សមាជិកព្រឹទ្ធសភាខាងគណបក្សសាធារណរដ្ឋម្នាក់នៃរដ្ឋវ៉ាស៊ីនតោន ស្ថិតនៅប៉ែកពាយព្យនៃសហរដ្ឋអាមេរិក បានស្លាប់ ក្រោយពីឆ្លងជំងឺកូវីដ១៩ ក្នុងពេលលោកធ្វើដំណើរទៅប្រទេសអែលសាល់វ៉ាឌ័រ។ នេះ បើយោងតាមរបាយការណ៍ព័ត៌មានក្នុងស្រុកនិងអន្តរជាតិជាច្រើនរួមទាំងកាសែត The New York Times ផងដែរ។
លោក Doug Ericksen បានស្លាប់កាលពីថ្ងៃសុក្រទី១៧ ខែធ្នូ នៅអាយុ៥២ឆ្នាំ ប៉ុន្តែមូលហេតុនៃការស្លាប់របស់លោក មិនទាន់ត្រូវបានបញ្ជាក់ច្បាស់លាស់នៅឡើយទេ។ គោលបំណងនៃការធ្វើដំណើរទៅប្រទេសអែលសាល់វ៉ាឌ័រនោះ ក៏មិនទាន់ត្រូវបានប្រកាសឲ្យដឹងភ្លាមៗនៅឡើយដែរ។
ប៉ុន្តែ លោក Doug Ericksen បានស្វែងរកជំនួយក្នុងការព្យាបាលជំងឺកូវីដ១៩នេះ បន្ទាប់ពីលោកដឹងខ្លួនថា លោកបានឆ្លង និងព្យាយាមតតាំងនឹងជំងឺនេះអស់ជាច្រើនសប្តាហ៍មុនពេលលោកស្លាប់។
ក្នុងពេលនៅមានជីវិត សមាជិកព្រឹទ្ធសភានៃរដ្ឋវ៉ាស៊ីនតោនរូបនេះ បានដឹកនាំកិច្ចប្រឹងប្រែងប្រឆាំងនឹងបទបញ្ជាក្នុងគ្រាអាសន្នរបស់រដ្ឋវ៉ាស៊ីនតោន នៅពេលមានការឆ្លងរាលដាលនៃជំងឺកូវីដ១៩។
លោក Doug Ericksen ក៏ប្រឆាំងនឹងការតម្រូវរបស់រដ្ឋ ឲ្យពលរដ្ឋដែលគ្រប់លក្ខណៈសម្បត្តិ ចាក់វ៉ាក់សាំងបង្ការជំងឺកូវីដ១៩ផងដែរ។
លោក Doug Ericksen ធ្លាប់មានទំនាក់ទំនងយ៉ាងជិតស្និទ្ធជាមួយមន្ត្រីជាន់ខ្ពស់កម្ពុជា ដោយមានចំណងរបររកស៊ីជាមួយមេដឹកនាំកម្ពុជា ហើយនៅគ្រាមួយក្នុងឆ្នាំ២០១៦ សមាជិកព្រឹទ្ធសភានៃរដ្ឋវ៉ាស៊ីនតោនរូបនេះ ក៏បានទទួលយកការអញ្ជើញទៅលេងប្រទេសកម្ពុជាក្នុងពេលលោកលម្ហែវិស្សមកាលជាមួយគ្រួសាររបស់លោកផងដែរ។ នេះ បើផ្អែកតាមកាសែត The Seattle Times ដែលមានទីស្នាក់ការនៅក្នុងក្រុង Seattle នៃរដ្ឋវ៉ាស៊ីនតោន។ ប៉ុន្តែ វីអូអេ មិនទាន់អាចបញ្ជាក់ដោយឯករាជ្យនូវអំណះអំណាងដែលរាយការណ៍ដោយកាសែតនេះ បាននៅឡើយទេ។
គិតត្រឹមថ្ងៃទី២០ ខែធ្នូ ឆ្នាំ២០២១នេះ សហរដ្ឋអាមេរិកមានអ្នកឆ្លងជំងឺកូវីដ១៩ ជាង៥០លាននាក់ និងស្លាប់ជាង៨សែននាក់។ នេះ បើយោងតាមតួលេខចងក្រងដោយកាសែត The New York Times៕
