ចំនួនមនុស្សស្លាប់ដោយសារជំងឺកូវីដ១៩នៅសហរដ្ឋអាមេរិក បានឡើងលើស៨០០.០០០នាក់កាលពីថ្ងៃអង្គារ ជាតួលេខដែលគេមិនអាចនឹកស្មានដល់កាលពីពេលមុន និងគេមើលឃើញថា ជាសោកនាដកម្មទ្វេដងដោយសារជីវិតមនុស្សជាង២០០.០០០នាក់ទៀត ត្រូវបានបាត់បង់ បន្ទាប់ពីវ៉ាក់សាំងមានគ្រប់គ្រាន់ចាប់តាំងពីដើមឆ្នាំនេះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AP។
សហរដ្ឋអាមេរិក មានចំនួនអ្នកស្លាប់ច្រើនជាងប្រទេសណាៗទាំងអស់។ សហរដ្ឋអាមេរិក មានប្រជាពលរដ្ឋប្រហែល៤%របស់ពិភពលោក ក៏ប៉ុន្តែមានអ្នកស្លាប់ប្រហែល១៥%នៃចំនួនអ្នកស្លាប់សរុប ៥លាន ៣សែននាក់ទូទាំងសាកលលោក ដោយសារជំងឺកូវីដ១៩ ចាប់តាំងពីការផ្ទុះរាតត្បាតបានចាប់ផ្តើមឡើងនៅក្នុងប្រទេសចិនកាលពី២ឆ្នាំមុន។
ចំនួនស្លាប់ពិតប្រាកដនៅក្នុងសហរដ្ឋអាមេរិក និងនៅជុំវិញពិភពលោក ត្រូវបានគេជឿថា មានចំនួនខ្ពស់ជាងនេះ ពីព្រោះករណីខ្លះ បានត្រូវគេបិទបាំង ឬមិនដឹង។
ប្រធានាធិបតីសហរដ្ឋអាមេរិកលោក Joe Biden កាលពីថ្ងៃអង្គារ បានមានកត់សម្គាល់ពីអ្វីដែលលោកបានហៅថា ជា«ចំណុចសោកនាដកម្ម»មួយ។ លោកប្រធានាធិបតី ជាថ្មីម្តងទៀតបានអំពាវនាវដល់ពលរដ្ឋអាមេរិកាំងដែលមិនបានចាក់វ៉ាក់សាំងឲ្យទៅចាក់វ៉ាក់សាំងដើម្បីខ្លួនឯង និងដើម្បីកូនចៅរបស់ពួកគេ ហើយបានជំរុញអ្នកចាក់វ៉ាក់សាំងរួចឲ្យទៅចាក់ដូសជំរុញ។
ក្រុមអ្នកជំនាញសុខាភិបាល បានត្អូញត្អែរថា ការស្លាប់ជាច្រើននៅក្នុងសហរដ្ឋអាមេរិកជាការគួរឱ្យសោកស្តាយជាខ្លាំងពីព្រោះតែការស្លាប់ទាំងនោះ អាចបង្ការបានដោយការចាក់វ៉ាក់សាំង ដែលវ៉ាក់សាំងទាំងនោះចាប់មាននៅពាក់កណ្តាលខែធ្នូឆ្នាំមុន ហើយមានចំនួនគ្រប់គ្រាន់សម្រាប់មនុស្សពេញវ័យទាំងអស់នៅពាក់កណ្តាលខែមេសាឆ្នាំនេះ៕
