លោកអនុប្រធានាធិបតីស.រ.អា. Mike Pence បានសន្យាថាស.រ.អា.នឹងឈរជាមួយក្រុមបាតុករប្រឆាំងនឹងរដ្ឋាភិបាលអ៊ីរ៉ង់ក្នុងរយៈពេលយូរ ហើយលោកបានមានប្រសាសន៍ថាប្រធានាធិបតី Donald Trump ប្រុងប្រៀបស្រេចហើយដើម្បីគាំទ្រការបះបោរដោយមានលើសពីពាក្យសម្តីទៅទៀត។
លោក Pence បានមានប្រសាសន៍នៅក្នុងសេចក្តីសម្ភាសន៍មួយជាមួយ VOAថា «ខ្ញុំដឹងថាចំណង់ដោយគ្មានការសុំអភ័យទោសរបស់ប្រធានាធិបតី Trump ក្នុងការឈរជាមួយប្រជារាស្ត្រក្លាហាននៃប្រទេសអ៊ីរ៉ង់ផ្តល់សេចក្តីសង្ឃឹមដល់ប្រជារាស្ត្រនៅតាមថ្នល់នៃទីក្រុងនានានៃប្រទេសនេះ។ ហើយយើងនឹងបន្តគាំទ្រពួកគេមិនមែនតែតាមពាក្យពេចន៍ប៉ុណ្ណោះទេនៅពេលដែលពួកគេធ្វើឱ្យមានការផ្លាស់ប្តូរនៅក្នុងប្រទេសរបស់ពួកគេ»។
ពួកមន្ត្រីនៃក្រសួងការបរទេសស.រ.អា.បាននិយាយប្រាប់ VOA ថារដ្ឋបាលអាមេរិកាំងកំពុងពិចារណាអំពីការដាក់ទណ្ឌកម្មសេដ្ឋកិច្ចឬសកម្មភាពឯទៀតៗប្រឆាំងនឹងពួកមនុស្សឬអង្គការទាំងឡាយណាដែលបានប្រព្រឹត្តអំពើហិង្សាប្រឆាំងនឹងក្រុមបាតុករសន្តិវិធី។
ថ្លែងទៅកាន់អ្នកស្រី Greta Van Susteren នៃVOAនៅក្នុងការិយាល័យលោកក្នុងអាគារការិយាល័យនីតិប្រតិបត្តិកាលពីថ្ងៃពុធ លោក Pence បានប្រកែកមិនព្រមនិយាយឱ្យបានក្បោះក្បាយអំពីសកម្មភាពអ្វីដែលស.រ.អា.នឹងពិចារណា ដោយលោកគ្រាន់តែបានមានប្រសាសន៍ថាមាន «សកម្មភាពជាច្រើនដែលស.រ.អា.និងប្រទេសនៅទូទាំងពិភពលោកអាចធ្វើបានសម្រាប់ប្រជារាស្ត្រនៃប្រទេសអ៊ីរ៉ង់ប្រសិនបើពួកគេនៅតែបន្តងើបឈរដើម្បីសេរីភាពផ្ទាល់របស់ពួកគេ»។
លោកអនុប្រធានាធិបតីអាមេរិកាំងរូបនេះបានមានប្រសាសន៍ថារដ្ឋបាលអាមេរិកាំងមានជំនឿថាការដាក់ទណ្ឌកម្មបច្ចុប្បន្នលើរដ្ឋាភិបាលក្រុង Teheran បានការហើយអាចត្រូវបង្កើនថែមទៀត៕
