ក្រុមមន្ត្រីកំពូលសុខាភិបាលសហរដ្ឋអាមេរិកពីររូបបាននិយាយកាលពីថ្ងៃអាទិត្យថា សហរដ្ឋអាមេរិកនឹងប្រឈម «បីបួនសប្តាហ៍ដ៏លំបាក» នៅពេលខាងមុខក្នុងការទប់ស្កាត់វីរុសកូរ៉ូណាបំប្លែងខ្លួនអូមីក្រុង (Omicron) ខណៈវីរុសនេះក៏កំពុងនាំឱ្យមានការកើនឡើងនូវករណីឆ្លងជំងឺកូវីដ១៩ នៅទូទាំងពិភពលោក។
លោកវេជ្ជបណ្ឌិត Francis Collins នាយកវិទ្យាស្ថានជាតិសុខាភិបាលដែលនឹងចូលនិវត្តន៍បានប្រាប់កម្មវិធី «Fox News Sunday» ថា «យើងកំពុងស្ថិតនៅក្នុងស្ថានភាពមានបញ្ហាធ្ងន់ធ្ងរនៅក្នុងរយៈពេលបីបួនសប្តាហ៍ខាងមុខទៀតនេះ។ វីរុសនោះបានបង្កបញ្ហាដែលយើងមិនបានរំពឹងទុកមុន»។
លោកបាននិយាយទៀតថា ពលរដ្ឋអាមេរិកាំងដែលត្រូវចាក់វ៉ាក់សាំងចំនួន ៥០លាននាក់ នៅតែមិនទាន់ចាក់វ៉ាក់សាំងដែលនេះលោកវេជ្ជបណ្ឌិត Collins បានពណ៌នាថាជា «បញ្ហាដែលខ្ញុំមានការរកាំចិត្តយ៉ាងខ្លាំង»។
បន្ថែមពីនោះទៀត ពលរដ្ឋរាប់លាននាក់ទៀតនៅក្នុងសហរដ្ឋអាមេរិកដែលបានចាក់វ៉ាក់សាំងដូសទី១រួចក៏នៅតែមិនទាន់ទទួលបានការចាក់ដូសជំរុញនៅឡើយដែលអ្នកជំនាញសុខាភិបាល និយាយថា ដូសជំរុញនេះចាំបាច់សម្រាប់បង្កើនការការពារទប់ទល់នឹងវីរុសអូមីក្រុង។
លោកវេជ្ជបណ្ឌិត Anthony Fauci អ្នកជំនាញខាងជំងឺឆ្លងកំពូលនិងជាទីប្រឹក្សាខាងវេជ្ជសាស្ត្រកំពូលរបស់លោកប្រធានាធិបតី Joe Biden បាននិយាយនៅក្នុងកម្មវិធី «State of the Union» របស់ទូរទស្សន៍ CNN ថា៖ «ប្រសិនបើលោកអ្នកចង់បានការការពារខ្លាំង លោកអ្នកត្រូវតែចាក់វ៉ាក់សាំងដូសជំរុញ»។
លោកប្រធានាធិបតី Biden គ្រោងថ្លែងសន្ទរកថាទៅកាន់ប្រទេសជាតិនៅថ្ងៃអង្គារស្អែកនេះដើម្បីប្រកាសថាតើរដ្ឋាភិបាលអាមេរិកមានផែនការយ៉ាងណាដើម្បីឆ្លើយតបនឹងការកើនឡើងនូវករណីឆ្លងដែលបណ្តាលមកពីវីរុសបំប្លែងខ្លួនអូមីក្រុង៕
ព័ត៌មានខ្លះនៅក្នុងសេចក្តីរាយការណ៍នេះត្រូវបានដកស្រង់ពីទីភ្នាក់ងារព័ត៌មាន AFP, AP, និង Reuters។
