុតសក់ នៅផ្សារពិភពថ្មីឈូកវ៉ាមួយ ប្រាប់វីអូអេនៅថ្ងៃសុក្រនេះថាអ្នកស្រីពិតជាពិបាកក្នុងការរស់នៅដែលប្រឈមមុខនឹងការខ្វះទឹករយៈពេលជិតមួយខែហើយ។ អ្នកស្រីបានចំណាយប្រាក់ទិញទឹកគេបន្ថែម ដើម្បីយកមកប្រើប្រាស់ ប៉ុន្តែវាមានតម្លៃថ្លៃ រហូតដល់អ្នកស្រីមិនអាចបន្តទិញបាន។
អ្នកស្រីថ្លែងថា៖ «ឆ្នាំមុន នៅអំឡុងពេលខែបីហ្នឹង ជិតចូលឆ្នាំហ្នឹង គឺទឹកគេអាចប្រើបានគ្រប់គ្រាន់តាមផ្ទះអ៊ីចឹងហាស គឺវាអត់មានបញ្ហា។ ដល់ឆ្នាំនេះ គឺគ្រប់ផ្ទះ អ៊ីចឹងពិបាកណាស់ក្នុងការផ្គត់ផ្គង់ណាស់ ម៉ោងមួយម៉ោងពីរយប់ គឺអត់មានទឹក គ្រប់ផ្ទះទាំងអស់ ហើយជូនណាខ្ញុំដាច់បីយប់បីថ្ងៃ ដើរសុំទឹកគេងូត វេទនាណាស់»។
អ្នកស្រីសំណូមពរឱ្យខាងរដ្ឋាករទឹកមានជាដំណោះស្រាយសម្រាប់ពលរដ្ឋដែលរស់នៅខាងតំបន់បុរីពិភពថ្មី សង្កាត់គោករកា ឱ្យមានទឹកប្រើប្រាស់គ្រប់គ្រាន់ ដូចរៀងរាល់ឆ្នាំ។
លោក រដ្ឋ ឆាន អាយុ៥៩ឆ្នាំ អ្នកលក់ទឹកស្អាតម្នាក់នៅសង្កាត់ត្រពាំងក្រសាំង ប្រាប់វីអូអេថាចំពោះការលក់ទឹករបស់លោកក្នុងឆ្នាំនេះ គឺមិនសូវលក់ដាច់ច្រើនដូចកាលពីឆ្នាំមុនទេ ដោយសារតាមតំបន់ខ្វះទឹកខ្លះបានតប្រព័ន្ធទឹករួចរាល់ហើយ។
លោកបញ្ជាក់ថា៖ «ខ្ញុំលក់ដាច់ ពីមុនៗ។ ពីឆ្នាំទៅខ្ញុំលក់ដាច់ឈូកវ៉ាពីរ និងកំបូល។ ដល់ពេលកំបូល ឈូកវ៉ាពីរ ឥឡូវគេតទឹកបានហើយ ឥឡូវខ្ញុំលក់បានតែប្រជាពលរដ្ឋរកស៊ីតាមផ្លូវរទះភ្លើងដែលធ្វើកញ្ចុះតាមវាលស្រែ ហើយនិងខាងបុរីប៊ុនរ៉ានីគម្រោងប្រាំមួយ ហើយតាមកុងតឺន័រ ដែលជួលដីគេដាក់ឡានអីហ្នឹងគាត់អត់បានតទឹក គាត់បុកអណ្តូងអត់ចេញ គឺគាត់ប្រើប្រាស់ទឹកខ្ញុំបីកន្លែងដែរ ហើយនិងប្រជាពលរដ្ឋរកស៊ីនៅតាមអែបៗថ្នល់ពីផ្លូវមុខឈូកវ៉ាពីរហ្នឹង ហើយអ្នកលាងឡានលាងអី»។
ក្រោយមានការត្អូញត្អែរពីប្រជាពលរដ្ឋ រដ្ឋាករទឹកស្វយ័តក្រុងភ្នំពេញ កាលពីថ្ងៃព្រហស្បតិ៍ បានចេញសេចក្តីជូនព័ត៌មានមួយ ដោយបញ្ជាក់ថាមានបញ្ហាសម្ពាធទឹកខ្សោយដែលកើតឡើងនៅក្នុងសង្កាត់មួយចំនួននៅជាយរាជធានីភ្នំពេញ។ រដ្ឋាករទឹកសុំការអធ្បាស្រ័យពីអតិថិជន ហើយសន្យាថានឹងមានដំណោះស្រាយជាជំហានៗ ចាប់ពីខែឧសភា ឆ្នាំ២០២៣តទៅ។
បើតាមរដ្ឋាករទឹក តម្រូវការប្រើប្រាស់ទឹកនៅក្នុងរាជធានីភ្នំពេញបានកើនឡើងជាង៨៩ម៉ឺនម៉ែត្រគូបក្នុងមួយថ្ងៃនារដូវប្រាំងនេះ ប៉ុន្តែសមត្ថភាពផ្គត់ផ្គង់បានត្រឹមតែ៦៤ម៉ឺនម៉ែត្រគូបក្នុងមួយថ្ងៃប៉ុណ្ណោះ ដែលជាហេតុធ្វើឱ្យខ្វះខាតទឹកប្រើប្រាស់។
ដូច្នេះរដ្ឋាករទឹកបានអំពាវនាវដល់អតិថិជនទាំងអស់ដែលរស់នៅរាជធានីភ្នំពេញ និងក្រុងតាខ្មៅ សន្សំសំចៃទឹក ដើម្បីចែករំលែកដល់អតិថិជនផ្សេងទៀតដែលរស់នៅជាយក្រុង។
ប្រធានមជ្ឈមណ្ឌលប្រជាពលរដ្ឋដើម្បីការអភិវឌ្ឍនៅកម្ពុជា លោក យង់ គិមអេង ប្រាប់វីអូអេនៅថ្ងៃសុក្រនេះថាកង្វះខាតទឹកប្រើប្រាស់របស់ប្រជាពលរដ្ឋក្នុងរាជធានីភ្នំពេញនេះ គឺជាបញ្ហាដដែលៗដែលកើតឡើងជារៀងរាល់ឆ្នាំ ដែលនេះបង្កជាការលំបាកក្នុងការរស់នៅរបស់ប្រជាពលរដ្ឋ។ លោកជំរុញឱ្យខាងអាជ្ញាធររដ្ឋាករទឹកពិនិត្យមើលបន្ថែមលើបញ្ហានេះ ដើម្បីដោះស្រាយជូនប្រជាពលរដ្ឋបានតាមកាលកំណត់។
លោកថ្លែងថា៖ «ប៉ុន្តែបើសិនជាយើងក្តាប់អាហ្នឹងមិនបាន ការអភិវឌ្ឍផ្ទះល្វែង ឬក៏កំណើននៃប្រជាពលរដ្ឋ ដែលកើនឡើងនៅក្នុងរាជធានី មិនមានព័ត៌មានហ្នឹងគ្រប់គ្រាន់ទេ អ៊ីចឹងការគណនាក្នុងការផ្គត់ផ្គង់ទឹកហ្នឹង ក៏មានការខ្វះចន្លោះដែរបាទ»។
គួរបញ្ជាក់ថាសេចក្តីប្រកាសព័ត៌មានរបស់រដ្ឋាករទឹកក្រុងភ្នំពេញបានឱ្យដឹងថានាដើមខែឧសភា ឆ្នាំ២០២៣ខាងមុខនេះ រោងចក្រផលិតទឹកស្អាតថ្មី នឹងផលិតចែកចាយទឹកក្នុងបរិមាណ២០ម៉ឺនម៉ែត្រគូបក្នុងមួយថ្ងៃបន្ថែមទៀត។ រដ្ឋាករទឹកបញ្ជាក់ថាចាប់ពីដើមឆ្នាំ២០២៤តទៅ អតិថិជនរស់នៅក្នុងរាជធានីភ្នំពេញ និងក្រុងតាខ្មៅ នឹងមានទឹកប្រើប្រាស់គ្រប់គ្រាន់៕
